‘ກົງໂກ’ ປະທະເສິກ 2 ດ້ານ ‘ອີໂບລາ-ໂຄວິດ’
“ກົງໂກ” ພົບ ໄວຣັສອີໂບລາ ກັບມາລະບາດເປັນຄັ້ງທີ 11 ທ່າມກາງເສິກໜັກໂຄວິດ-19 ຍັງບໍ່ສິ້ນສຸດ.
ສໍານັກຂ່າວຣອຍເຕີລາຍງານວ່າ: ອົງການອະນາໄມໂລກ (WHO) ໄດ້ອອກມາເປີດເຜີຍວ່າ: ສາທາລະນະລັດ ປະຊາທິປະໄຕ ກົງໂກ ປະກາດໃນວັນທີ 1 ມິຖຸນານີ້ ລະບຸພະຍາດອີໂບລາ ໄດ້ກັບມາລະບາດເປັນຄັ້ງທີ 11 ເຮັດໃຫ້ມີຜູ້ເສຍຊີວິດແລ້ວ 4 ຄົນ.
ທ່ານ ດຣ. ທີໂດຣສ ອັດຮານອມ ກີບຣີເຢຊຸສ ຜູ້ອຳນວຍການອົງການອະນາໄມໂລກ ກ່າວວ່າ: ໄດ້ຮັບລາຍງານວ່າພົບຜູ້ຕິດເຊື້ອໄວຣັສອີໂບລາ 6 ຄົນຢູ່ເມືອງບັງດາຄາ ທາງຕາເວັນຕົກສຽງເໜືອຂອງປະເທດສາທາລະນະລັດ ປະຊາທິປະໄຕ ກົງໂກ ເປັນການລະບາດຄັ້ງທີ 11 ຂອງປະເທດທີ່ມີໄວຣັສຮ້າຍແຮງ ເຊິ່ງສົ່ງຜ່ານຂອງເຫລວໃນຮ່າງກາຍ ແລະ ມີອັດຕາການເສຍຊີວິດລະຫວ່າງ 25% ເຖິງ 90% ຂຶ້ນຢູ່ກັບການລະບາດຂອງພະຍາດດັ່ງກ່າວ.
ລັດຖະມົນຕີສາທາລະນະສຸກຂອງສາທາລະນະລັດ ປະຊາທິປະໄຕ ກົງໂກ ຖະແຫລງໃນວັນທີ 1 ມິຖຸນາວ່າ: ພົບຜູ້ປ່ວຍອີໂບລາອີກຄັ້ງຈຳນວນ 6 ຄົນ ເຊິ່ງພື້ນທີ່ແຜ່ລະບາດຢູ່ເມືອງບັງດາຄາ ຫ່າງຈາກນະຄອນຫລວງກິນຊາຊາ ຂອງສາທາລະນະລັດ ປະຊາທິປະໄຕ ກົງໂກ ປະມານ 1.000 ກິໂລແມັດ.
ທັງນີ້ ສາທາລະນະລັດ ປະຊາທິປະໄຕ ກົງໂກ ຕ້ອງຜະເຊີນກັບການລະບາດຈາກໄວຣັສອີໂບລາທີ່ກັບມາແຜ່ລະບາດອີກ ໂດຍຕອນນີ້ພົບຜູ້ປ່ວຍອີໂບລາແລ້ວ 6 ຄົນ ໂດຍມີຜູ້ເສຍຊີວິດ 4 ຄົນ, ສ່ວນອີກ 2 ຄົນ ຍັງປິ່ນປົວຢູ່ໂຮງໝໍ.
ນອກຈາກນີ້ ມີລາຍງານວ່າ: ສາທາລະນະລັດ ປະຊາທິປະໄຕ ກົງໂກ ຕ້ອງຜະເຊີນກັບການແຜ່ລະບາດໄວຣັສໂຄໂຣນາສາຍພັນໃໝ່ (ໂຄວິດ-19) ປັດຈຸບັນນີ້ມີຜູ້ຕິດເຊື້ອສະສົມແລ້ວ 3.194 ຄົນ, ເສຍຊີວິດ 72 ຄົນ ແລະ ປິ່ນປົວຫາຍດີ 454 ຄົນ.
