ນາຍົກລັດຖະມົນຕີ ອັງກິດ ຈະບໍ່ປັດເຂ່ຍພະນັກງານຂັ້ນສູງ

ໂດຍ: ລູກເມືອງພວນ

ບໍ່ສົນໃຈກັບຄຳຮຽກຮ້ອງຂອງຝ່າຍຄ້ານ, ນາຍົກລັດຖະມົນຕີອັງກິດ Boris Johnson ຕັດສິນໃຈບໍ່ປັດເຂ່ຍທີ່ປຶກສາຂອງຕົນ, ທ່ານ Dominic Cummings ພາຍຫຼັງທີ່ເຂົາໄດ້ໄປຢາມພັນລະຍາທີ່ຕິດເຊື້ອໂຄວິດ-19.

ໃນຂະນະທີ່ມີການລະບາດຂອງເຊື້ອໄວຣັດໂຄວິດ-19, ອັງກິດຈຳຕ້ອງປະກາດປິດເມືອງ, ແຕ່ທີ່ປຶກສາລະດັບສູງຂອງນາຍົກລັດຖະມົນຕີ ທ່ານ Dominic Cummings ໄດ້ຂັບລົດໄປທີ່ Durham ຢູ່ທາງພາກເໜືອຂອງປະເທດອັງກິດ ເພື່ອຢ້ຽມຢາມເມຍທີ່ຕິດເຊືອວັດຣັສໂຄໂຣນາ.

ຫ້ອງການສຳນັກງານນາຍົກລັດຖະມົນຕີໃຫ້ຮູ້ວ່າ: ທ່ານ Cummings ໄປ Durhamນັ້ນ, ທ່ານໄດ້ຮັບປະກັນໃຫ້ລູກຊາຍມີຄວາມປອດໄພຢູ່ແລ້ວ ໃນຂະນະທີ່ຕົນເອງ ແລະ ພັນລະຍາ ມີຄວາມສ່ຽງຕິດເຊື້ອໂຄວິດ-19(ແຫຼ່ງຂ່າວຈາກ Reuters ). ທ່ານ Cummings ຢືນຢັນຕໍ່ນັກຂ່າວຢູ່ທີ່ເຮືອນຂອງທ່ານເອງ, ທ່ານກ່າວວ່າ: “ຂ້ອຍເຮັດແບບນີ້ແມ່ນສົມເຫດສົມຜົນ ແລະ ເໝາະສົມແລ້ວ”.

ລັດຖະມົນຕີກະຊວງຄົມມະນາຄົມ ທ່ານ Grant Shapps ໃຫ້ຮູ້ວ່າ: ນາຍົກລັດຖະມົນຕີ ອັງກິດ Boris Johnson ສະໜັບສະໜູນການຕັດສິນໃຈຂອງທ່ານ Cummings. ຫ້ອງວ່າການສຳນັກງານນາຍົກລັດຖະມົນຕີປະກາດວ່າ: ການກະທຳຂອງທ່ານ Cummings ແມ່ນ “ປະຕິບັດຕາມທຸກມາດຕະການຕ້ານໂຄວິດຢູ່ແລ້ວ”, ສ່ວນໜັງສືພິມ  The Guardian ແລະ Mirror ແມ່ນ ໃສ່ຮ້າຍປ້າຍສີ ແບບບໍ່ມີຄວາມຈິງ.

ເຖິງຢ່າງໃດກໍຕາມ, ພັກຝ່າຍຄ້ານ ໄດ້ຮຽກຮ້ອງໃຫ້ນາຍົກລັດຖະມົນຕີ Johnson ປັດເຂ່ຍທ່ານ Dominic Cummings ອອກຈາກຕຳແໜ່ງ. ສ່ວນພັກແຮງງານຮຽກຮ້ອງໃຫ້ລັດຖະມົນຕີ ກະຊວງ ພາຍໃນ ທ່ານ Mark Sedwill ດຳເນີນການສອບສວນເສັ້ນທາງເຄື່ອນໄຫວຂອງ Cummings.

ຫຼັງຈາກນັ້ນມາ, ນາຍົກລັດຖະມົນຕີ Johnson ກໍຕິດເຊື້ອໄວຣັດໂຄວິດ-19, ທ່ານ Cummings ກໍມີອາການຕິດເຊື້ອ. ອີງຕາມມາດຕະການຂອງລັດຖະບານວາງອອກແມ່ນໃຫ້ຜູ້ສົງໄສຕິດເຊື້ອ ກັກກັນໂຕເອງຢູ່ໃນບໍລິເວນເປັນເວລາ 7 ວັນ ແລະ ບໍ່ໃຫ້ອອກຈາກເຮືອນໃນທຸກກໍລະນີໃດກໍຕາມ.