ທົ່ວໂລກໃຫ້ຄວາມສຳຄັນກັບເດັກ ໂດຍກຳນົດໃຫ້ມີ 3 ວັນເດັກ
ປັດຈຸບັນໃນທົ່ວໂລກມີ 3 ວັນເດັກທີ່ໄດ້ຮັບການປະກາດຄື: ວັນເດັກສາກົນ (ວັນທີ 1 ມິຖຸນາ), ວັນເດັກຈັກກະວານ (20 ພະຈິກ) ຫລື ວັນເດັກໂລກ ແລະ ວັນເດັກແຫ່ງຊາດ (24 ທັນວາ).
ວັນເດັກສາກົນ ແມ່ນເຫດການພິເສດໜຶ່ງທີ່ມີຄວາມໝາຍ ແນໃສ່ບັນລຸໃຫ້ໄດ້ຈຸດປະສົງ ທັງປົກປ້ອງ ແລະ ສັນລະເສີນເດັກໃນທົ່ວໂລກ; ຍ້ອນເຫັນໄດ້ຄວາມສໍາຄັນຂອງເດັກທີ່ເປັນໜໍ່ແໜງແຫ່ງຊີວິດໃນມື້ນີ້ ເພື່ອກາຍເປັນອະນາຄົດອັນແຈ່ມໃສຂອງປະເທດຊາດໃນມື້ໜ້າ ບັນດາປະຊາຊາດໃນທົ່ວໂລກຈຶ່ງໄດ້ມີການສະເຫລີມສະຫລອງວັນເດັກສາກົນຕາມເງື່ອນໄຂຕົວຈິງຂອງປະເທດຕົນ.
ວັນເດັກສາກົນ ວັນທີ 1 ມິຖຸນາ ໄດ້ຮັບການສະເຫລີມສະຫລອງຢູ່ຫລາຍປະເທດທົ່ວໂລກເຊັ່ນ: ປະເທດອາກເມນີ, ອາແຊກບາຍຈານ, ບູນກາລີ, ອານບານີ, ອັງໂລກາ, ສປ ຈີນ, ສ.ເຊັກ, ຣັດເຊຍ ແລະ ບັນດາປະເທດອະດີດສະຫະພາບໂຊວຽດ, ເອກົວດໍ, ສະຫະພັນເຢຍລະມັນ (ສະຫລອງທັງ 1 ມິຖຸ ນາ ແລະ 20 ພະຈິກ), ສປປ ລາວ, ມຽນມາ, ມົງໂກລີ, ນີກາຣາກົວ, ເຢແມນ, ໂກໂຊໂວ, ປາກິດສະຖານ, ໂປໂລຍ, ກໍາປູເຈຍ, ປອກຕູການ, ກິນິ-ບິຊາວ, ຕີມໍແລສເຕ, ອັງໂກລາ, ໂມຊໍາບິກ, ຣູມານີ, ສະໂລວາກີ, ອູແກຣນ, ສສ.ຫວຽດນາມ ແລະ ອື່ນໆ. ເລີ່ມໃນປີ 1924 ເມື່ອກອງປະຊຸມສະມັດຊາໃຫຍ່ຂອງສັນນິບາດນາໆຊາດ, ໃນວັນທີ 16 ກັນຍາ 1924 ໄດ້ຮັບຮອງເອົາ “ຖະແຫລງການເຊີແນວ ກ່ຽວກັບສິດທິຂອງເດັກ” ເປັນຄັ້ງທໍາອິດ ຊຶ່ງໄດ້ປະກາດວ່າ: ເດັກມີຄວາມຕ້ອງການໃນການປ້ອງກັນ ແລະ ດູແລເບິ່ງແຍງເປັນພິເສດ ລວມທັງການປົກປ້ອງທີ່ເໝາະສົມທາງດ້ານກົດໝາຍກ່ອນເກີດ ແລະ ຫລັງເກີດ ຍ້ອນວ່າເດັກຍັງບໍ່ທັນມີວຸດທິພາວະທີ່ສົມບູນຄົບຖ້ວນທາງດ້ານຮ່າງກາຍ ແລະ ຈິດໃຈ. ໃນປີຕໍ່ມາກອງປະຊຸມໂລກຄັ້ງທໍາອິດ ເພື່ອຄວາມເປັນຢູ່ທີ່ດີຂອງເດັກໄດ້ຖືກຈັດຂຶ້ນຢູ່ເຊີແນວ ປະເທດສະວິດເຊີແລນ ໃນວັນທີ 1 ມິຖຸນາ 1925 ແລະ ກໍໄດ້ປະກາດເອົາວັນດັ່ງກ່າວເປັນວັນເດັກສາກົນ. ຕົກມາຮອດເດືອນພະຈິກ 1949 ກອງປະຊຸມໃຫຍ່ຂອງສະຫະພັນແມ່ຍິງປະຊາທິປະໄຕສາກົນ ທີ່ນະຄອນຫລວງມົດສະກູ ສະຫະພາບໂຊວຽດ ກໍໄດ້ປະກາດເອົາວັນທີ 1 ມິຖຸນາ ເປັນວັນເດັກສາກົນອີກເທື່ອໜຶ່ງ ຈຸດປະສົງກໍເພື່ອປົກປ້ອງເດັກ-ສັນລະເສີນເດັກ ແລະ ເລີ່ມຈັດຕັ້ງປະຕິບັດນັບແຕ່ປີ 1950 ເປັນຕົ້ນມາ. ການສະເຫລີມສະຫລອງວັນເດັກສາກົນ ປົກກະຕິປະກອບມີການອອກບົດປາໄສທີ່ກ່ຽວພັນເຖິງສິດທິ, ຄວາມເປັນຢູ່ທີ່ດີຂອງເດັກ ແລະ ການດໍາເນີນກິດຈະກໍາຕ່າງໆເພື່ອເດັກ.
ພ້ອມນີ້, ບັນດາປະເທດທີ່ສະເຫລີມສະຫລອງວັນເດັກຈັກກະວານ ຫລື ວັນເດັກໂລກ 20 ພະຈິກ ປະກອບມີ: ປະເທດການາດາ, ເອຢິບ, ແຟັງລັງ, ສະຫະພັນເຢຍລະມັນ, ອີກລັງ, ອິສະຣາແອລ, ປາກິດສະຖານ, ຊູແອັດ, ຕຣີນີດັດ ແລະ ໂຕບັກໂກ. ສ່ວນ ສປປ ລາວ ເຮົາ ກໍໄດ້ສະເຫລີມສະຫລອງວັນດັ່ງ ກ່າວເປັນປີທຳອິດ ໃນປີ 2018 ຜ່ານມາ ເຊິ່ງຖະແຫລງການກ່ຽວກັບສິດທິເດັກ ແລະ ສົນທິສັນຍາ ວ່າດ້ວຍສິດທິເດັກ ແມ່ນອີງໃສ່ຄວາມເຄົາລົບກົດບັດຂອງອົງການສະຫະປະຊາຊາດ ທີ່ຮັບຮູ້ວ່າມະນຸດທຸກຄົນ ລວມທັງເດັກລ້ວນແຕ່ມີກຽດສັກສີ ແລະ ມີສິດທິເທົ່າທຽມກັນ ຊຶ່ງບໍ່ສາມາດຕັດແຍກອອກຈາກກັນໄດ້.
ສຳລັບ ສປປ ລາວ ຂອງພວກເຮົາໄດ້ມີມູນເຊື້ອຈັດຕັ້ງປະຕິບັດສະເຫລີມສະຫລອງວັນເດັກສາກົນ (1 ມິຖຸນາ) ນັບແຕ່ສະໄໝຕໍ່ສູ້ກູ້ຊາດໃນເມື່ອກ່ອນຈົນເຖິງປັດຈຸບັນ ພາຍຫລັງມີການສະຖາປະນາ ສາທາ ລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975. ການສະເຫລີມສະຫລອງວັນເດັກສາກົນ (1 ມິຖຸນາ) ໃນແຕ່ລະປີເປັນໂອກາດອັນດີໃຫ້ພວກເຮົາໄດ້ທົບທວນຄືນການຈັດຕັ້ງປະຕິບັດແນວທາງນະໂຍບາຍຂອງພັກ, ນິຕິກຳຂອງລັດ ແລະ ແຜນພັດທະນາເສດຖະກິດ-ສັງຄົມໃນແຕ່ລະໄລຍະ ລວມທັງເປົ້າໝາຍການພັດທະນາແບບຍືນຍົງທີ່ພົວພັນເຖິງວຽກແມ່ ແລະ ເດັກ ກໍຄືສົນທິສັນຍາສາກົນ ແລະ ພາກພື້ນອາຊຽນກ່ຽວກັບເດັກທີ່ ສປປ ລາວ ເປັນພາຄີ ເປັນຕົ້ນສົນທິສັນຍາວ່າດ້ວຍສິດທິເດັກ ຈຸດປະສົງເພື່ອຮັບປະກັນການຢູ່ລອດ, ການພັດທະນາ, ການປົກປ້ອງ ແລະ ການມີສ່ວນຮ່ວມຂອງເດັກລາວບັນດາເຜົ່າໃຫ້ມີໄວເດັກທີ່ເຕັມໄປດ້ວຍຄວາມຜາສຸກ, ຄວາມອົບອຸ່ນ ແລະ ການດູແລເບິ່ງແຍງເປັນຢ່າງດີຈາກພໍ່-ແມ່, ຍາດຕິພີ່ນ້ອງໃນຄອບຄົວ, ສັງຄົມ ແລະ ການຈັດຕັ້ງທຸກຂັ້ນ.
