ອາເມລິກາ ປະກາດເຄີຟິວໃນຫລາຍເມືອງ ເພື່ອຄວບຄຸມຜູ້ຊຸມນຸມປະທ້ວງ
ທາງການອາເມລິກາປະກາດເຄີຟິວໃນຫລາຍເມືອງຂອງປະເທດ ໃນຄວາມພະຍາຍາມຈະຢຸດເຫດຈະລາຈົນຮຸນແຮງ ທີ່ມີສາເຫດມາຈາກການເສຍຊີວິດຂອງທ້າວ ຈອດ ຟລອຍ ຜູ້ຊາຍຜິວດຳໃນລະຫວ່າງທີ່ລາວຖືກຈັບກຸມໂດຍເຈົ້າໜ້າທີ່ຕຳຫລວດ.
ການຊຸມນຸມປະທ້ວງໂດຍສັນຕິກາຍເປັນເຫດຄວາມຮຸນແຮງໃນຫລາຍພື້ນທີ່ຢູ່ອາເມລິກາ, ລົດຍົນ, ອາຄານສະຖານທີ່ຖືກໄຟໄໝ້. ຂະນະທີ່ຕຳຫລວດປາບຈະລາຈົນຕອບໂຕ້ໂດຍການໃຊ້ແກັສນ້ຳຕາ ແລະ ລູກປືນຢາງເພື່ອຄວບຄຸມສະຖານະການ.
ສຳລັບສາເຫດເກີດຂຶ້ນຈາກການເສຍຊີວິດຂອງທ້າວ ຈອດ ຟລອຍ ຜູ້ຊາຍຜິວດຳ ຂະນະຖືກຕຳຫລວດເມືອງມິນນີແອໂປລິສຈັບກຸມຈາກຂໍ້ກ່າວຫາພະຍາຍາມໃຊ້ທະນະບັດປອມໃນຮ້ານຄ້າ, ວີດີໂອບັນທຶກເຫດການສະແດງໃຫ້ເຫັນວ່າລາວຖືກເຈົ້າໜ້າທີ່ຕຳຫລວດຜິວຂາວໃຊ້ເຂົ່າກົດທັບລຳຄໍລາວລົງກັບພື້ນຖະໜົນ.
ຫລ້າສຸດເຈົ້າໜ້າທີ່ຄົນດັ່ງກ່າວທີ່ເປັນພຽງ “ອະດີດຕຳຫລວດ” ທ້າວ ເດເຣັດ ເຊົາວິນ ຈະຖືກຕັ້ງຂໍ້ຫາຄາດຕະກຳ ແລະ ມີກຳນົດຂຶ້ນສານວັນທີ 8 ມິຖຸນານີ້, ແຕ່ການປະທ້ວງໄດ້ຂະຫຍາຍວົງກວ້າງໄປທົ່ວປະເທດ ແລະ ບາງພື້ນທີ່ຮຸນແຮງເຖິງຂັ້ນເກີດເຫດຈະລາຈົນ.
ໜຶ່ງໃນເມືອງທີ່ໄດ້ຮັບຜົນກະທົບຈາກເຫດປັ່ນປ່ວນຫລາຍທີ່ສຸດຄື ນະຄອນລອສແອນເຈລີສ ເຮັດໃຫ້ເຈົ້າຄອງລັດແຄລິຟໍເນຍປະກາດສະຖານະການສຸກເສີນ ແລະ ເປີດໂອກາດໃຫ້ກອງກຳລັງພິທັກຊາດອອກມາຄວບຄຸມສະຖານະການ. ນອກຈາກນີ້ ຍັງມີປະກາດເຄີຟິວທົ່ວເມືອງ ເລີ່ມແຕ່ເວລາ 20:00-05:30 ໂມງ. ມີລາຍງານວ່າຮ້ານຄ້າຈຳນວນຫລາຍຖືກປຸ້ນສະດົມ.
ນອກຈາກນີ້ ຍັງມີການຈູດທຳລາຍສິ່ງຂອງຈຳນວນຫລາຍ ແລະ ມີການປະທະກັນລະຫວ່າງເຈົ້າໜ້າທີ່ຕຳຫລວດ ແລະ ກຸ່ມຜູ້ຊຸມນຸມ ໂດຍເຈົ້າໜ້າທີ່ຍິງລູກປືນຢາງເພື່ອຄວບຄຸມສະຖານະການ. ເຫດການດັ່ງກ່າວເປັນເຫດຮຸນແຮງທີ່ສຸດນັບແຕ່ປີ 1992 ທີ່ມີສາເຫດຄວາມຮຸນແຮງຈາກເຫດຕຳຫລວດທຳຮ້າຍທ້າວ ຣອດນີ ຄິງ.
ສ່ວນຢູ່ນະຄອນນິວຢອກ ມີວີດີໂອເຜີຍແຜ່ໃຫ້ເຫັນລົດຕຳຫລວດຄັນໜຶ່ງແລ່ນຝ່າເຂົ້າໄປໃນກຸ່ມຜູ້ຊຸມນຸມ.
ສຳລັບນະຄອນຊິຄາໂກ ເຈົ້າຄອງນະຄອນປະກາດເຄີຟິວເຊັ່ນກັນ ໂດຍເລີ່ມມີຜົນນັບແຕ່ເວລາ 21:00-06:00 ໂມງ ແລະ ຈະມີຜົນໄປຈົນກວ່າຈະມີການປະກາດປ່ຽນແປງ.
ຢູ່ເມືອງແອດແລນຕ້າ ກຸ່ມຜູ້ປະທ້ວງຍັງປັກຫລັກຢູ່ຕາມທ້ອງຖະໜົນ ເຖິງວ່າຈະມີການປະກາດເຄີຟິວແລ້ວ, ມີລາຍງານວ່າໄດ້ທຳລາຍອາຄານຕ່າງໆ ລວມທັງຍານພາຫະນະ. ໃນຂະນະທີ່ຜູ້ປະທ້ວງຫລາຍສິບຄົນຖືກຈັບກຸມ.
ຍັງມີອີກຫລາຍເມືອງທີ່ຖືກປະກາດເຄີຟິວ ປະກອບມີ ນະຄອນຫລວງວໍຊິງຕັນ ດີຊີ, ເມືອງຟິລາເດລເຟຍ, ເມືອງພອດແລນ ແລະ ເມືອງຫລຸຍສ໌ວິລ.
