ສານຂອງທ່ານ ນາຍົກລັດຖະມົນຕີ ເນື່ອງໃນໂອກາດ ວັນເດັກນ້ອຍສາກົນ 1 ມິຖຸນາ 2020
ເນື່ອງໃນໂອກາດວັນເດັກນ້ອຍສາກົນ ວັນທີ 1 ມິຖຸນາ ໄດ້ຫມູນວຽນມາບັນຈົບຄົບຮອບອີກວາລະຫນຶ່ງ, ຕາງຫນ້າໃຫ້ການນໍາພັກ-ລັດ ແລະ ໃນນາມສ່ວນຕົວ, ຂ້າພະເຈົ້າຂໍຝາກຄວາມຮັກແພງ ແລະ ຄວາມຢ້ຽມຢາມຖາມຂ່າວອັນອົບອຸ່ນມາຍັງພວກລູກໆຫຼານໆ ທີ່ເປັນອານຸຊົນ ແລະ ເຍົາວະຊົນໃນທົ່ວປະເທດ ແລະ ຂໍອວຍພອນ ບັນດາລູກຫຼານ ຈົ່ງມີສຸຂະພາບເຂັ້ມແຂງ, ມີຄວາມເບີກບານ ມ່ວນຊື່ນ ໃນການສະຫຼອງວັນເດັກນ້ອຍສາກົນ ໃນໂອກາດນີ້ດ້ວຍ.
ການສະເຫຼີມສະຫຼອງວັນເດັກນ້ອຍສາກົນ ໃນທຸກໆປີ ແມ່ນປຽບດັ່ງບຸນໃຫຍ່ຂອງເດັກນ້ອຍ ໃນທົ່ວໂລກ ກໍ່ຄືເດັກນ້ອຍລາວ ແຕ່ການສະເຫຼີມສະຫຼອງປີນີ້ ແມ່ນມີຄວາມແຕກຕ່າງຈາກທຸກໆປີ ຜ່ານມາ ຈະບໍ່ໄດ້ມີການສະເຫຼີມສະຫຼອງໃຫຍ່ ແລະ ເຕົ້າໂຮມເດັກ ເປັນຈໍານວນຫຼາຍ ເພື່ອດໍາເນີນ ກິດຈະກໍາຕ່າງໆ ທີ່ຕິດພັນກັບການປູກຕົ້ນໄມ້ແຫ່ງຊາດ ເນື່ອງຈາກພວກເຮົາທັງຫຼາຍ ຍັງຢູ່ໃນໄລຍະ ແຫ່ງການປ້ອງກັນ, ຄວບຄຸມ ການແຜ່ລະບາດ ຂອງພະຍາດອັກເສບປອດສາຍພັນໃຫມ່ (COVID19) ທີ່ກໍາລັງເປັນໄພຄຸກຄາມ ຕໍ່ຊີວິດ ກໍຄືຕໍ່ສຸຂະພາບຂອງຊາວໂລກ ຢ່າງກວ້າງຂວາງ, ລວມທັງ ຕໍ່ລາວເຮົາອີກດ້ວຍ.
ນັບແຕ່ຕົ້ນປີ 2020 ມານີ້ ປະເທດເຮົາ ໄດ້ຮັບຜົນກະທົບຈາກການແຜ່ລະບາດຂອງພະຍາດ ໂຄວິດ-19 ອັນໄດ້ສ້າງຜົນກະທົບອັນໃຫຍ່ຫຼວງ ຕໍ່ຊີວິດການເປັນຢູ່ຂອງພໍ່ແມ່ປະຊາຊົນ, ລວມທັງ ຕໍ່ສຸຂະພາບ ແລະ ການຮຽນ ຂອງນັກຮຽນລາວເຮົາ ໃນລະບົບຂອງການຮຽນ-ການສອນ ໃນທົ່ວ ປະເທດ, ຕໍ່ສະພາບການດັ່ງກ່າວ, ລັດຖະບານ ໄດ້ເອົາໃຈໃສ່ປະຕິບັດມາດຕະການປ້ອງກັນ, ຄວບຄຸມ ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດ COVID-19 ຢ່າງເຄັ່ງຄັດ, ທີ່ແນໃສ່ປ້ອງກັນ ສຸຂະພາບ ແລະ ຊີວິດຂອງປະຊາຊົນ ເວົ້າລວມ, ໂດຍສະເພາະ ປົກປ້ອງເດັກນ້ອຍລາວບັນດາເຜົ່າ ທີ່ເປັນອະນາຄົດຂອງປະເທດຊາດ. ມາຮອດມື້ນີ້ ລັດຖະບານເຫັນວ່າ ການຄວບຄຸມພະຍາດລະບາດ COVID-19 ນັ້ນ ກໍ່ຄ່ອຍໆຜ່ອນຄາຍລົງແດ່ແລ້ວ, ດັ່ງນັ້ນ ຈຶ່ງມີຄໍາແນະນໍາຜ່ອນຜັນອອກມາຕື່ມ ຊຶ່ງນັບແຕ່ວັນທີ 2 ມີຖຸນາ ນີ້ ເປັນຕົ້ນໄປ ພວກລູກຫຼານຈໍານວນຫຼາຍ ຈະໄປເຂົ້າໂຮງຮຽນແລ້ວ. – ອີກດ້ານຫນຶ່ງ, ການສະເຫຼີມສະຫຼອງວັນເດັກສາກົນ ວັນທີ 01 ມິຖຸນາ ໃນປີນີ້ ໄດ້ຈັດຂື້ນໃນ ທ່າມກາງບັນຍາກາດທີ່ທົ່ວພັກ, ທົ່ວລັດ, ທົ່ວກອງທັບ ແລະ ທົ່ວປວງຊົນລາວທັງຊາດ ກໍາລັງສຸມໃສ່ ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກປະຊາຊົນ ປະຕິວັດລາວ ແລະ ຈັດຕັ້ງ ປະຕິບັດໄລຍະທ້າຍຂອງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII (2016-2020) ຢ່າງ ຕັ້ງຫນ້າ ແລະ ເປັນຂະບວນການຟົດຟື້ນ. ເມື່ອເວົ້າເຖິງວຽກງານການສົ່ງເສີມ, ການປົກປ້ອງເດັກ, ການຕ້ານສະກັດກັ້ນ ແລະ ແກ້ໄຂການໃຊ້ຄວາມຮຸນແຮງຕໍ່ເດັກນ້ອຍ ໃນຊຸມປີຜ່ານມານັ້ນ ໄດ້ມີຜົນ ສໍາເລັດຫຼາຍດ້ານ ອັນພົ້ນເດັ່ນ ແມ່ນການເຂົ້າຮ່ວມຂອງ ສປປ ລາວ ໃນໂອກາດວັນຄົບຮອບ 30 ປີ ຂອງສົນທິສັນຍາ ວ່າດ້ວຍສິດທິເດັກ (20 ພະຈິກ 1989-20 ພະຈິກ 2019) ແລະ ໃນເວທີສໍາຄັນ ຕ່າງໆ ເປັນຕົ້ນ ການນໍາພາຕົວແທນເດັກລາວ ເຂົ້າຮ່ວມເວທີສະພາສິດທິມະນຸດ ຂອງອົງການອົງການສະຫະປະຊາຊາດ, ທີ່ເມືອງ ເຈນນິວາ, ປະເທດສະວິດເຊີແລນ, ເວທີຄະນະກໍາມະການສິດທິເດັກ ທີ່ນິວຢອກ, ປະເທດສະຫະລັດອາເມລິກາ; ເວທີພາກພື້ນອາຊີ-ປາຊີຟິກ ແລະ ເວທີພາກພື້ນອາຊຽນ ເປັນຕົ້ນ. ສໍາລັບຢູ່ ສປປ ລາວ ພວກເຮົາ ແມ່ນໄດ້ຈັດກອງປະຊຸມລະດັບສູງ ໃນໂອກາດວັນຄົບຮອບ 30 ປີຂອງສົນທິສັນຍາ ວ່າດ້ວຍສິດທິເດັກ ແລະ ວັນຖະແຫຼງການ ວ່າດ້ວຍສິດທິເດັກ ຄົບຮອບ 60 ປີ ເພື່ອສະຫຼຸບຕີລາຄາຄືນ ຫມາກຜົນການຈັດຕັ້ງປະຕິບັດສົນທິສັນຍາສິດທິເດັກ ຕະຫຼອດ ໄລຍະ 30 ປີຜ່ານມາ ແລະ ກໍານົດທິດທາງການພັດທະນາເດັກນ້ອຍລາວ ບັນດາເຜົ່າ ລຸ້ນປີ 2030, ພ້ອມດຽວ ກັນນັ້ນ, ຫຼາຍພາກສ່ວນກໍ່ໄດ້ໃຫ້ຄວາມຫມາຍຫມັ້ນ ໃນການຈັດຕັ້ງປະຕິບັດສົນທິສັນຍາ ວ່າດ້ວຍສິດທິ ເດັກ ໂດຍການນໍາໃຊ້ກາລະໂອກາດ ພັດທະນາທ່າແຮງ ຂອງເດັກນ້ອຍລາວບັນດາເຜົ່າ ແຕ່ນີ້ຮອດປີ 2030 ແລະ ການບັນລຸເປົ້າຫມາຍການພັດທະນາແບບຍືນຍົງ.
ຕໍ່ຜົນສໍາເລັດຂ້າງເທິງນັ້ນ, ໃນນາມຕາງຫນ້າລັດຖະບານ, ຂ້າພະເຈົ້າ ຂໍສະແດງຄວາມຍ້ອງຍໍ ຊົມເຊີຍ ແລະ ສະແດງຄວາມຂອບໃຈ ຄະນະກໍາມາທິການເພື່ອຄວາມກ້າວຫນ້າຂອງແມ່ຍິງ ແລະ ແມ່-ເດັກທຸກຂັ້ນ, ອົງການຈັດຕັ້ງຂອງພັກ, ລັດ ແລະ ອົງການຈັດຕັ້ງມະຫາຊົນ ຂັ້ນສູນກາງ ແລະ ທ້ອງຖິ່ນ, ອົງການຈັດຕັ້ງສາກົນ, ພາກສ່ວນທຸລະກິດເອກະຊົນ ຕະຫຼອດຮອດຮອດພໍ່ແມ່ປະຊາຊົນ ລາວ ລວມທັງເດັກນ້ອຍລາວ ໃນທົ່ວປະເທດ ທີ່ໄດ້ສະຫນັບສະຫນູນ ແລະ ປະກອບສ່ວນຢ່າງຕັ້ງຫນ້າ ຕໍ່ວຽກແມ່ ແລະ ເດັກ ທີ່ໄດ້ເຮັດໃຫ້ວຽກງານດັ່ງກ່າວ ໄດ້ຮັບການປັບປຸງດີຂຶ້ນ ແລະ ມີຜົນສໍາເລັດ ເປັນກ້າວໆມາ.
ເຖິງແມ່ນວ່າວຽກສິດທິເດັກ, ປົກປ້ອງເດັກ ແລະ ການພັດທະນາເດັກ ຈະມີຜົນສໍາເລັດຫຼາຍ ດ້ານກໍຕາມ ແຕ່ພວກເຮົາ ຍັງປະເຊີນຫນ້າກັບສິ່ງທ້າທາຍຫຼາຍດ້ານ ໂດຍສະເພາະ ບັນຫາຄວາມທຸກ ຍາກຂາດເຂີນຂອງເດັກນ້ອຍບັນດາເຜົ່າໃນຫຼາຍດ້ານ, ບັນຫາຂາດໂພຊະນາການ, ພາວະເດັກຂາດສານ ອາຫານ, ອັດຕາການເຂົ້າຮຽນໃນພາກການສຶກສາກ່ອນໄວຮຽນ ແລະ ການສຶກສາພາກບັງຄັບ, ການນໍາ ໃຊ້ສື່ສັງຄົມອອນລາຍຂອງເດັກ, ບັນຫາຢາເສບຕິດ, ບັນຫາການຄ້າມະນຸດ ແລະ ບັນຫາອື່ນໆ ຍັງເປັນ ໄພຄຸກຄາມ ແລະ ຈໍາກັດການພັດທະນາຂອງເດັກຂອງພວກເຮົາ, ນອກຈາກນັ້ນ, ຄວາມຮັບຮູ້ ແລະ ຄວາມເຂົ້າໃຈໃນສັງຄົມ ແລະ ໃນບາງຊົນເຜົ່າ ໂດຍສະເພາະໃນເຂດທຸກຍາກ, ເຂດຫ່າງໄກສອກຫຼີກ ຍັງຍຶດຖືທັດສະນະຄະຕິແບບຄອງເດີມ ແລະ ປ່ຽນແປງໄປທາງກ້າວຫນ້າຊ້າ, ບັນຫາເຫຼົ່ານີ້ຈະຕ້ອງ ຮ່ວມແຮງຮ່ວມໃຈກັນ ແກ້ໄຂໃຫ້ນັບມື້ນັບຫຼຸດນ້ອຍຖອຍລົງ.
ໃນໂອກາດສະເຫຼີມສະຫຼອງວັນເດັກສາກົນ 1 ມິຖຸນານີ້, ໃນນາມລັດຖະບານ, ຂ້າພະເຈົ້າ ຂໍຮຽກຮ້ອງມາຍັງ ບັນດາອົງການການຈັດຕັ້ງຂອງພັກ-ລັດ, ແນວລາວສ້າງຊາດ, ອົງການຈັດຕັ້ງ ມະຫາຊົນ ແລະ ຫົວຫນ່ວຍທຸລະກິດທັງພາກລັດ ແລະ ເອກະຊົນ ຕະຫຼອດເຖິງປະຊາຊົນ ໃນຂອບ ເຂດທົ່ວປະເທດ ຈົ່ງຍົກສູງຄວາມຮັບຜິດຊອບຂອງຕົນ ແລະ ເພີ່ມທະວີອອກແຮງປະຕິບັດວຽກງານ ແມ່ ແລະ ເດັກ ແລະ ແກ້ໄຂບັນຫາ, ສິ່ງທ້າທາຍ ແລະ ຂໍ້ຄົງຄ້າງໃນປະຈຸບັນ ກໍ່ຄືການດູແລເອົາໃຈໃສ່, ການປົກປ້ອງ, ການພັດທະນາ ແລະ ການມີສ່ວນຮ່ວມຮອບດ້ານ ເພື່ອສ້າງເງື່ອນໄຂ ແລະ ໂອກາດໃຫ້ເດັກໄດ້ຮັບການພັດທະນາ ແລະ ມີອະນາຄົດ ທີ່ສົດໃສ ກ້າວເປັນຜູ້ໃຫຍ່ທີ່ມີຄຸນນະພາບ, ເປັນກໍາລັງຊັບພະຍາກອນມະນຸດ ທີ່ມີຄວາມເຂັ້ມແຂງຂອງຊາດ ເພື່ອສືບຕໍ່ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ຈະເລີນຮຸ່ງເຮືອງ.
ພ້ອມກັນນີ້, ໃນໄລຍະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດ ຂອງພະຍາດ COVID-19 ແລະ ການເຂົ້າຮຽນຄືນໃຫມ່ ໃນວັນທີ 2 ມິຖຸນານີ້, ຂ້າພະເຈົ້າ ຂໍຮຽກຮ້ອງມາຍັງກະຊວງສຶກສາທິການ ແລະ ກິລາ ແລະ ພາກສ່ວນທີ່ກ່ຽວຂ້ອງ ກໍ່ຄືໂຮງຮຽນ, ສະຖານບັນການສຶກສາຕ່າງໆ ໃຫ້ເອົາໃຈໃສ່ຮັບປະກັນຄຸນນະພາບຂອງການສຶກສາ ໃນທຸກຊັ້ນຮຽນ ເພື່ອທົດແທນໄລຍະປີດການຮຽນ-ການສອນ ໃນໄລຍະທີ່ມີການລະບາດຂອງພະຍາດ ແລະ ຈັດການ ສອບເສັງ ໃຫ້ທັນຕາມກໍານົດເວລາເປີດສົກຮຽນໃຫມ່, ເຂັ້ມງວດປະຕິບັດມາດຕະການສຸຂາອະນາໄມ, ຮັບປະກັນຄວາມປອດໄພຮອບດ້ານ ໃຫ້ລູກຫຼານຂອງພວກເຮົາ.
ໃຫ້ປະຊາຊົນ, ພະນັກງານ, ລັດຖະກອນ, ທະຫານ, ຕໍາຫຼວດ, ຄູ, ອາຈານ, ນັກຮຽນ, ນັກ ສຶກສາ ກໍ່ຄືທຸກພາກສ່ວນໃນສັງຄົມ ຖືເອົາໂອກາດ ແລະ ເຫດການເກີດຂຶ້ນ ຂອງການແຜ່ລະບາດ ຂອງ CoVID-19 ນີ້ ສ້າງໃຫ້ມີຄວາມຊິນເຄີຍ ຂອງການດໍາລົງຊີວິດ ຫຼື ສ້າງວິຖີຊີວິດປົກກະຕິ ແບບໃຫມ່ ໃຫ້ກາຍເປັນຊີວິດປະຈໍາວັນຕໍ່ໆໄປ. ເພື່ອເປັນການປ້ອງກັນຕົວເອງໃຫ້ດີ, ບໍ່ໃຫ້ປະຫມາດ ແລະ ມີຄວາມຮັບຜິດຊອບຕໍ່ຕົນເອງ, ຄອບຄົວ, ສັງຄົມ ແລະ ປະເທດຊາດ, ພ້ອມກັນປະຕິບັດ ບັນດາມາດຕະການປ້ອງກັນພະຍາດ COVID-19 ຢ່າງເຂັ້ມງວດ ຕໍ່ໄປ ເພື່ອບໍ່ໃຫ້ພະຍາດນີ້ ມາຄຸກ ຄາມຊີວິດ ຂອງປະຊາຊົນເຮົາ ແລະ ເດັກນ້ອຍ ທີ່ເຮົາຮັກ ແລະ ຫ່ວງໄຍ.
ໃນໂອກາດວັນເດັກສາກົນ ວັນທີ 01 ມິຖຸນາ ປີນີ້, ຂໍໃຫ້ເດັກລາວທຸກຄົນໃນຂອບເຂດທົ່ວ ປະເທດ ຈົ່ງມີສຸຂະພາບແຂງແຮງ, ເປັນເດັກຄໍາຮູ້ ຂອງພໍ່ແມ່, ເປັນນັກຮຽນດີ ຮຽນເກັ່ງຂອງຄູ, ອາຈານ ແລະ ເປັນລູກຫຼານທີ່ດີຂອງຊາດ.
