ສິງກະໂປຈັບຄູ່ເຈລະຈາທ່ອງທ່ຽວປອດໄພ
ສິງກະໂປຈັບຄູ່ເຈລະຈາທ່ອງທ່ຽວປອດໄພ ເຊິ່ງຖືເປັນບັນຫາໃຫຍ່ທີ່ທຸກປະເທດຕ້ອງຄິດຕໍ່ ແລະ ສິງກະໂປຄິດ ແລະ ລົງມືແລ້ວ ເຖິງວ່າຍັງບໍ່ແມ່ນການເດີນທາງຂອງຄົນຈຳນວນຫລາຍກໍຕາມ.
ໃນໄລຍະທີ່ເສດຖະກິດທຸກປະເທດຊຸດໂຊມເພາະພະຍາດຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ການຈະຟື້ນຕົວໄດ້ໂດຍໄວຕ້ອງອາໄສການທ່ອງທ່ຽວ, ພາກສ່ວນທີ່ສ້າງເງິນໄດ້ຫລາຍໃຊ້ເງິນລົງທຶນໜ້ອຍ ແຕ່ຈະທ່ອງທ່ຽວແນວໃດໃຫ້ປອດໄພຖືເປັນບັນຫາໃຫຍ່ທີ່ທຸກປະເທດຕ້ອງຄິດຕໍ່ ເຊິ່ງສິງກະໂປຄິດ ແລະ ລົງມືແລ້ວ ເຖິງວ່າຍັງບໍ່ແມ່ນການເດີນທາງຂອງຄົນຈຳນວນຫລາຍກໍຕາມ.
ທ່ານ ຊານ ຊຸນຊິງ ລັດຖະມົນຕີກະຊວງການຄ້າ ແລະ ອຸດສາຫະກຳສິງກະໂປ ກ່າວໃນວັນທີ 30 ພຶດສະພາວ່າ: ສິງກະໂປກຳລັງເຈລະຈາກັບ ສ.ເກົາຫລີ, ອົດສະຕຣາລີ, ນິວຊີແລນ ແລະ ມາເລເຊຍ ກຽມຕັ້ງເສັ້ນທາງປອດໄພ (ກຣີນແລນ) ເພື່ອການທ່ອງທ່ຽວທ່າມກາງໂຄວິດ-19. ຂະນະທີ່ຈີນເປັນປະເທດທຳອິດທີ່ປະຕິບັດກຣີນແລນກັບສິງກະໂປໃນວັນທີ 29 ພຶດສະພາ.
ການເຈລະຈາດັ່ງກ່າວເປີດຊ່ອງທາງໃຫ້ມີການຕິດຕໍ່ ແລະ ອຳນວຍຄວາມສະດວກໃຫ້ແກ່ທຸລະກິດ ແລະ ເດີນທາງຕິດຕໍ່ພົວພັນລະຫວ່າງກັນໃນໄລຍະສັ້ນ ໂດຍຕ້ອງຂຶ້ນກັບຄວາມປອດໄພຕໍ່ໄວຣັສໃນແຕ່ລະປະເທດ.
ທ່ານ ຊານ ລະບຸວ່າ: ການຈະພິຈາລະນາວ່າຈະເຮັດຂໍ້ຕົກລົງກຣີນແລນກັບປະເທດໃດ ຕ້ອງເບິ່ງຫລາຍປັດໄຈ.
ທັງນີ້ ເພາະນອກຈາກນັກເດີນທາງຕ້ອງກວດຫາເຊື້ອ 2 ຄັ້ງແລ້ວ ຍັງຕ້ອງຖືກກັກຕົວອີກເກືອບເດືອນ ເພື່ອເດີນທາງຈາກປະເທດໜຶ່ງໄປອີກປະເທດໜຶ່ງ. ປັດຈຸບັນ ການເຮັດຂໍ້ຕົກລົງກຣີນແລນໃຫ້ໄດ້ຜົນ ເລີ່ມຕົ້ນທັງສອງປະເທດຈະຕ້ອງເຊື່ອໝັ້ນໃນການເບິ່ງແຍງຂອງກັນ ແລະ ກັນກ່ອນ, ຈາກນັ້ນຈຶ່ງຄ່ອຍປະສານຄຳສັ່ງກັກຕົວທີ່ນັກເດີນທາງກວດຫາເຊື້ອ ຫລື ກັກຕົວພຽງຄັ້ງດຽວເທົ່ານັ້ນ. ນອກຈາກຫາລືກັນເລື່ອງລະບຽບທີ່ຈຳເປັນແລ້ວ ຍັງຕ້ອງເບິ່ງສະຖານະການສາທາລະນະສຸກໃນປະເທດວ່າເມື່ອໃດຈະເອົາລະບຽບເຫລົ່ານີ້ໄປໃຊ້ໄດ້ຢ່າງປອດໄພ.
ທ່ານ ຊານ ກ່າວອີກວ່າ: ສິງກະໂປຫາລືເລື່ອງຕັ້ງກຣີນແລນກັບນາໆປະເທດໃຫ້ຫລາຍທີ່ສຸດເທົ່າທີ່ຈະຫລາຍໄດ້ໃນເວລາດຽວກັນ ເປັນການຫາລືລະດັບທະວີພາຄີບໍ່ແມ່ນພະຫຸພາຄີ.
ສ່ວນສະຖານະການການແຜ່ລະບາດຢູ່ສິງກະໂປ ຂໍ້ມູນຈາກກະຊວງສາທາລະນະສຸກໃນຕອນທ່ຽງວັນທີ 30 ພຶດສະພາ ມີຜູ້ຕິດເຊື້ອໃໝ່ 506 ຄົນ ສົ່ງຜົນໃຫ້ຜູ້ຕິດເຊື້ອສະສົມທົ່ວປະເທດລວມ 34.366 ຄົນ ໃນບັນດາຜູ້ຕິດເຊື້ອໃໝ່ເປັນການຕິດເຊື້ອໃນຊຸມຊົນ 5 ຄົນ ເປັນຄົນສິງກະໂປ 1 ຄົນ, ຜູ້ມີຖິ່ນອາໄສຖາວອນ 1 ຄົນ, ຜູ້ມີໃບອະນຸຍາດເຮັດວຽກສຳລັບແຮງງານໄຮ້ຝີມື 2 ຄົນ, ເຫລືອອີກ 1 ຄົນ ເປັນຜູ້ມີໃບອະນຸຍາດເຮັດວຽກ.
