ນຳສະເໜີ ຜົນໄດ້ຮັບຈາກການຄົ້ນຄວ້າໂຄງການພັດທະນາຊົນນະບົດ ໂດຍຊຸມຊົນເປັນເຈົ້າ ຢູ່ ສປປ ລາວ

ທ້າຍອາທິດຜ່ານມາ, ຄະນະຮັບຜິດຊອບໂຄງການຄົ້ນຄວ້າ ໂຄງການພັດທະນາຊົນນະບົດ ໂດຍຊຸມຊົນເປັນເຈົ້າ ຢູ່ ສປປ ລາວ ຈຶ່ງໄດ້ຈັດກອງປະຊຸມນຳສະເໜີ ຜົນໄດ້ຮັບຈາກການຄົ້ນ ຄວ້າໂຄງການພັດທະນາຊົນນະບົດ ໂດຍຊຸມຊົນເປັນເຈົ້າ ຢູ່ ສປປ ລາວ ຂຶ້ນ ໂດຍການເປັນປະທານຂອງ ທ່ານ ຈິດ ທະວີໃສ ຜູ້ອໍານວຍການກອງທຶນຫລຸດຜ່ອນຄວາມທຸກຍາກ, ຫົວໜ້າຄະນະຄົ້ນຄວ້າໂຄງການພັດທະນາຊົນນະບົດ ໂດຍຊຸມຊົນເປັນເຈົ້າ ຢູ່ ສປປ ລາວ ແລະ ມີບັນດາພະນັກງານຫລັກ ແຫລ່ງຂອງ ທລຍ ແລະ ບັນດານັກຄົ້ນຄວ້າ ເຂົ້າຮ່ວມ.

ໂຄງການຄົ້ນຄວ້າ ຜົນກະທົບຂອງການພັດທະນາຊົນນະບົດ ໂດຍຊຸມຊົນເປັນເຈົ້າ (ກຳປູເຈຍ, ລາວ, ມຽນມາ, ຫວຽດນາມ, ໄທ ແລະ ສປ ຈີນ) ໄດ້ເລີ່ມແຕ່ເດືອນຕຸລາ 2019 ເປັນຕົ້ນມາ, ຄະນະຮັບຜິດຊອບໂຄງການດັ່ງກ່າວ, ໄດ້ເປີດກອງປະຊຸມສໍາມະນາ ແລະ ວຽກຄົ້ນຄວ້າພາກພື້ນ ພາຍໃຕ້ຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ເພື່ອຄັດເລືອກຄະນະຄົ້ນຄວ້າຈາກ ສປປ ລາວ ແລະ ຕ່າງປະເທດທັງໝົດ 6 ຄັ້ງ. ຜ່ານການຄັດເລືອກສາມາດຮັບຮອງເອົາ ຄະນະນັກຄົ້ນຄວ້າຝ່າຍລາວ ທັງໝົດ 5 ຄະນະ ແລະ 4 ຄະນະ ຈາກປະເທດ ກໍາປູ່ເຈຍ, ສປ ຈີນ, ໄທ ແລະ ຫວຽດນາມ ປະເທດລະ 1 ຄະນະ.ຜ່ານການລົງຄົ້ນຄວ້າ ແລະ ເກັບກໍາຂໍ້ມູນຕົວຈິງຢູ່ພາກສະໜາມ ໃນເດືອມກຸມພາ ຫາ ຕົ້ນເດືອນມີນາ 2020 ກ່ຽວກັບວຽກງານການພັດທະນາ ໂດຍຊຸມຊົນເປັນເຈົ້າ ໂດຍສົມທົບກັບກອງທຶນຫລຸດຜ່ອນຄວາມທຸກຍາກ (ທລຍ) ເຊິ່ງເປັນຜູ້ຈັດຕັ້ງປະຕິບັດວຽກງານຕົວຈິງ ກ່ຽວກັບວຽກງານດັ່ງກ່າວຢູ່ໃນພື້ນທີ່ເປົ້າໝາຍຂອງ ທລຍ. ທີ່ກອງປະຊຸມບັນດານັກຄົ້ນຄວ້າ ໄດ້ນໍາສະເໜີຜົນຂອງການຄົ້ນຄວ້າໃນເບື້ອງຕົ້ນໃຫ້ແຕ່ລະຄະນະ ແລະ ຜູ້ເຂົ້າຮ່ວມປະກອບຄໍາຄິດຄໍາເຫັນ ເພື່ອປັບປຸງຜົນໄດ້ຮັບຂອງການຄົ້ນຄວ້າໃຫ້ເປັນຮູບປະທໍາ ໃຫ້ສໍາເລັດໃນເດືອນມິຖຸນາ 2020 ຈາກນັ້ນຈະໄດ້ນໍາໃຊ້ຂໍ້ມູນດັ່ງກ່າວ ເຂົ້າໃນການຈັດກອງປະຊຸມໃນເດືອນຕຸລາ 2020.