ສານປະຊາຊົນພາກເໜືອ-ຫຼວງພະບາງ ປັບປຸງການຈັດຕັ້ງ

ພິທີປະກາດແຕ່ງຕັ້ງຮອງປະທານສານປະຊາຊົນພາກເໜືອ ປະທານ-ຮອງປະທານສານປະຊາຊົນແຂວງຫຼວງພະບາງ ຜູ້ໃຫມ່, ໄດ້ມີຂື້ນໃນວັນທີ 4 ມິຖຸນານີ້ ໂດຍການເຂົ່າຮ່ວມມີທ່ານ ຄຳພັນ ບຸນພາຄົມ ຮອງປະທານສານປະຊາຊົນສູງສຸດ ທ່ານ ສິງຕັນ ໄຊລືຊົ່ງ ຄະນະປະຈໍາພັກແຂວງ ຮອງປະທານສະພາປະຊາຊົນແຂວງ
ໃນພິທີ ທ່ານ ເທບພະກອນ ຜາພູ ປະທານສານປະຊາຊົນແຂວງຫຼວງພະບາງ ຜູ້ເກົ່າ ໄດ້ຂຶ້ນຜ່ານບົດສະຫຼຸບ ຜົນງານການເຄື່ອນໄຫວຊີ້ນໍານໍາພາໃນ 5 ປີຜ່ານມາ ຈາກນັ້ນ ຫົວໜ້າກົມຈັດຕັ້ງ-ພະນັກງານ ສານປະຊາຊົນສູງສຸດ ຂຶ້ນຜ່ານຂໍ້ຕົກລົງຂອງຄະນະປະຈໍາສະພາແຫ່ງຊາດ ເລກທີ 56, 57, 58/ຄປຈ ລົງວັນທີ 15 ພຶດສະພາ 2020 ວ່າດ້ວຍການແຕ່ງຕັ້ງພະນັກງານສານປະຊາຊົ ທ້ອງຖິ່ນ ໂດຍເຫັນດີຕົກລົງແຕ່ງຕັ້ງທ່ານ ເທບພະກອນ ຜາພູ ປະທານສານປະຊາຊົນແຂວງຫຼວງພະບາງ ເປັນຮອງປະທານສານປະຊາຊົນພາກເໜືອ ແຕ່ງຕັ້ງທ່ານ ແສງຈັນ ອິນສີມີໄຊ ປະທານສານປະຊາຊົນເຂດ 2 ແຂວງຫຼວງພະບາງ ເປັນປະທານສານປະຊາຊົນແຂວງຫຼວງພະບາງ ແລະ ແຕ່ງຕັ້ງທ່ານ ວຽງໄຊ ແສງນາລີ ປະທານສານປະຊາຊົນເຂດ 3 ແຂວງຫຼວງພະບາງ ເປັນຮອງປະທານສານປະຊາຊົນແຂວງຫຼວງພະບາງ.