ບົດຖະແຫຼງຂ່າວ ຂອງ ທ່ານ ຮສ ປອ ກອງສີ ແສງມະນີ, ຮອງລັດຖະມົນຕີກະຊວງສຶກສາທິການ ແລະ ກິລາ ຕໍ່ສື່ມວນຊົນ ຄັັ້ງວັນທີ 05 ມິຖຸນາ 2020

ໃນນາມຕາງໜ້າໃຫ້ແກ່ຄະນະນໍາກະຊວງສຶກສາທິການ ແລະ ກິລາ, ຂ້າພະເຈົ້າຮູ້ສຶກເປັນກຽດຢ່າງຍິ່ງ ທີ່ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ຈັດ “ກອງປະຊຸມການມີສ່ວນຮ່ວມຂອງສື່ມວນຊົນໃນການໂຄສະນາ ການເປີດໂຮງຮຽນຄືນໃຫ້ມີຄວາມປອດໄພ” ນີ້ຂຶ້ນ ຊຶ່ງຈະເປັນການເຮັດໃຫ້ສັງຄົມ ມີຄວາມເຂົ້າໃຈກ່ຽວກັບມາດຕະການຕ່າງໆ ຂອງຂະແໜງການສຶກສາ ແລະ ກິລາ ກະຈ່າງແຈ້ງຂຶ້ນ.

ດັ່ງທີ່ເຮົາຮູ້ນຳກັນແລ້ວວ່າການລະບາດຂອງພະຍາດໂຄວິດ-19 ສົ່ງຜົນກະທົບໄປເກືອບທຸກປະເທດໃນທົ່ວໂລກ ເຮັດໃຫ້ສະພາບເສດຖະກິດ, ສັງຄົມ ແລະ ການດຳລົງຊີວິດ ຂອງພວກເຮົາພົບຄວາມຫຍຸ້ງ ຍາກ. ຕໍ່ສະພາບດັ່ງກ່າວ ພັກ-ລັດຖະບານ ສປປ ລາວ ໄດ້ຖືເປັນວາລະສຳຄັນຂອງຊາດ ແລະ ໄດ້ສ້າງກົນໄກໃນການປ້ອງກັນ, ຄວບຄຸມ ແລະ ແກ້ໄຂ ຜ່ານຄະນະສະເພາະກິດແຫ່ງຊາດ, ຄະນະສະເພາະກິດຂັ້ນແຂວງ ແລະ ຂັ້ນເມືອງ. ສະເພາະກະຊວງສຶກສາທິການ ແລະ ກິລາ ຂອງພວກເຮົາ ກໍ່ໄດ້ ສ້າງຕັ້ງຄະນະສະເພາະກິດຂອງກະຊວງຂຶ້ນ ໄດ້ປະກອບບຸກຄະລາກອນເຂົ້າເປັນຄະນະ ແລະ ກອງເລຂາຂອງຄະນະສະເພາະກິດແຫ່ງຊາດ.

ອິງຕາມຜົນກອງປະຊຸມລັດຖະບານ ແລະ ຄະນະສະເພາະກິດປະຈຳເດືອນມີນາ, ກະຊວງສຶກສາທິການໄດ້ອອກແຈ້ງການໂຈະການຮຽນ-ການສອນໃນສະຖານການສຶກສາ ສຳລັບການສຶກສາແຕ່ອະນຸບານ ຈົນເຖິງ ມະຫາວິທະຍາໄລ ຊຶ່ງມີຄູອາຈານ-ພະນັກງານ ແລະ ນັກຮຽນ-ນັກສຶກສາ ໄດ້ຮັບຜົນກະທົບປະມານ 1.700.000 ຄົນ. ເພື່ອບໍ່ໃຫ້ການຮຽນ-ການສອນຢຸດສະງັກ ກະຊວງໄດ້ແຈ້ງການແນະນຳໃຫ້ສະຖານການສຶກສາທີ່ມີຄວາມພ້ອມ ແລະ ສະຖານການສຶກສາໃດທີ່ຍັງບໍ່ພ້ອມໃຫ້ຂຸດຄົ້ນທ່າແຮງເທົ່າທີ່ມີ ໃນການການຈັດການຮຽນ-ການສອນ ຜ່ານທາງສື່ອີເລັກໂຕຣນິກ ຫຼື ແບບອອນລາຍ ພ້ອມດຽວກັນນີ້ກໍໄດ້ສ້າງລາຍການສອນ ເພື່ອສອນອອກທາງໂທລະພາບແຫ່ງຊາດ ແລະ ເຄືອຂ່າຍສື່ສັງຄົມອອນລາຍ ພິເສດພວກເຮົາໄດ້ຮັບການອຸປະຖຳຂະຫຍາຍເວລາອອກອາກາດລາຍການໂທລະພາບສຶກສາ ແລະ ກິລາ ຈາກທາງກະຊວງຖະແຫຼງຂ່າວ, ວັດທະນະທຳ ແລະ ການທ່ອງທ່ຽວ

ຂ້າພະເຈົ້າຂໍສະແດງຄວາມຂອບໃຈ ແລະ ຍ້ອງຍໍຊົມເຊີຍ ການນຳກະຊວງພວກທ່ານ ມານະທີ່ນີ້ດ້ວຍ.

ພ້ອມກັນນີ້ ພວກເຮົາກໍໄດ້ຮັບການຊ່ວຍເຫຼືອຈາກກະຊວງ ໄປສະນີ ໂທລະຄົມມະນາຄົມ ແລະ ການສື່ສານ ແລະ ບໍລິສັດດາວທຽມລາວອາຊີ-ປາຊີຟິກ ໃນການໃຫ້ຊ່ອງສັນຍານ ໂທລະພາບສຶກສາ ແລະ ກິລາ ອອກອາກາດຜ່ານດາວທຽວລາວແຊັດ ຊ່ອງ 8 ແຕ່ 6 ໂມງເຊົ້າ ເຖິງ 10 ໂມງກາງຄືນ. ທັງ 2 ຊ່ອງທາງໂທລະພາບນີ້ ຈະເປັນການສ້າງໂອກາດໃຫ້ ລູກຫຼານ ປະຊາຊົນ ໂດຍສະເພາະຜູ້ທີ່ຢູ່ເຂດຫ່າງໄກສອກຫຼີກ ໄດ້ເຂົ້າເຖິງບໍລິການ ການສຶກສາ ເທົ່າທຽມ ກັບ ຜູ້ທີ່ຢູ່ໃນຕົວເມືອງ ຫຼາຍຂຶ້ນ;

ບັນດາທ່ານ ບັນດາສະຫາຍ ທີ່ຮັກແພງ

ດັ່ງທີ່ຮູ້ນຳກັນແລ້ວວ່າ, ລັດຖະບານ ແລະ ຄະນະສະເພາະກິດໄດ້ມີມາດຕະການຜ່ອນຜັນຈຳນວນໜຶ່ງ ຊຶ່ງໃນນັ້ນຂະແໜງການສຶກສາ ແລະ ກິລາ ກໍໄດ້ຮັບການຜ່ອນຜັນດັ່ງນີ້:

• ໄລຍະທີ 1: ໃນວັນທີ 4 ພຶດສະພາ 2020 ອະນຸຍາດໃຫ້ອອກກຳລັງກາຍ ແລະ ກິລາກາງແຈ້ງ ໄດ້;
• ໄລຍະທີ 2: ໃນວັນທີ 18 ພຶດສະພາ 2020 ອະນຸຍາດໃຫ້ເປີດຮຽນຄືນໃນໂຮງຮຽນ ມີ ຂັ້ນຮຽນ ປ.5, ມ.4 ແລະ ມ.7 ແລະ ກິລາກາງແຈ້ງ ແລະ ໃນຮົ່ມ
• ໄລຍະທີ 3: ໃນວັນທີ 2 ມິຖຸນາ 2020 ອະນຸຍາດໃຫ້ເປີດຮຽນຄືນໃນໂຮງຮຽນເພີ່ມຕື່ມ ມີ ຂັ້ນຮຽນ ປ.1-ປ.4, ມ.1-ມ.3 ແລະ ມ.5-ມ.6, ນັກຮຽນອາຊີວະ, ວິທະຍາໄລ ແລະ ມະຫາວິທະຍາໄລປີສຸດທ້າຍ ແລະ ກິລາກາງແຈ້ງ ແລະ ໃນຮົ່ມ ແຕ່ບໍ່ໃຫ້ມີຜູ້ເຂົ້າຊົມ
• ໄລຍະທີ 4: ໃນວັນທີ 15 ມິຖຸນາ 2020 ອະນຸຍາດໃຫ້ເປີດຮຽນຄືນໃນສະຖານກການສຶກສາສຳລັບທຸກການສຶກສາ ທຸກປີຮຽນ ແຕ່ອະນຸບານ ເຖິງ ມະຫາວິທະຍາໄລ ແລະ ກິລາກາງແຈ້ງ ແລະ ໃນຮົ່ມ ແຕ່ບໍ່ໃຫ້ມີຜູ້ເຂົ້າຊົມ

ເພື່ອສືບຕໍ່ຮັບປະກັນເຮັດໃຫ້ການເປີດຮຽນຄືນນີ້ ມີຄວາມປອດໄພ ແລະ ເຝົ້າລະວັງການແຜ່ລະບາດຂອງພະຍາດ ໂຄວິດ -19, ກະຊວງສຶກສາທິການ ແລະ ກິລາ ໄດ້ອອກຄຳແນະນຳ ເລກທີ 466/ສສກ ເພື່ອໃຫ້ສະຖານການສຶກສາ,​ ຜູ້ບໍລິຫານ,​ ຄູ-ອາຈານ, ພະນັກງານ, ນັກຮຽນ-ນັກສຶກສາ ລວມທັງພໍ່ແມ່ນຜູ້ປົກຄອງ ແລະ ສັງຄົມ ຈະຕ້ອງໄດ້ສືບຕໍ່ມາດຕະການການປ້ອງກັນ ແລະ ໄດ້ອອກແຈ້ງການໃຫ້ສະຖານການສຶກສານຳໃຊ້ເງິນຮ່ວງບໍລິຫານຂອງຕົນ ເຂົ້າໃນວຽກງານການປ້ອງກັນ ແລະ ສະກັດກັ້ນໂຄວິດ-19 ໃນໂຮງຮຽນ ເຊັ່ນ: ຊື້ສະບູ, ເຈວລ້າງມື, ຜ້າປິດປາກ-ປິດດັງ, ອຸປະກອນເຮັດອະນາໄມໂຮງຮຽນ. ເພື່ອເປັນການສືບຕໍ່ຮັກສາມາດຕະການຮັກສາໄລຍະຫ່າງ ບໍ່ໃຫ້ມີຄວາມແອອັດຂອງນັກຮຽນ ສຳລັບສະຖານການສຶກສາທີ່ມີນັກຮຽນຫຼາຍໃຫ້ຜັດປ່ຽນກັນຮຽນເປັນຂັ້ນຮຽນເຊັ່ນ:

• ປ.1, ປ.4, ມ.1, ມ.3 ແລະ ມ.5 ໃຫ້ເຂົ້າຮຽນໃນວັນ ຈັນ, ພຸດ ແລະ ວັນສຸກ.
• ປ.2, ປ.3, ມ.2 ແລະ ມ.6 ໃຫ້ເຂົ້າຮຽນໃນວັນ ອັງຄານ, ພະຫັດ ແລະ ວັນເສົາ.
• ສ່ວນ ປ.5, ມ.4 ແລະ ມ.7 ໃຫ້ເຂົ້າຮຽນແຕ່ວັນຈັນ ເຖິງ ວັນສຸກ.

ພ້ອມກັນນີ້ ພວກເຮົາກໍໄດ້ຮັບການຊ່ວຍເຫຼືອ ຈາກບັນດາຄູ່ຮ່ວມພັດທະນາ ໂດຍສະເພາະແມ່ນ ອົງການອຸຍນີເຊັບ ໃນການຜະລິດສື່ໂຄສະນາ ການກັບເຂົ້າຮຽນຄືນ ໃຫ້ມີຄວາມປອດໄພ ຊຶ່ງສື່ໂຄສະນາເລົ່ານີ້ເຮົາຢາກສື່ສານໃຫ້ນັກຮຽນ-ນັກສຶກສາ, ຄູ-ອາຈານ ແລະ ພໍ່ແມ່-ຜູ້ປົກຄອງໄດ້ເຂົ້າ ໃຈກ່ຽວກັບມາດຕະການຕ່າງໆຂອງກະຊວງ ໃນຮູບແບບເປັນວີດີໂອສັ້ນ, ມີຄຳບັນຍາຍພາສາລາວ, ມີພາສາມື ເປັນພາສາກຶມມຸ ແລະ ພາສາມົ້ງ ຕື່ມອິກ.

ຊຶ່ງພວກເຮົາຫວັງວ່າບັນດາສື່ໂຄສະນາເລົ່ານີ້ຈະຊ່ວຍໃຫ້ປະຊາຊົນບັນດາເຜົ່າເຂົ້າໃຈມາດຕະການຂັ້ນພື້ນຖານໃນການປ້ອງກັນ ແລະ ຄວບຄຸມພະຍາດ ເວລາກັບໄປໂຮງຮຽນຄືນ. ຂ້າພະເຈົ້າຫວັງວ່າບັນດາສື່ມວນຊົນຈະສືບຕໍ່ໃຫ້ການຊຸກຍູ້ ຊ່ວຍເຫຼືອ ຂະແໜງການສຶກສາທິການ ແລະ ກິລາຂອງພວກຂ້າພະເຈົ້າ ຜ່ານຫຼາຍຮູບແບບ ແລະ ພາຫະນະສື່ມວນຊົນທີ່ມີ;

ສຳລັັບນັກສຶກສາລາວ, ທີ່ຕ້ອງການກັບໄປຮຽນຄືນຢູ່ຕ່າງປະເທດແມ່ນສາມາດເດີນທາງໄປໄດ້ ແຕ່ຕ້ອງໄດ້ປະຕິບັດຕາມລະບຽບການຂອງ ສປປ ລາວ ແລະ ຂອງປະເທດທີ່ໄປຮຽນຢ່າງເຂັັ້ມງວດ ໂດຍໃຫ້ນັກສຶກສາໄປລົງທະບຽນຢູ່ພະແນກສຶກສາທິການ ແລະ ກິລາແຂວງ/ນະຄອນຫຼວງ ເພື່ອສັງລວມໃຫ້ກົມກິດຈະການນັກສຶກສາ, ກະຊວງສຶກສາທິການ ແລະ ກິລາ ຂໍອະນຸຍາດກັບຄະນະສະເພາະກິດ ແລະ ພາກ ສ່ວນກ່ຽວຂ້ອງ;

ເນື່ອງຈາກວ່າໄລຍະນີ້ເປັນຊ່ວງລະດູຝົນການເດີນທາງໄປ-ມາໂຮງຮຽນ ອາດພົບຄວາມຫຍຸ້ງ ຍາກ ຂ້າພະເຈົ້າຢາກສື່ສານໄປຍັງ ພະແນກສຶກສາທິການ ແລະ ກິລາແຂວງ/ນະຄອນຫຼວງ ແລະ ຫ້ອງການສຶກສາທິການ ແລະ ກິລາເມືອ/ນະຄອນ ໃຫ້ຕິດຕາມພະຍາກອນອາກາດຢ່າງໃກ້ຊິດ ຖ້າເຫັນວ່າ ໃນເຂດຂອງທ່ານມີຄວາມສ່ຽງທີ່ຈະມີໄພພິບັດ ຫຼື ໄພອັນຕະລາຍຕ່າງໆ ແມ່ນໃຫ້ ພິຈາລະນາຕາມຄວາມເໝາະສົມຂອງເຫດການ ແລະ ຮຽກຮ້ອງໃຫ້ສະຖານການສຶກສາແຕ່ລະແຫ່ງສ້າງຂະບວນການ ກຳຈັດແຫຼ່ງເພາະພັນ ຂອງຍຸງ ທີ່ເປັນພາຫະ ຂອງພະຍາດ ທີ່ມາກັບລະດູຝົນ.

ທ້າຍສຸດນີ້ ຂ້າພະເຈົ້າຂໍອວຍພອນໃຫ້ແກ່ຄະນະປະທານ ບັນດາແຂກ ທ່ານຍິງ ທ່ານຊາຍ ແລະ ບັນດາອ້າຍນ້ອງສື່ມວນຊົນ ຈົ່ງມີສຸຂະພາບເຂັ້ມແຂງ ສືບຕໍ່ຜັນຂະຫຍາຍເນື້ອໃນຈິດໃຈຂອງກອງປະຊຸມ ມື້ນີ້ໃຫ້ທົ່ວສັງຄົມເຂົ້າໃຈເປັນເອກະພາບ ຂໍອວຍພອນໃຫ້ກອງປະຊຸມປະສົບຜົນສຳເລັດຕາມລະດັບຄາດໝາຍທີ່ວາງໄວ້

ຂໍຂອບໃຈ