ຍິງສາວຊາວອິນເດຍຂີ່ລົດຖີບ 1.200 ກມ ພາພໍ່ກັບບ້ານ
ຍິງສາວພາພໍ່ເດີນທງໄກຈາກເມືອງໃຫຍ່ເພື່ອກັບບ້ານທ່າມກາງການລັອກດາວປະເທດ.
ນາງ ຊາໂຍຕີ ກຸມາຣີ (Jyoti Kumari) ຍິງສາວຊາວອິນເດຍ ອາຍຸ 15 ປີ ກາຍເປັນຂວັນໃຈຂອງຄົນທົ່ວປະເທດ ເມື່ອນາງຂີ່ລົດຖີບຂ້າມປະເທດເປັນໄລຍະທາງໄກເຖິງ 1.200 ກິໂລແມັດ ເປັນເວລາ 7 ວັນ ເພື່ອຈະໄປຮັບພໍ່ຂອງນາງກັບໄປບ້ານຂອງພວກເຂົາ.
ພໍ່ຂອງນາງເດີນທາງມາເຮັດວຽກຢູ່ຄຸຣຸຄຣາມ ເຊິ່ງເປັນເມືອງທີ່ຢູ່ນອກນະຄອນຫລວງນິວເດລີ ທາງຕອນເໜືອຂອງປະເທດ ແຕ່ຊີວິດຂອງລາວຕ້ອງພິກປີ້ນຫລັງຈາກປະສົບອຸປະຕິເຫດໃນຕົ້ນປີຜ່ານມາ ເຮັດໃຫ້ທຸກຍາກຕື່ມອີກ ບໍ່ສາມາດຈ່າຍຄ່າເຊົ່າເຮືອນເປັນເວລາສອງສາມເດືອນແລ້ວ, ເຈົ້າຂອງເຮືອນເຊົ່າຈຶ່ງຍື່ນຄຳຂາດໃຫ້ລາວເພື່ອຈ່າຍເງິນ ຫລື ຍ້າຍອອກໄປ.
ຊາໂຍຕີ ກຸມາຣີ ເດີນທາງມາເບິ່ງແຍງພໍ່ຂອງນາງ, ສ່ວນແມ່ຢູ່ເຮືອນຄອຍເບິ່ງແຍງນ້ອງອີກ 4 ຄົນ ຢູ່ບ້ານທໍພັງຄະ ໃນລັດພິຫານ ເມື່ອສະຖານະການບີບໜັກຂຶ້ນ ແລະ ການລັອກດາວຊ່ວງໂຄວິດ-19 ຍັງເຮັດໃຫ້ຫາລົດເມ ແລະ ລົດໄຟກັບບ້ານໄດ້ຍາກ, ນາງຈຶ່ງບອກພໍ່ວ່າອາດຈະຂີ່ລົດຖີບກັບບ້ານ.
ແຕ່ພໍ່ຂອງນາງພະຍາຍາມຊັກຊວນໃຫ້ລູກສາວປ່ຽນໃຈ ແຕ່ບໍ່ໄດ້ຜົນ, ນາງຕັ້ງໃຈຈະພາພໍ່ກັບບ້ານໃຫ້ໄດ້. ຈາກນັ້ນນາງຈຶ່ງພາພໍ່ຊ້ອນທ້າຍລົດຖີບແລ້ວເລີ່ມຖີບລົດໄລຍະທາງໄກ ເພື່ອກັບສູ່ບ້ານທີ່ພວກເຂົາຈາກມາ ແລະ ເຮັດສຳເລັດ.
ເມື່ອເລື່ອງລາວຂອງນາງເຜີຍແຜ່ອອກໄປ, ວິທະຍາໄລກິລາຂີ່ລົດຖີບແຫ່ງອິນເດຍ ສະເໜີຈະເອີ້ນນາງ ຊາໂຍຕີ ມາຄັດເລືອກ ເພື່ອເປັນນັກກິລາ ເພາະເຫັນປະສິດທິພາບອັນລົ້ນເຫລືອຂອງນາງ, ເຖິງວ່າ ອີວານກ້າ ທຣຳ ລູກສາວຂອງ ໂດນັລ ທຣຳ ຍັງຊື່ນຊົມນາງຜ່ານທະວິດເຕີ ໂດຍກ່າວວ່າເປັນຄວາມມຸ່ງໝັ້ນ ແລະ ຄວາມຮັກທີ່ງົດງາມ.
