ອິນເດຍຮ້ອນທີ່ສຸດໃນຮອບ 18 ປີ ແລະ ຖືກໄພພິບັດ 5 ຢ່າງພ້ອມກັນບາດດຽວ

ຄວາມຮ້ອນອົບເອົ້າຢູ່ອິນເດຍ. ພາບຈາກ: AFP.

ອິນເດຍ ກຳລັງໄດ້ຮັບຜົນກະທົບຢ່າງຮ້າຍໜັກຈາກມວນອາກາດຮ້ອນ ຢູ່ບາງຂົງເຂດ, ອຸນຫະພູມສູງເຖິງ 50 ອົງສາເຊ, ນອກຈາກນີ້ຍັງໄດ້ຮັບຜົນກະທົບຈາກການລະບາດຂອງພະຍາດໂຄວິດ, ໄພແຫ້ງແລ້ງ, ຝູງກະແຕນທຳລາຍເຄື່ອງປູກ ແລະ ໄພນໍ້າຖ້ວມ.

ສະຖານີພະຍາກອນອາກາດຂອງ ອິນເດຍ ໃນວັນທີ 26 ພຶດສະພານີ້ໃຫ້ຮູ້ວ່າ  ມວນອາກາດຮ້ອນໄດ້ເຜົາໄໝ້ຫຼາຍແຫ່ງຢູ່ທາງທິດເໜືອຂອງອິນເດຍ.

ໄພອາກາດຮ້ອນໄດ້ເປັນໄພຂົ່ມຂູ່ປະຊາຊົນອິນເດຍຢູ່ເປັນປະຈຳ, ໂດຍສະເພາະແມ່ນໄລຍະ ເດືອນ ພຶດສະພາຫາເດືອນມີຖຸນາ. ປີກາຍນີ້ກໍມີຜູ້ຄົນຕາຍຍ້ອນອາກາດຮ້ອນກໍຫຼາຍຄົນ.

ເຈົ້າໜ້າທີ່ສະຖານີ ອູຕຸນິຍົມຂອງອິນເດຍໃຫ້ຮູ້ວ່າ ເມືອງ Churu ໃນລັດ Rajasthan ທາງພາກເໜືອຂອງອິນເດຍ ເປັນເຂດທີ່ຮ້ອນທີ່ສຸດ, ຄວາມຮ້ອນສູງເຖິງ 50 ອົງສາເຊ ໃນວັນທີ 26 ພຶດສະພານີ້. ໃນຂະນະດຽວກັນມີບາງຂົງເຂດເຊັ່ນ: ລັດ Punjab, Haryana ແລະ Uttar Pradeshມີຄວາມຮ້ອນເຖິງ 40 ອົງສາເຊ.

ເຖິງຢ່າງໃດກໍດີ, ປັດຈຸບັນຍັງບໍ່ທັນມີລາຍງານຜູ້ເສຍຊີວິດ. ລັດຖະບານອິນເດຍໃຫ້ຮູ້ວ່າ ຄວາມຮ້ອນອົບເອົ້າໄດ້ເຮັດໃຫ້ຜູ້ຄົນເສຍຊີວິດເຖິງ 3.500 ຄົນໃນປີ 2015-2019 ຜ່ານມາ.

ຢູ່ບາງຂົງເຂດໃນນະຄອນຫຼວງ ນິວເດັນລີ  ແລະ ແຫ່ງອື່ນໆ ໄດ້ເກີດການສົກຕ່ອຍກັນເປັນເລື່ອງທຳມະດາ ເພາະຍາດນໍ້າກັນ. ອາກາດຮ້ອນໄດ້ຊໍ້າເຕີມອິນເດຍ ໃນເມື່ອກຳລັງຕໍ່ສູ້ກັບໂຄວິດ-19 ຢູ່ໃນຂະນະນີ້.

ອາທິດກ່ອນໜ້ານີ້, ພາຍຸ Amphan ໄດ້ເຮັດໃຫ້ມີຜູ້ຄົນເສຍຊີວິດເຖິງ 100 ຄົນ ແລະ ທຳລາຍຊັບສິນ ເຮືອນຊານຢ່າງຫຼວງຫຼາຍ.

ໃນຂະນະດຽວກັນ, ຝູງຕັກກະແຕນກໍໄດ້ທຳລາຍເຄື່ອງປູກຂອງຝັງໃນເນື້ອທີ່ 50.000 ເຮັກຕາ.

ສ່ວນລັດອື່ນໆ ເຊັ່ນ:  Assam ແລະ Meghalaya ທີ່ຢູ່ທາງພາກຕາເວັນອອກຂອງອິນເດຍ ກໍກຳລັງປະເຊີນກັບ ໄພນໍ້າຖ້ວມ ແລະ ມີຝົນຕົກໜັກ.

ຂ່າວ: ລູກເມືອງພວນ (ແຫຼ່ງຂ່າວ Zingnews.vn)