ແຕ່ລະປີລາວມີຜູ້ເສຍຊີວິດຈາກອຸປະຕິເຫດ 1.000 ຄົນ
ຫົວໜ້າກົມຂົນສົ່ງ ກະຊວງ ໂຍທາທິການ ແລະ ຂົນສົ່ງ ໄດ້ໃຫ້ຮູ້ໃນພິທີມອບ-ຮັບອຸປະກອນຮັບໃຊ້ວຽກງານໂຄສະນາປູກຈິດສຳນຶກກ່ຽວກັບຄວາມປອດໄພທາງຫລວງ ໃຫ້ແກ່ພະແນກ ຍທຂ 9 ແຂວງພາກເໜືອ ໃນວັນທີ 2 ມິຖຸນາ 2020 ວ່າ: ສະພາບການເກີດອຸປະຕິເຫດຢູ່ ສປປ ລາວ ໃນປັດຈຸບັນ ແມ່ນຢູ່ໃນຂັ້ນໜັກໜ່ວງສົມຄວນ, ທົ່ວປະເທດມີພົນລະເມືອງ 7 ລ້ານກວ່າຄົນ, ມີຍານພາຫະນະ 2 ລ້ານກວ່າຄັນ, ໃນແຕ່ລະປີມີຜູ້ເສຍຊີວິດຈາກການເກີດອຸປະຕິເຫດທາງຫລວງ 1.000 ຄົນ ແລະ ມີຜູ້ບາດເຈັບຫລາຍກວ່າ 8.000 ຄົນຕໍ່ປີ, ມູນຄ່າການເສຍຫາຍຫລາຍກວ່າ 500 ລ້ານໂດລາສະຫະລັດ ເຊິ່ງເປັນການສູນເສຍທີ່ມີຜົນສະທ້ອນຕໍ່ການພັດນາເສດຖະກິດ-ສັງຄົມຂອງປະເທດຫລາຍທີ່ສຸດ.
ໄລຍະຜ່ານມາ ກົມຂົນສົ່ງໃນນາມພາກສ່ວນທີ່ເປັນແກນຫລັກໃນວຽກງານຄຸ້ມຄອງຄວາມປອດໄພທາງຫລວງໄດ້ປະສານສົມທົບກັບພາກສ່ວນທີ່ກ່ຽວຂ້ອງຕ່າງໆ ຫາວິທີຫລຸດຜ່ອນ ແລະ ສະກັດກັ້ນການເກີດອຸປະຕິເຫດ ລວມທັງການໂຄສະນາປູກຈິດສຳນຶກໃຫ້ແກ່ຜູ້ນຳໃຊ້ລົດ ນຳໃຊ້ເສັ້ນຖະໜົນໃຫ້ຮູ້ຈັກ ແລະ ເຄົາລົບກົດລະບຽບການຈະລາຈອນ ແລະ ເຫັນໄດ້ເຖິງຜົນກະທົບຈາກການເກີດອຸປະຕິເຫດຂອງຜູ້ທີ່ໄດ້ຮັບເຄາະຮ້າຍ ແຕ່ເນື່ອງຈາກໄລຍະຜ່ານມາ ພວກເຮົາຍັງຂາດເຂີນດ້ານວັດຖຸອຸປະກອນໃນການລົງເຮັດວຽກງານໂຄສະນາດັ່ງກ່າວ ຈຶ່ງເຮັດໃຫ້ວຽກງານໂຄສະນາບໍ່ທັນໄດ້ດີເທົ່າທີ່ຄວນ, ບໍ່ສາມາດດຶງດູດ ຄວາມສົນໃຈ ແລະ ສ້າງຄວາມເຂົ້າໃຈໃຫ້ແກ່ຜູ້ຮັບຟັງ ທັງຍັງບໍ່ທັນລົງເລິກ ແລະ ທົ່ວເຖິງທຸກພາກສ່ວນຮາກຖານການຜະລິດທີ່ຢູ່ເຂດຫ່າງໄກສອກຫລີກ.
