New Normal ກັບມະຫາອຳນາດທີ່ອາດຈະປ່ຽນໄປ
ຫລາຍຄົນມັກເວົ້າເຖິງການດ້ອຍຄ່າຂອງໂດລາສະຫະລັດຫລາຍຂຶ້ນເລື້ອຍໆ ຄວາມຈິງແລ້ວ ເລື່ອງນີ້ບໍ່ແມ່ນເລື່ອງໃໝ່ ເພາະຫລາຍປີຜ່ານມາ ຣັດເຊຍ-ຈີນ ພະຍາຍາມເຮັດທຸລະກິດລະຫວ່າງກັນໂດຍການໃຊ້ເງິນຣູເບິລ ແລະ ເງິນຢວນ ເພື່ອສ້າງການປ່ຽນແປງຢ່າງຕໍ່ເນື່ອງ.
ຢ້ອນໄປປີ 2017 ຣັດເຊຍ ແລະ ຈີນ ກຳລັງຊອກຫາການຂະຫຍາຍຂໍ້ຕົກລົງການແລກປ່ຽນເງິນຕາຕ່າງປະເທດລະຫວ່າງສະກຸນເງິນຢວນ ແລະ ສະກຸນເງິນຣູເບິລ ເພື່ອເພີ່ມມູນຄ່າຫລາຍກວ່າ 30.000 ລ້ານຢວນ ເປັນໄລຍະເວລາ 3 ປີ ແລະ ຈະໃຊ້ສະກຸນເງິນສອງສະກຸນນີ້ໃນການຊື້ຂາຍໃນປະເທດ ແລະ ລະຫວ່າງປະເທດໃຫ້ຫລາຍຂຶ້ນ ເພື່ອຫລຸດຄວາມສຳຄັນຂອງເງິນໂດລາສະຫະລັດລົງ.
ນາຍົກລັດຖະມົນຕີຣັດເຊຍ ດີມີຕຣີ ແມກເວເດຟ ໃນສະໄໝນັ້ນ ໄດ້ໃຫ້ຂໍ້ມູນວ່າ: “ໜ່ວຍງານເບິ່ງແຍງທາງການເງິນຂອງທັງສອງປະເທດກຳລັງດຳເນີນການເພື່ອຂະຫຍາຍຂໍ້ຕົກລົງແລກປ່ຽນເງິນຕາລະດັບທະວີພາຄີໃນອີກສາມປີຕໍ່ໜ້າ”.
ຂະນະທີ່ ຮອງນາຍົກລັດຖະມົນຕີຣັດເຊຍ ທ່ານ ເຊີເກ ພຣິກໂຮໂຄ ທີ່ຮັບຕຳແໜ່ງຕອນນັ້ນ ໄດ້ກ່າວວ່າ: “ໃນປີ 2016 ວ່າ: ສ່ວນແບ່ງຂອງສະກຸນເງິນຂອງສອງປະເທດໃນການຊຳລະເງິນສຳລັບການສົ່ງອອກສິນຄ້າ ແລະ ບໍລິການຂອງຣັດເຊຍເປັນ 13% ນຳເຂົ້າ 16% ໃນໄຕມາດທຳອິດຂອງປີ 2017 ຕົວເລກເຫລົ່ານັ້ນເພີ່ມຂຶ້ນເປັນ 16% ແລະ 18% ຕາມລຳດັບ”.
ທັງຈີນ ແລະ ຣັດເຊຍມີຄວາມມຸ່ງໝັ້ນຈະສົ່ງເສີມສະກຸນເງິນຂອງຕົນເອງ ເຊິ່ງໝາຍຄວາມວ່າ: ສ່ວນແບ່ງເງິນໂດລາມີທ່າອ່ຽງຫລຸດລົງ.
ນັກວິເຄາະທາງການເງິນຂອງຣັດເຊຍກຳລັງເບິ່ງວ່າ: ຄວາມຈິງທາງການເງິນເວລານີ້ມັນບໍ່ໄດ້ເປັນພຽງບົ່ງບອກເຖິງປະລິມານຂອງການເຮັດທຸລະກຳໃນສະກຸນເງິນຂອງສອງປະເທດເທົ່ານັ້ນ, ແຕ່ຣັດເຊຍ ແລະ ຈີນ ກຳລັງເຮັດວຽກຮ່ວມກັນໃນຂໍ້ຕົກລົງພາຫຸພາຄີຫລາຍປະເທດຂອງ BRICS ການຄ້າສະກຸນເງິນຂອງສອງປະເທດເປັນພຽງສ່ວນໜຶ່ງຂອງທ່າອ່ຽງທົ່ວໄປທີ່ເກີດຂຶ້ນທົ່ວໂລກໃນທົດສະວັດຜ່ານມາ. ການຄ້າຂາຍດ້ວຍສະກຸນເງິນຂອງສອງປະເທດຈະຊ່ວຍປົກປ້ອງອິດທິພົນຈາກການເງິນພາຍນອກປະເທດ, ຫລີກເວັ້ນຄວາມປັ່ນປ່ວນຂອງອັດຕາແລກປ່ຽນ ແລະ ຈະເຮັດໃຫ້ຊ່ວຍຫລຸດການຂາດດຸນລະຫວ່າງກັນໄດ້ຫລາຍຂຶ້ນ.
ຜູ້ຊ່ຽວຊານດ້ານການເງິນຂອງຈີນ ເບິ່ງວ່າ: ການຊື້ຂາຍສະກຸນເງິນຂອງສອງປະເທດເປັນວິທີທີ່ຫລີກລ່ຽງມາດຕະການຂວ້ຳບາດຂອງຕາເວັນຕົກ ແລະ ສຳລັບຈີນແລ້ວ ນີ້ເປັນສິ່ງສົ່ງເສີມເງິນຢວນ. ອີກທັງຈີນເປັນໜຶ່ງໃນຜູ້ຊື້ລາຍໃຫຍ່ທີ່ສຸດຂອງຣັດເຊຍ ໂດຍສະເພາະພະລັງງານ ຈະເຮັດໃຫ້ການຊື້ຂາຍດ້ວຍເງິນຢວນຈະຊ່ວຍຫລຸດການອາໄສເງິນໂດລາສະຫະລັດໂດຍສິ້ນເຊີງ.
ຂະນະທີ່ຜູ້ຊ່ຽວຊານເບິ່ງວ່າ: ການເຮັດ de-dollarization ເປັນຂະບວນການທີ່ຍາວນານ ແລະ ສ້າງເຈັບປວດໃຫ້ຈີນ ແລະ ຣັດເຊຍມາດົນ ເຊິ່ງຜ່ານມາ ຣັດເຊຍ ແລະ ຈີນ ຈຶ່ງໄດ້ພະຍາຍາມຈະຫລຸດອອກມາຈາກການໃຊ້ເງິນໂດລາສະຫະລັດ ໃນການຄ້າຂາຍ, ແຕ່ນີ້ເປັນຂະບວນການທີ່ອາດຈະຕ້ອງໃຊ້ເວລາ 15 ເຖິງ 20 ປີ. ຂະນະທີ່ເສດຖະກິດຂອງຈີນ ຜ່ານມາຂຶ້ນກັບເງິນໂດລາສະຫະລັດ ແລະ ທຶນສຳຮອງເງິນຕາຂອງຈີນມີມູນຄ່າຫລາຍກວ່າ 3 ຕື້ໂດລາສະຫະລັດ ໃນເດືອນກໍລະກົດ 2017 ໂດຍແຕ່ລະຄົວເຮືອນຊາວຈີນຖືຄອງພັນທະບັດລັດຖະບານຂອງອາເມລິກາໄດ້ເຖິງ 2.000 ໂດລາ ພາຍໃຕ້ສະຖານະການນີ້ ບໍ່ອາດເປັນໄປໄດ້ວ່າຈີນຈະຍົກເລີກໃຊ້ເງິນໂດລາສະຫະລັດໄດ້ທັນທີ ແຕ່ຕ້ອງໃຊ້ເວລາໃນການປ່ຽນແປງ.
ຂະນະທີ່ສ່ວນແບ່ງການຕະຫລາດຂອງໂລກໃນຮູບໂດລາສະຫະລັດເກືອບ 43%, ຂະນະທີ່ຢວນມີມູນຄ່າບໍ່ເຖິງ 2% ຈີນໄດ້ພັດທະນາລະບົບການຊຳລະເງິນເອີ້ນວ່າ: CIPS ສຳລັບການຊຳລະເງິນຂ້າມຊາຍແດນກັບຢວນ ເພື່ອສົ່ງເສີມສະກຸນເງິນໃນຖານະເຄື່ອງມືທາງການເງິນລະດັບໂລກ ເຊິ່ງນີ້ເປັນພຽງຈຸດເລີ່ມຕົ້ນເທົ່ານັ້ນ, ແຕ່ເຮົາຈະໄດ້ເຫັນການປ່ຽນແປງໃນສິ່ງທີ່ຈີນກັບຣັດເຊຍໄດ້ຮ່ວມມືກັນຫລາຍຂຶ້ນ ໂດຍສະເພາະການກັບມາຟື້ນຕົວທາງເສດຖະກິດ ຫລັງການແຜ່ລະບາດຂອງໂຄວິດ-19 ເຮົາຈະເຫັນຫຍັງຫລາຍຢ່າງທີ່ເອີ້ນກັນວ່າ: New Normal ແລະ ໜຶ່ງໃນນັ້ນ ເຮົາອາດຈະເຫັນມະຫາອຳນາດທີ່ປ່ຽນໄປ.
