ຜູ້ຊ່ຽວຊານຍີ່ປຸ່ນເຕືອນ ຜ້າອັດປາກ-ດັງ ເປັນອັນຕະລາຍຕໍ່ເດັກອາຍຸຕໍ່າກວ່າ 2 ປີ
ສະມາຄົມໝໍປິ່ນປົວເດັກປະເທດຍີ່ປຸ່ນ ເຕືອນ ບໍ່ຄວນໃຫ້ເດັກອາຍຸຕໍ່າກວ່າ 2 ປີ ໃສ່ຜ້າອັດປາກ-ດັງ ເພາະເຮັດໃຫ້ຍາກຕໍ່ການສັງເກດອາການ ບໍ່ວ່າຈະເປັນການຫາຍໃຈ, ການສະແດງອອກ ຫລື ໜ້າປ່ຽນສີ.
ຜ້າອັດປາກ-ດັງ ກາຍເປັນໜຶ່ງໃນຄວາມປົກກະຕິໃໝ່ໃນຊ່ວງໂຄວິດ-19 ກຳລັງລະບາດ, ແຕ່ສະມາຄົມໝໍປິ່ນປົວເດັກປະເທດຍີ່ປຸ່ນ ອອກຄຳເຕືອນວ່າ: ບໍ່ຄວນໃຫ້ເດັກອາຍຸຕໍ່າກວ່າ 2 ປີ ໃສ່ຜ້າອັດປາກ-ດັງ ເພາະຈະຍາກແກ່ການສັງເກດອາການ ແລະ ສີໜ້າ.
“ເປັນໄປໄດ້ວ່າ: ຜ້າອັດປາກ-ດັງເຮັດໃຫ້ເດັກອ່ອນຫາຍໃຈຍາກຂຶ້ນ ແລະ ເພີ່ມຄວາມສ່ຽງເກີດພະຍາດລົມແດດ” ຄຳເຕືອນຈາກສະມາຄົມ.
ເດັກອ່ອນມີທາງເດີນອາກາດຫາຍໃຈແຄບ ຜ້າອັດປາກ-ດັງອາດເຮັດໃຫ້ຫາຍໃຈລຳບາກ, ເພີ່ມພາລະໃຫ້ປອດ. ນອກຈາກນີ້ ຍັງເພີ່ມຄວາມສ່ຽງສະໝັກ ຫລື ຫາຍໃຈບໍ່ອອກ ໂດຍສະເພາະຖ້າເດັກຮາກຂະນະໃສ່ຜ້າອັດປາກ.
ເດັກອ່ອນມີຄວາມສ່ຽງຕໍ່າຈະຕິດເຊື້ອໄວຣັສໂຄໂຣນາ ແລະ ສະມາຄົມໝໍປິ່ນປົວເດັກ ສະຫລຸບວ່າ: ຜ້າອັດປາກ-ດັງບໍ່ມີຄວາມຈຳເປັນຕໍ່ເດັກອາຍຸຕໍ່າກວ່າ 2 ປີ.
ປັດຈຸບັນ ຍີ່ປຸ່ນພົບຜູ້ຕິດເຊື້ອແລ້ວຫລາຍກວ່າ 16.600 ຄົນ ແລະ ມີຜູ້ເສຍຊີວິດປະມານ 850 ຄົນ.
ເຖິງຢ່າງໃດກໍຕາມ, ໃນວັນທີ 25 ພຶດສະພາຜ່ານມາ ຍີ່ປຸ່ນໄດ້ຍົກເລີກສະຖານະການສຸກເສີນທົ່ວປະເທດ ຫລັງປະກາດໃຊ້ມາເກືອບ 1 ເດືອນ, ແຕ່ມີການຂະຫຍາຍລາຍຊື່ປະເທດທີ່ຫ້າມເຂົ້າຍີ່ປຸ່ນເພີ່ມອີກ 11 ປະເທດ ລວມເປັນ 111 ປະເທດ ເຊິ່ງລວມທັງ ອາເມລິກາ, ອິນເດຍ, ອາຟຣິກາໃຕ້ ແລະ ໄທ. ຄົນຍີ່ປຸ່ນຍັງໄດ້ຮັບອະນຸຍາດໃຫ້ເຂົ້າປະເທດໄດ້, ແຕ່ຕ້ອງຜ່ານການກວດສຸຂະພາບ ແລະ ກັກກັນພະຍາດ 14 ວັນ.
