ໂຕໂຢລາວ ສົມແລ້ວກັບຄຳຂວັນລາວເຮັດລາວໃຊ້
ໂຕໂຢ ລາວ ເປັນຜະລິດຕະພັນໜຶ່ງທີ່ໄດ້ ຜະລິດຂຶ້ນຈາກໂຮງງານຢູ່ພາຍໃນປະເທດເຮົາຕັ້ງຢູ່ ຫລັກ 18 ຖະໜົນ 13 ໃຕ້, ບ້ານໂພຄໍາ ເມືອງໄຊທານີ ນະຄອນຫລວງວຽງຈັນ,ມາແຕ່ປີ 2016,ເປັນໂຮງງານອຸດສາຫະກຳທີ່ທັນສະໄຫມຂະໜາດກາງ ຊຶ່ງແຕ່ລະປີສາມາດຜະລິດ ຜະລິດຕະພັນຕ່າງໆອອກໄດ້ ປະມານ 50 ພັນໂຕນ. ປັດຈຸບັນໂຮງງານແຫ່ງນີ້ ສາມາດຕອບສະໜອງທໍ່ໂຕໂຢ, ທໍ່ພີວີຊີ, ເອັສດີພີອີ, ທໍ່ພີວີອາ, ແອວດີພີອີ ແລະ ອຸປະກອນລະບົບນຳປະປາ, ນຳ້ລິນ, ພ້ອມສາມາດຕອບສະໜອງທໍ່ຫຸ້ມສາຍໄຟຟ້າ, ສາຍໂທລະຄົມ ແລະ ທໍ່ໂຕໂຢສຳລັບການກະເສດຢ່າງຄົບວົງຈອນແລະ ມີຄຸນນະພາບ ໂດຍນຳໃຊ້ເມັດຢາງ ແລະ ວັດຖຸດິບສົດ100% ທີ່ນຳເຂົ້າຈາກຜູ້ສະໜອງທີ່ມີຊື່ສຽງໃນໂລກເຊັ່ນ: ຈາກຕາເວັນອອກກາງ, ສເກົາຫຼີ, ສິງກະໂປ, ໄຕ້ຫວັນ ແລະ ປະເທດໄທເປັນຕົ້ນ,ເພື່ອຮັບປະກັນຄຸນນະພາບ ໃຫ້ແກ່ຜູ້ຊົມໃຊ້ໄດ້ເປັນຢ່າງດີນັບແຕ່ ໂຄງການນ້ອຍ-ໃຫຍ່ຕ່າງໆໃນຂອບເຂດທົ່ວປະເທດ.
ທ່ານ ລັງກອນ ໄຊຍະວົງ ປະທານບໍລິິສັດ ດັ່ງກ່າວ ໃຫ້ຮູ້ວ່າ: ໂຮງງານຜະລິດທໍ່ ໂຕໂຢລາວ ມີເຄື່ອງໝາຍການຄ້າ TOYO,ໂດຍມີເປົ້າໝາຍໃນການຜະລິດທໍ່ຮູບແບບຕ່າງໆແລະ ເຄື່ອງໝາຍການຄ້າໃໝ່ຕື່ມອີກ ຄື ASIA GREEN BRAND ເປັນຜະລິດຕະພັນທີ່ມີຄຸນນະພາບສູງ, ເນັ້ນໃສ່ຕອບສະໜອງໃຫ້ແກ່ໂຄງການລະບົບນ້ຳສະອາດແລະ ເປັນມິດຕໍ່ສິ່ງແວດລ້ອມອອກມາຮັບໃຊ້ສັງຄົມ ດ້ວຍຄວາມພະຍາຍາມສູງ ສາມາດ ເຮັດໃຫ້ຜະລິດຕະພັນໂຮງງານໂຕໂຢລາວ ໄດ້ຮັບໃບຢັ້ງຢືນຄຸນນະພາບມາດຕະຖານສາກົນ ISO 9901:2015 ແລະ ມາດຕະຖານ ແຫ່ງຊາດລາວ ມລ.71:2019.
ທ່ານ ລັງກອນ ໄຊຍະວົງໃຫ້ຮູ້ອີກວ່າ: ໃນໄລຍະຜ່ານມາໂຮງງານໄດ້ຜະລິດທໍ່ນ້ຳຂະໜາດຕ່າງໆສະໜອງໃຫ້ແກ່ໂຄງການລະບົບນ້ຳປະປາ, ນ້ຳສະອາດ, ນ້ຳລິນ ແລະຂະແໜງການກະເສດໃນຂອບເຂດທົ່ວປະເທດຢ່າງມີຄຸນນະພາບ ແລະ ປັດຈຸບັນໂຮງງານ ພວມດຳເນີນການຜະລິດທໍ່ນ້ຳ ແລະ ອຸປະກອນຕ່າງໆໃຫ້ແກ່ໂຄງການກໍ່ສ້າງແລະ ຂະຫຍາຍລະບົບນ້ຳປະປາ ແລະ ສຸຂາພິບານ ເມືອງລະມາມ ແຂວງເຊກອງ,ຊຶ່ງໄດ້ຮ່ວມກັນລົງນາມໃນສັນຍາດັ່ງກ່າວແລ້ວເມື່ອວັນທີ 24 ກຸມພາຜ່ານມາ ແລະຄາດວ່າຈະໃຫ້ສຳເລັດພາຍໃນ 150 ວັນ, ຊຶ່ງມາຮອດປັດຈຸບັນມີຄວມຄືບຫນ້າແລ້ວເກືອບ 80% ແລະໄດ້ຮັບການກວດຜ່ານມາດຕະຖານຈາກເຈົ້າຂອງໂຄງການ ແລະວິຊາການກວດກາຄຸນນະພາບເມື່ອວັນທີ 10 ມີນາຜ່ານມານີ້, ເຊິ່ງຖືວ່າເປັນໂຄງການໜຶ່ງທີ່ມີຄວາມທ້າທາຍຕໍ່ໂຮງງານພວກເຮົາເປັນທີ່ສຸດ ແຕ່ດ້ວຍບົດຮຽນ ແລະ ປະສົບການຂອງໂຮງງານທີ່ມີມາ 4-5 ປີແລ້ວພວກເຮົາສາມາດຜ່ານຜ່າສິ່ງດັ່ງກ່າວໄປໄດ້ໂດຍດີ.
ນອກຈາກໂຮງງານການຜະລິດເພື່ອຕອບສະໜອງໃຫ້ໂຄງການຕ່າງໆໃນຂອບເຂດທົ່ວປະເທດແລ້ວ, ບັນດາຫ້າງຮ້ານທີ່ຈໍາໜ່າຍອຸປະກອນ ແລະ ທໍ່ນ້ຳຊະນິດຕ່າງໆກໍໄດ້ຫັນມາເປັນຕົວແທນຈຳໜ່າຍຜະລິດຕະພັນຂອງໂຮງງານ ໂຕໂຢລາວ ເພື່ອຮັບໃຊ້ສັງຄົມເປັນຈຳນວນຫລາຍ, ເຊິ່ງອັນນີ້ຖືວ່າເປັນຜົນຕອບຮັບທີ່ດີໃຫ້ແກ່ການພັດທະນາທຸລະກິດກໍຄືເສດຖະກິດຂອງຊາດໄດ້ເຕີບໃຫຍ່ຂະຫຍາຍຕົວ ພ້ອມເປັນສ່ວນໜຶ່ງໃນການ ສະໜັບສະໜູນໃຫ້ຄົນລາວເຮົາໄດ້ໃຊ້ຜະລິດຕະພັນທີ່ມີຄຸນນະພາບສົມກັບຄຳຂວັນທີວ່າ: ລາວເຮັດ ລາວໃຊ້ ລາວໄດ້ ລາວຈະເລີນ.
