ສາເຫດເຮັດໃຫ້ຢາກນອນຫລັງຈາກກິນອີ່ມ

ຫລາຍໆຄົນມັກຈະຮູ້ສຶກອ່ອນເພຍ ແລະ ຢາກນອນແທ້ໆຫລັງຈາກທີ່ກິນເຂົ້າອີ່ມມາແລ້ວ ເຊິ່ງມື້ນີ້ພວກເຮົາມີຄວາມຮູ້ກ່ຽວ ກັບເລື່ອງນີ້ມາແນະນຳທ່ານ.

ສາເຫດທີ່ເຮົາຮູ້ສຶກຢາກນອນຫລັງຈາກກິນເຂົ້າອີ່ມມາແລ້ວນັ້ນ ກໍຍ້ອນວ່າຂະບວນການສັ່ງວຽກໃນສະໝອງເຮັດວຽກຊ້າລົງ ແລະ  ຈຳນວນເລືອດທີ່ໄປລ້ຽງສະໝອງກໍມີຈຳນວນຫລຸດລົງ ເຊິ່ງເປັນແນວນັ້ນກໍຍ້ອນວ່າເລືອດຈຳນວນຫລາຍ ແລະ ລະບົບສັ່ງວຽກໃນສະໝອງຖືກນຳໄປໃຊ້ໃນຂະບວນການຍ່ອຍອາຫານ ເມື່ອເຮົາກິນອາຫານ ລະບົບສະໝອງກໍຈະເລີ່ມເຮັດວຽກ ແລະ ດຶງເລືອດຈາກພາກສ່ວນຕ່າງໆຂອງຮ່າງກາຍມາຊ່ວຍຍ່ອຍອາຫານ ຈຶ່ງເຮັດໃຫ້ຂະບວນການສັ່ງວຽກໃນສະໝອງເຮັດວຽກຊ້າລົງ.

ເມື່ອສະໝອງເຮັດວຽກຊ້າລົງເຮົາຈຶ່ງຮູ້ສຶກອ່ອນເພຍ ແລະ ຢາກນອນ, ຄວາມຈິງແລ້ວການນອນໃນຕອນກາງເວັນ ຫລື ການເຊືອບຫລັບນັ້ນກໍມີປະໂຫຍດດີໆຕໍ່ຮ່າງກາຍຄືກັນ, ໃຊ້ເວລາເຊືອບຫລັບ ປະມານ 15 – 30 ນາທີ ຈະເຮັດໃຫ້ຮ່າງກາຍຮູ້ສຶກສົດຊື່ນຫ້າວຫັນຫລາຍຂຶ້ນ ແລະ ສະໝອງຈະຈື່ຈຳສິ່ງຕ່າງໆໄດ້ດີຂຶ້ນນຳ.

ແນວໃດກໍຕາມ, ເມື່ອເຮົາກິນອາຫານອີ່ມ ເຮົາກໍຍັງບໍ່ຄວນນອນທັນທີ ຄວນຈະນັ່ງພັກເພື່ອໃຫ້ລະບົບຍ່ອຍອາຫານໄດ້ເຮັດວຽກເຕັມທີ່ກ່ອນປະມານ 30 ນາທີ ແລະ ຄວນນອນຫລັບພັກຜ່ອນໃຫ້ພຽງພໍມື້ລະ 6 – 8 ຊົ່ວໂມງ ພຽງເທົ່ານີ້ຮ່າງກາຍຂອງເຮົາກໍຈະມີສຸຂະພາບທີ່ດີ ຫ່າງໄກຈາກຄວາມເຈັບປ່ວຍ ແລະ ຮອຍຫ່ຽວຈາກອາຍຸທີ່ເພີ່ມຂຶ້ນໄດ້ແລ້ວ.