ບໍລິສັດລົດຍົນຫວຽດນາມປະກາດ ຜະລິດລົດໄຟຟ້າສົ່ງຂາຍ USA
ວິນຟາສ ບໍລິສັດຜູ້ຜະລິດລົດສັນຊາດຫວຽດນາມແຫ່ງທຳອິດຂອງປະເທດ ປະກາດແຜນເລີ່ມການຜະລິດລົດໄຟຟ້າຂະໜານໃຫຍ່ໃນປີໜ້າ ໂດຍມີເປົ້າໝາຍສົ່ງຂາຍໃນຕະຫລາດອາເມລິກາເປັນຫລັກ.
ສຳນັກຂ່າວຣອຍເຕີລາຍງານວ່າ: ວິນຟາສ ເຄືອຂ່າຍຂອງກຸ່ມທຸລະກິດຂະໜາດໃຫຍ່ສຸດຂອງຫວຽດນາມ ວິນກຣຸບ ເຈເອສຊີ ກ່າວໃນຖະແຫລງການວ່າ: ບໍລິສັດຈະໃຊ້ແບັດເຕີຣີຜະລິດໂດຍບໍລິສັດ ແອລຈີ ເຄມ ຂອງ ສ.ເກົາຫລີ. ສຳລັບລົດໄຟຟ້າລຸ້ນທຳອິດຈະຜະລິດ ເຊິ່ງມີແຜນຈະເປີດຕົວໃນງານສະແດງລົດຍົນ ລອສແອນເຈລິສ ອໍໂຕ ໂຊ ໃນລັດແຄລິຟໍເນຍ ສະຫະລັດອາເມລິກາ ໃນເດືອນພະຈິກ 2020.
ລົດໄຟຟ້າລຸ້ນທຳອິດຂອງວິນຟາສ ເຊິ່ງຈະມີການທົດລອງໃນເດືອນມັງກອນ 2021 ແລະ ເລີ່ມການຜະລິດຈຳນວນຫລາຍໃນເດືອນກໍລະກົດປີດຽວກັນ ອອກແບບໂດຍທີມງານຂອງບໍລິສັດພິນິນຟາຣິນາແຫ່ງອິຕາລີ ສາມາດແລ່ນໄດ້ໄກເຖິງ 500 ກິໂລແມັດ ຕໍ່ການສາກແບັດເຕີຣີແຕ່ລະຄັ້ງ.
ວິນຟາສ ເຊິ່ງເລີ່ມຂາຍລົດເຊື້ອໄຟນ້ຳມັນລຸ້ນທຳອິດໃນປີຜ່ານມາ ຂາຍລົດໄດ້ 5.124 ຄັນ ໃນຕະຫລາດຫວຽດນາມ ໃນໄລຍະ 3 ເດືອນທຳອິດຂອງປີນີ້ ເຮັດໃຫ້ກາຍເປັນບໍລິສັດລົດຍົນຍອດຂາຍອັນດັບ 5 ໃນປະເທດ ເໜືອກວ່າຫລາຍຍີ່ຫໍ້ດັງ ລວມທັງ ມິດຊູບິຊິ, ມາສດ້າ ແລະ ຟອດ.
