ທ່ຽວຫລວງນ້ຳທາ
ຫລວງນ້ຳທາຕັ້ງຢູ່ທາງທິດຕາເວັນຕົກສ່ຽງເໜືອຂອງປະເທດລາວ, ມີເນື້ອທີ່ທັງໝົດ 9000 ກວ່າກິໂລຕາແມັດ, ທິດຕາເວັນຕົກມີຊາຍແດນຕິດກັບປະເທດມຽນມາ ແລະ ທິດເໜືອຕິດກັບປະເທດຈີນ, ປະກອບມີ 5 ເມືອງຄື: ເມືອງຫລວງນ້ຳທາ, ເມືອງສິງ, ເມືອງລອງ, ເມືອງວຽງພູຄາ ແລະ ເມືອງນາແລ ເຊິ່ງມີປະຊາຊົນ ອາໄສຢູ່ປະມານ 2 ແສນຄົນ. ຖ້າທຽບກັບແຂວງອື່ນໆແລ້ວຫລວງນ້ຳທາເປັນແຂວງນ້ອຍແຕ່ເຕັມໄປດ້ວຍຊັບພະຍາກອນທຳມະຊາດ ແລະ ຊີວະນາໆພັນອັນອຸດົມສົມບູນໂດຍສະເພາະໃນເຂດປ່າສະຫງວນແຫ່ງຊາດນ້ຳຫ້າ ແລະ ເປັນແຂວງທຳອິດຂອງປະເທດເຮົາທີ່ໄດ້ທີ່ນຳເອົາຕົ້ນຢາງພາລາມາປູກ ເປັນແຮງຂັບເຄື່ອນ ການພັດທະນາເສດຖະກິດແຂວງຂະຫຍາຍຕົວຢ່າງຕໍ່ເນື່ອງ. ພ້ອມ ຍັງຊ່ວຍເພີ່ມຄວາມຂຽວສົດງົດງາມຢູ່ຕາມເປີ້ນພູ ຈົນສຸດສາຍຕາ ແລະ ໄດ້ກາຍເປັນສະເໜ່ຢ່າງໜຶ່ງຂອງການທ່ອງທ່ຽວໃນແຂວງດັ່ງກ່າວ.
+ ທ່ຽວແຂວງຫົວພັນໄປເບິ່ງຫັດຖະກຳຕ່ຳຫູກ-ບ້ານນາສາລາ
ຊົມປ່າສະຫງວນແຫ່ງຊາດນ້ຳຫ້າ ເປັນປ່າໄມ້ເຂດຮ້ອນຕັ້ງຢູ່ພາກຕາເວັນຕົກຂອງເມືອງຫລວງນ້ຳທາ, ທິດຕາເວັນອອກຂອງເມືອງສິງ ແລະ ທິດເໜືອຂອງເມືອງວຽງພູຄາ ເຊິ່ງມີເນື້ອທີ່ກວ້າງຂວາງເຖິງ 222.400 ເຮັກຕາ ແລະ ຢູ່ຫ່າງຈາກເທສະບານປະມານ 26 ກິໂລແມັດ. ປ່າສະຫງວນແຫ່ງຊາດດັ່ງກ່າວໄດ້ຮັບຂະໜານນາມວ່າເປັນມໍລະດົກອາຊຽນ, ຍ້ອນຄວນອຸດົມສົມບູນຂອງປ່າໄມ້ ແລະ ຊີວະນາໆພັນ ຫລາຍຊະນິດໃນນັ້ນສະເພາະເນື້ອທີ່ປ່າດົກໜາກວມ 30%, ປ່າດົງ 60% ແລະ ພື້ນທີ່ດິນກະສິກຳ 10% ພ້ອມທັງມີສັດປ່າລ້ຽງລູກດ້ວຍນ້ຳນົມ 38 ສາຍພັນ, ສັດປ່າທີ່ຫາຍາກຈຳນວນ 22 ສາຍພັນ ແລະ ນົກ 288 ສາຍພັນ. ໃນປີ 1999 ອົງການທ່ອງທ່ຽວແຫ່ງຊາດໄດ້ສົມທົບກັບຫ້ອງການທ່ອງທ່ຽວແຂວງໂດຍໄດ້ຮັບການສະໜັບສະໜູນທຶນຊ່ວຍເຫລືອລ້າຈາກປະເທດນິວຊີແລນເພື່ອພັດທະນາເຂດນີ້ກາຍເປັນ ເຂດທ່ອງທ່ຽວແບບອະນຸລັກປະຊາຊົນມີສ່ວນຮ່ວມໃນນາມໂຄງການທ່ອງທ່ຽວອະນຸລັກນ້ຳຫ້າ. ຜ່ານໄລຍະເວລາການພັດທະນາພຽງ 3 ປີ, ປ່າສະຫງວນແຫ່ງຊາດນ້ຳຫ້າ ໄດ້ກາຍເປັນແຫລ່ງທ່ອງທ່ຽວທີ່ມີຊື່ສຽງຈົນມາຮອດທຸກມື້ນີ້ ແລະ ໄດ້ກາຍເປັນຕົວແບບຂອງການພັດທະນາການທອ່ງທ່ຽວແບບທັດສະນະສຶກສາທີ່ຕິດພັນກັບການອະນຸລັກຢູ່ປະເທດເຮົາ.
