ຈີນກຳລັງຜະລິດວັກແຊັງໂຄວິດ-19 ພ້ອມອອກວາງຈໍາໜ່າຍທ້າຍປີນີ້
ວັນທິ 2 ມິຖຸນານີ້ (ຊິນຫົວ) ໄດ້ອອກຂ່າວວ່າ: ໄຊນາ ເນຊັນນັລ ໄບໂອເຕັກ ກຣຸບ (CNBG) ຜູ້ຜະລິດສັນຊາດຈີນ ຄາດວ່າວັກແຊັງຕ້ານເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ຂອງຈີນຈະໄດ້ທົດລອງທາງຄລີນິກ ແລະ ພ້ອມວາງຂາຍຕະຫລາດໃນທ້າຍປີນີ້ ຫລື ຕົ້ນປີໜ້າ.
ຊີເອັນບີຈີ (CNBG) ເຊິ່ງເປັນບໍລິສັດສັງກັດໄຊນາ ເນຊັນນັລ ຟາມາຊູຕິຄັລ ກຣຸບ ຫລື ຊິໂນຟາມ (Sinopharm), ບໍລິສັດ ການຢາຄົນໃໝ່ຂອງຈີນ ມີວັກແຊັງໂຄວິດ-19 ຢູ່ລະຫວ່າງການທົດລອງທາງຄລີນິກ ໄລຍະທີ 2 ຈໍານວນ 2 ລາຍການ ແລະ ໄດ້ເພີ່ມກຳລັງການຜະລິດແລ້ວ.
ຊີເອັນບີຈີໃຫ້ຮູ້ວ່າ: ມີປະຊາຊົນໄດ້ຮັບວັກແຊັງໃນເບື້ອງຕົ້ນຫລາຍກວ່າ 2.000 ຄົນ ແລະ ຂໍ້ມູນທາງຄລີນິກໄດ້ຮັບຮອງຄວາມປອດໄພ ແລະ ປະສິດທິພາບ ລວມຮອດປາກົດການອັນບໍ່ປະສົງຕ່ຳກວ່າວັກແຊັງອື່ນໆ ທີ່ມີລັກສະນະຄ້າຍຄືກັນຫລາຍຢ່າງ.
ຊີເອັນບີຈີ ໄດ້ເພີ່ມກຳລັງການຜະລິດວັກຊິນດ້ວຍການກໍ່ສ້າງໜ່ວຍງານການຜະລິດຂະໜາດໃຫຍ່ໃນປັກກິ່ງ ເຊິ່ງຜ່ານຂໍ້ກຳນົດການປ້ອງກັນຄວາມປອດໄພທາງຊີວະພາບລະດັບສູງ ໂດຍໜ່ວຍການຜະລິດດັ່ງກ່າວສາມາດຜະລິດວັກແຊັງໂຄວິດ-19 ຊະນິດຊິ້ນຕາຍນີ້ເຖິງ 100-120 ລ້ານຫລອດຕໍ່ປີ ເມື່ອເລີ່ມຜະລິດຂະໜາດໃຫຍ່.
ຂະນະດຽວກັນການກໍ່ສ້າງໜ່ວຍການຜະລິດວັກແຊັງອີກແຫ່ງໃນນະຄອນອູ່ຮັ່ນຈະສຳເລັດພາຍໃນທ້າຍເດືອນ ມິຖຸນາ ຫລື ຕົ້ນເດືອນ ກໍລະກົດ ໂດຍຫາກລວມໜ່ວຍການຜະລິດທັງສອງແຫ່ງແລ້ວ ແຕ່ລະປີຈະສາມາດຜະລິດວັກແຊັງໂຣກໂຄວິດ-19 ຊະນິດຊີ້ນຕາຍໄດ້ 200 ລ້ານຫລອດ.
