ລັດຖະບານຊີ້ແຈງເພີ່ມ ລາຍຈ່າຍບ້ວງແຮສຸກເສີນ 30 ຕື້ກີບ ທີ່ນໍາໃຊ້ເຂົ້າໃນວຽກງານຕ້ານໂຄວິດ-19
ໃນໂອກາດເຂົ້າຮ່ວມຖະແຫລງຂ່າວກ່ຽວກັບສະພາບການລະບາດຂອງພະຍາດໂຄວິດ-19 ຢູ່ລາວ ໃນວັນທີ 1 ມິຖຸນາ 2020, ທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ ໄດ້ລາຍງານກ່ຽວກັບການຈັດຕັ້ງປະຕິບັດງົບປະມານບ້ວງແຮສຸກເສີນຂອງລັດຖະບານ ບ້ວງ 30 ຕື້ກີບ ທີ່ນໍາໃຊ້ເຂົ້າໃນວຽກງານຕ້ານໂຄວິດ-19 ເພື່ອໃຫ້ສັງຄົມໄດ້ຮັບຮູ້ຢ່າງໂປ່ງໃສ.
ທ່ານ ບຸນໂຈມ ອຸບົນປະເສີດ ໃຫ້ຮູ້ວ່າ: ໃນໄລຍະການຈັດຕັ້ງປະຕິບັດມາດຕະການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ນີ້, ລັດຖະບານອະນຸມັດເງິນແຮສຸກເສີນ ຈຳນວນ 2 ຄັ້ງຄື: ຄັ້ງທີ 1 ຈໍານວນ 10 ຕື້ກີບ ເພື່ອນໍາໃຊ້ເຂົ້າໃນການຈັດຊື້ອຸປະກອນການແພດ, ຜ້າອັດປາກ-ດັງ, ເຄື່ອງເຄມີ, ເຈວລ້າງມື, ຄ່າຫຸ້ມຫໍ່ ແລະ ການຈັດສົ່ງອຸປະກອນການແພດ ຈໍານວນ 6,64 ຕື້ກີບ ເພື່ອຮັບໃຊ້ໃນວຽກງານສາທາລະນະສຸກ; ຈ່າຍລ່ວງໜ້າໃຫ້ກະຊວງສາທາລະນະສຸກ ເພື່ອເບີກຈ່າຍວຽກງານຈໍາເປັນ ແລະ ຮີບດ່ວນ ຈໍານວນ 100 ລ້ານກີບ ແລະ ຍອດເງິນອະນຸມັດຄັ້ງທີ 1 ຍັງເຫລືອ 3,25 ຕື້ກີບ.
ສ່ວນຄັ້ງທີ 2 ລັດຖະບານໄດ້ອະນຸມັດ ຈໍານວນ 20 ຕື້ກີບ ໂດຍໃຊ້ຈ່າຍລະອຽດດັ່ງນີ້: ຈ່າຍຄັ້ງທີ 1 ໃຫ້ນະຄອນຫລວງວຽງຈັນ ແລະ ບັນດາແຂວງໃນທົ່ວປະເທດ ຈໍານວນ 9 ຕື້ກີບ (ແຂວງລະ 500 ລ້ານກີບ), ຈ່າຍໃຫ້ກະຊວງປ້ອງກັນຄວາມສະຫງົບ ຈໍານວນ 500 ລ້ານກີບ; ຈ່າຍຄັ້ງທີ 2 ໃຫ້ນະຄອນຫລວງວຽງຈັນ ແລະ ບັນດາແຂວງໃນຂອບເຂດທົ່ວປະເດທ 6,9 ຕື້ກີບ, ຈ່າຍຊ່ວຍໜູນໃຫ້ນັກສຶກສາລາວຢູ່ເມືອງອູ່ຮັນ ສປ ຈີນ ຈໍານວນ 154 ລ້ານກີບ, ຈ່າຍຮັບໃຊ້ຊ່ຽວຊານແພດຈີນໄປເຄື່ອນໄຫວວຽກຢູ່ທ້ອງຖິ່ນ ຈໍານວນ 10 ລ້ານກີບ ເຊິ່ງຍອດເຫລືອຈາກການອະນຸມັດຄັ້ງທີ 2 ຈໍານວນ 3,4 ຕື້ກີບ. ລວມແລ້ວຍອດຍັງເຫລືອທັງໝົດຈາກການອະນຸມັດງົບປະມານທັງຄັ້ງທີ 1 ແລະ ຄັ້ງທີ 2 ຈໍານວນ 6,65 ຕື້ກີບ.
