ຈີນກຽມທົດລອງປູກມັນຝຣັ່ງຢູ່ດວງຈັນ
ທີມນັກວິທະຍາສາດຈີນກຽມເຮັດໂຄງການທົດລອງປູກມັນຝຣັ່ງຢູ່ດວງຈັນ ເຊິ່ງເປັນສ່ວນໜຶ່ງຂອງພາລະກິດສຳຫລວດດວງຈັນສາງເອີ 4 ທີ່ຈະເລີ່ມຂຶ້ນໃນປີໜ້າ.
ອາຈານ ເຊີຍ ເກິງຊິນ ແຫ່ງມະຫາວິທະຍາໄລສົງຊິ່ງ ເປີດເຜີຍກັບເວບໄຊສົງຊິ່ງມໍນິງໂພດວ່າ: ມັນຝຣັ່ງຈະນຳເອົາໄປປູກໃນ “ລະບົບນິເວດຂະໜາດນ້ອຍ” ຢູ່ພື້ນຜິວຂອງດວງຈັນ ແລະ ຈະມີການທົດລອງລ້ຽງໜອນໄໝຄຽງຄູ່ກັນໄປ ຕາມແຜນການທົດລອງທາງວິທະຍາສາດຕ່າງໆຂອງໂຄງການນີ້.
ໄຊນາເຣດິໂອອິນເຕີເນຊັນແນວ ລາຍງານວ່າ: ການທົດລອງເທື່ອນີ້ມີຈຸດປະສົງເພື່ອຄົ້ນຫາຄຳຕອບວ່າ: ທັງໜອນໄໝ ແລະ ມັນຝຣັ່ງຈະສາມາດດຳລົງຊີວິດຢູ່ພື້ນຜິວດວງຈັນໄດ້ ຫລື ບໍ່ ເຊິ່ງຜົນການສຶກສາທີ່ໄດ້ຈະໃຫ້ຂໍ້ມູນສຳຄັນກ່ຽວກັບອານານິຄົມໃໝ່ຂອງມະນຸດໃນອະນາຄົດ.
ມັນຝຣັ່ງ ເປັນພືດສຳຄັນໃນຮູບເງົາທາງວິທະຍາສາດເລື່ອງ ເດິ ມາຣຊຽນ ກູ້ຕາຍ 140 ລ້ານໄມ (The Martian) ທີ່ນັກບິນອະວະກາດຕົວລະຄອນເອກໃນເລື່ອງ ຕິດຢູ່ດາວອັງຄານ ແລະ ດຳລົງຊີວິດຢູ່ໄດ້ດ້ວຍການປູກມັນຝຣັ່ງເປັນອາຫານ.
