ໄພຄຸກຄາມ 3 ດ້ານຈາກທຳມະຊາດ ກຳລັງຮຸກຮານທະວີບອາຟຣິກາ
ທະວີບອາຟຣິກາກຳລັງຜະເຊີນ “ໄພຄຸກຄາມ 3 ດ້ານ” ຈາກທຳມະຊາດ ທັງພະຍາດລະບາດຈາກເຊື້ອໄວຣັສໂຄໂຣນາສາຍພັນໃໝ່, ນ້ຳຖ້ວມໃນບາງປະເທດ ແລະ ການບຸກລຸກຂອງກອງທັບຕັກກະແຕນທະເລຊາຍ.
ສຳນັກຂ່າວຕ່າງປະເທດລາຍງານວ່າ: ສູນຄວບຄຸມ ແລະ ປ້ອງກັນພະຍາດອາຟຣິກາ (ອາຟຣິກາຊີດີຊີ) ອອກຖະແຫລງການໃນວັນທີ 22 ພຶດສະພາວ່າ: ຜູ້ຕິດເຊື້ອຈາກໂຄວິດ-19 ໃນ 54 ປະເທດ ແລະ ດິນແດນຂອງທະວີບອາຟຣິກາເພີ່ມເປັນຫລາຍກວ່າ 100.000 ຄົນ ນັບແຕ່ມີການຢືນຢັນຜູ້ຕິດເຊື້ອຄົນທຳອິດຢູ່ເອຢິບ ໃນວັນທີ 14 ກຸມພາຜ່ານມາ, ແຕ່ມີຜູ້ໄດ້ຮັບການປິ່ນປົວຫາຍດີແລ້ວເກືອບ 40.000 ຄົນ ແລະ ເສຍຊີວິດປະມານ 3.000 ຄົນ.
ທ່ານ ໄມເຄິລ ໄຣອັນ ປະທານໂຄງການສຸກເສີນດ້ານສາທາລະນະສຸກຂອງອົງການອະນາໄມໂລກ (WHO) ກ່າວວ່າ: ຈຳນວນຜູ້ເສຍຊີວິດຈາກໂຄວິດ-19 ຢູ່ທະວີບອາຟຣິກາຢູ່ໃນລະດັບຕໍ່າເມື່ອທຽບໃສ່ອີກຫລາຍປະເທດໃນຫລາຍທະວີບ “ເປັນເລື່ອງຍິນດີ” ແຕ່ການທີ່ “ເຊື້ອພະຍາດແຜ່ລະບາດຢ່າງນິ້ມນວນ” ຢູ່ທະວີບອາຟຣິກາ ບໍ່ໄດ້ໝາຍຄວາມວ່າສະຖານະການຈະໄວ້ວາງໃຈໃນໄລຍະຍາວ ເພາະສະຖິຕິບົ່ງບອກວ່າ: ໃນອາທິດຜ່ານມາ ຢູ່ 4 ປະເທດມີຈຳນວນຜູ້ຕິດເຊື້ອໃໝ່ເພີ່ມຂຶ້ນຫລາຍກວ່າ 100% ແລະ 9 ປະເທດມີຈຳນວນຜູ້ຕິດເຊື້ອໃໝ່ເພີ່ມຂຶ້ນຢ່າງໜ້ອຍ 50%.
ຂະນະດຽວກັນ ອັດຕາການກວດຄັດກອງໂຄວິດ-19 ຢູ່ທະວີບອາຟຣິກາຍັງຖືວ່າຕໍ່າ ໂດຍປະຊາກອນທົ່ວທະວີບເຂົ້າຮັບການກວດແລ້ວພຽງ 1,5 ລ້ານຄົນ ເຊິ່ງຊີດີຊີອາຟຣິກາວິເຄາະວ່າ: ສະຖິຕິທີ່ເໝາະສົມບໍ່ຄວນຕໍ່າກວ່າ 1,0% ຂອງຈຳນວນປະຊາກອນ ຄືຢ່າງໜ້ອຍ 13 ລ້ານຄົນ.
ອີກດ້ານໜຶ່ງ, ອົງການອາຫານ ແລະ ກະສິກຳແຫ່ງສະຫະປະຊາຊາດ (FAO) ລາຍງານວ່າ: ນອກຈາກວິກິດການແຜ່ລະບາດຂອງໂຄວິດ-19 ແລ້ວ ທະວີບອາຟຣິກາຍັງຜະເຊີນໄພທຳມະຊາດອື່ນອີກ ຊັດເຈນທີ່ສຸດຕອນນີ້ຄືນ້ຳຖ້ວມ ແລະ ການຄຸກຄາມຂອງກອງທັບຕັກກະແຕນທະເລຊາຍ. ສ່ວນທະນາຄານໂລກ (World Bank) ປະກາດມອບເງິນ 500 ລ້ານໂດລາສະຫະລັດ ທັງໃນຮູບແບບຂອງການໃຫ້ລ້າ ແລະ ສິນເຊື່ອດອກເບ້ຍຕໍ່າ ແກ່ທະວີບອາຟຣິກາ ແລະ ບາງປະເທດໃນຕາເວັນອອກກາງແລ້ວ.
