ເຕືອນໄພໃຊ້ຢາມາລາເຣຍຕ້ານໂຄວິດ ສ່ຽງ “ຕາຍ” ຫລາຍກວ່າ “ຫາຍ”
ທີມວິໄຈເຕືອນໄພໃຊ້ຢາມາລາເຣຍຕ້ານໂຄວິດສ່ຽງ “ຕາຍ” ຫລາຍກວ່າ “ຫາຍ” ສວນທາງກັບທີ່ທ່ານ ທຣຳ ເຄີຍບອກວ່າ: ໃຊ້ຢາຊະນິດນີ້ເພື່ອປ້ອງກັນໂຄວິດ-19.
ຜົນສຶກສາວິໄຈຫລ້າສຸດ ເຜີຍແຜ່ໃນວາລະສານແລນເຊັດ ໃນວັນທີ 22 ພຶດສະພາ ເຕືອນໄພເລື່ອງການໃຊ້ຢາມາລາເຣຍໄຮດຣອກຊີຄໍໂຣຄວິນ (hydroxychloroquine) ທີ່ປະທານາທິບໍດີ ໂດນັລ ທຣຳ ຂອງອາເມລິກາ ກ່າວເຖິງໃນໄລຍະຜ່ານມາ ໂດຍທີມວິໄຈເຕືອນວ່າ: ອາດສົ່ງຜົນກະທົບຕໍ່ລະບົບຫົວໃຈ ແລະ ມີຄວາມສ່ຽງຈະເຮັດໃຫ້ເສຍຊີວິດຫລາຍກວ່າຫາຍຈາກການຕິດເຊື້ອໂຄວິດ-19.
ຜົນການສຶກສານີ້ ໄດ້ສຶກສາຜູ້ຕິດເຊື້ອໂຄວິດ-19 ຈຳນວນ 96.000 ກວ່າຄົນ ທີ່ປິ່ນປົວຢູ່ໂຮງໝໍ ແລະ ພົບວ່າ: ຜູ້ຕິດເຊື້ອທີ່ໄດ້ຮັບຢາໄຮດຣອກຊີຄໍໂຣຄວິນ ຫລື ຢາໃນກຸ່ມຄໍໂຣຄວິນອື່ນໆ ມີທ່າອ່ຽງຈະເກີດອາການຫົວໃຈເຕັ້ນຜິດປົກກະຕິ ແລະ ສ່ຽງຕໍ່ການເສຍຊີວິດກະທັນຫັນໄດ້ຫລາຍກວ່າຜູ້ປ່ວຍທີ່ບໍ່ໄດ້ຮັບຢາໃນກຸ່ມນັ້ນ.
ການສຶກສານີ້ ເກັບຂໍ້ມູນຈາກໂຮງໝໍ 671 ແຫ່ງ ແລະ ພົບຜູ້ຕິດເຊື້ອໂຄວິດ-19 ປະມານ 14.888 ຄົນ ທີ່ໄດ້ຮັບຢາໄຮດຣອກຊີຄໍໂຣຄວິນ ຫລື ຢາຄໍໂຣຄວິນ ແລະ ອີກ 81.144 ຄົນ ບໍ່ໃຊ້ຢາໃນກຸ່ມນີ້ ຫລື ການປິ່ນປົວອື່ນໃດ.
ໃນເດືອນເມສາ, ຜູ້ນຳອາເມລິກາ ເລີ່ມກ່າວເຖິງການໃຊ້ຢາຕ້ານມາລາເຣຍ ໃນການປິ່ນປົວໂຄວິດ-19 ແລະ ພັດມາເວົ້າເຖິງອີກໃນອາທິດນີ້ວ່າ: ໃຊ້ຢາດັ່ງກ່າວໃນການປ້ອງກັນໂຄວິດ-19 ເຮັດໃຫ້ເກີດຄວາມຕ້ອງການຢາໄຮດຣອກຊີຄໍໂຣຄວິນເພີ່ມຂຶ້ນໃນໄລຍະຜ່ານມາ.
ສ່ວນອົງການອາຫານ ແລະ ຢາອາເມລິກາ (FDI) ອອກຄຳເຕືອນໃນເດືອນເມສາ ກ່ຽວກັບການໃຊ້ຢາໄຮດຣອກຊີຄໍໂຣຄວິນປິ່ນປົວໂຄວິດ-19.
