ຊາວອາເມລິກາ ແຫ່ກັນໄປທ່ຽວຫາດຊາຍ ໂດຍບໍ່ຄິດຢ້ານເຖິງວ່າຜູ້ເສຍຊີວິດຈາກໂຄວິດໃນປະເທດທະລຸເກືອບ 1 ແສນຄົນ
May 25, 2020 - 2:33 PM
ປະຊາຊົນອາເມລິກາຈຳນວນຫລາຍໄດ້ແຫ່ກັນໄປທ່ຽວພັກຜ່ອນຕາມຫາດຊາຍທີ່ໄດ້ຮັບຄວາມນິຍົມໃນແຕ່ລະລັດ ລວມເຖິງສວນສາທາລະນະຕ່າງໆ ເພື່ອເຮັດກິດຈະກຳກາງແຈ້ງເຊັ່ນ: ການອາບແດດ, ຂີ່ເຮືອໄປຫາປາ ແລະ ຍ່າງຫລິ້ນພັກຜ່ອນ ທ່າມກາງບັນຍາກາດທີ່ອົບອຸ່ນຮັບລະດູຮ້ອນທີ່ກຳລັງເລີ່ມຕົ້ນຂຶ້ນໃນຊ່ວງມື້ພັກທ້າຍອາທິດຜ່ານມາ ໂດຍມີປະຊາຊົນພຽງບາງສ່ວນທີ່ໃສ່ຜ້າປິດປາກ-ດັງ ແລະ ເຄື່ອງມືປ້ອງກັນ ຂະນະທີ່ເດີນທາງໄປບ່ອນຊຸມຊົນແອອັດທີ່ຫລາຍຄົນກໍອອກໄປທ່ຽວໂດຍບໍ່ໄດ້ໃສ່ຜ້າປິດປາກ-ດັງ.
ໃນຂະນະດຽວກັນ, ຕົວເລກຜູ້ເສຍຊີວິດຈາກພະຍາດໂຄວິດ-19 ໃນອາເມລິກາຕອນນີ້ມີ 99.300 ຄົນ ເກືອບຮອດຫລັກແສນຄົນແລ້ວ, ສ່ວນຜູ້ຕິດເຊື້ອສະສົມພາຍໃນປະເທດມີ 1.686.436 ຄົນ, ປິ່ນປົວຫາຍດີແລ້ວ 451.702 ຄົນ ເຊິ່ງອາເມລິກາຖືເປັນປະເທດທີ່ມີຜູ້ຕິດເຊື້ອ ແລະ ເສຍຊີວິດສູງທີ່ສຸດໃນໂລກ.
