ນິວຊີແລນບໍ່ມີຜູ້ຕິດເຊື້ອໂຄວິດ ຢູ່ໂຮງໝໍແລ້ວ
ໂຮງໝໍນິວຊີແລນອະນຸຍາດໃຫ້ຜູ້ຕິດເຊື້ອໂຄວິດຄົນສຸດທ້າຍກັບບ້ານ ທົ່ວປະເທດເຫລືອຜູ້ຕິດເຊື້ອບໍ່ຮຸນແຮງພຽງ 8 ຄົນ, ບໍ່ພົບຜູ້ຕິດເຊື້ອໃໝ່ຕໍ່ເນື່ອງ 6 ວັນ.
ກະຊວງສາທາລະນະສຸກນິວຊີແລນ ຖະແຫລງວ່າ: ປັດຈຸບັນນີ້ນິວຊີແລນບໍ່ມີຜູ້ຕິດເຊື້ອໂຄວິດທີ່ເຂົ້າຮັບການປິ່ນປົວຢູ່ໂຮງໝໍແລ້ວ ຫລັງຈາກວັນທີ 27 ພຶດສະພາ ຜູ້ຕິດເຊື້ອໂຄວິດທີ່ເຂົ້າຮັບການປິ່ນປົວຢູ່ໂຮງໝໍຫາຍດີແລ້ວຈົນແພດອະນຸຍາດໃຫ້ກັບບ້ານໄດ້ ໂດຍນິວຊີແລນເຫລືອຜູ້ຕິດເຊື້ອທີ່ອາການບໍ່ຮຸນແຮງພຽງ 8 ຄົນ ທ່າມກາງທີ່ນິວຊີແລນບໍ່ພົບຜູ້ຕິດເຊື້ອໃໝ່ຕໍ່ເນື່ອງ 6 ວັນ.
ສົ່ງຜົນໃຫ້ນິວຊີແລນມີຜູ້ຕິດເຊື້ອທົ່ວປະເທດທັງໝົດ 1.504 ຄົນ ຈຳນວນນີ້ປິ່ນປົວຫາຍແລ້ວ 1.474 ຄົນ, ເສຍຊີວິດ 22 ຄົນ ໂດຍລະຫວ່າງກາງເດືອນມີນາຫາກາງເດືອນເມສາ ເປັນໄລຍະທີ່ຈຳນວນຜູ້ຕິດເຊື້ອແຕ່ລະວັນຂອງນິວຊີແລນເພີ່ມສູງສຸດ ບາງມື້ພົບຜູ້ຕິດເຊື້ອໃໝ່ເກືອບ 90 ຄົນ.
ທ່ານ ນາງ ຈາຊິນດາ ອາເດິນ ນາຍົກລັດຖະມົນຕີນິວເຊີແລນ ກ່າວໃນອາທິດຜ່ານມາ ເຖິງການຫລຸດປະກາດຄຳເຕືອນໄພພະຍາດລະບາດໃຫ້ເຫລືອລະດັບ 1 ເຊິ່ງເປັນລະດັບຕໍ່າສຸດໃນເດືອນໜ້າ ເຊິ່ງຈະມາພ້ອມກັບມາດຕະການຫລຸດຜ່ອນຕ່າງໆເພີ່ມຂຶ້ນ ໂດຍນິວຊີແລນ ແລະ ອົດສະຕຣາລີ ກຽມເປີດເສັ້ນທາງທ່ອງທ່ຽວປອດພະຍາດຮ່ວມກັນໃນເດືອນກໍລະກົດ ຫລັງທັງສອງປະເທດມີສະຖານະການໄວຣັສດີຂຶ້ນ.
