ຕຳຫລວດໄທນຳ “ເສ່ຍໂປ້-ເມຍ” ສົ່ງໄອຍະການ ສັ່ງຟ້ອງຄະດີຟອກເງິນພະນັນອອນລາຍ
ວັນທີ 22 ພຶດສະພາ, ຕຳຫລວດໄທ ເປີດເຜີຍວ່າ: ພະນັກງານສອບສວນໄດ້ນຳຕົວທ້າວ ໂປ້ອານົນ ຫລື ເສ່ຍໂປ້ ກັບນາງ ຈຸທາມາດ ຈັນທີ ພັນລະຍາ ພ້ອມຄວາມເຫັນສົມຄວນສັ່ງຟ້ອງໃນຄະດີຮ່ວມກັນຟອກເງິນ ໄປຍື່ນໃຫ້ພະນັກງານໄອຍະການສຳນັກງານຄະດີພິເສດ ຢູ່ສຳນັກງານໄອຍະການສູງສຸດ ເພື່ອພິຈາລະນາສັ່ງຟ້ອງຜູ້ຕ້ອງຫາຕາມຄວາມຜິດກົດໝາຍປ້ອງກັນ ແລະ ປາບປາມການຟອກເງິນ 1999 ໂດຍກ່ອນໜ້ານີ້ ພະນັກງານສອບສວນເຄີຍແຈ້ງຂໍ້ຫາ ເສ່ຍໂປ້ ແລ້ວໃນເດືອນທັນວາ 2019 ແລ້ວອອກໝາຍຮຽກນັດມາຫາສານແຕ່ບໍ່ຍອມມາພົບ ກ່ອນຈະມາພົບພະນັກງານສອບສວນໃນມື້ນີ້ ພ້ອມພັນລະຍາ ເຊິ່ງເປັນຜູ້ຕ້ອງຫາຮ່ວມກັນກະທຳຜິດ ແລະ ມື້ດຽວກັນ, ຍັງມີຜູ້ຕ້ອງຫາທີ່ເປັນເຍົາວະຊົນ 1 ຄົນ ທີ່ພະນັກງານສອບສວນໄດ້ສົ່ງດຳເນີນຄະດີໃນໄອຍະການສານເຍົາວະຊົນພິຈາລະນາດຳເນີນຄະດີຕາມຂັ້ນຕອນກົດໝາຍຂອງສານເຍົາວະຊົນ. ຂະນະດຽວກັນ ພະນັກງານສອບສວນໄດ້ກຽມຂໍສານອອກໝາຍຈັບຜູ້ຕ້ອງຫາອີກ 1 ຄົນ ເຊິ່ງເປັນຜູ້ຖືບັນຊີໃນກຸ່ມຜູ້ຕ້ອງຫາທັງໝົດ ຫລັງອອກໝາຍຮຽກຕົວແລ້ວບໍ່ຍອມມາພົບພະນັກງານສວນສວນໃນມື້ນີ້.
ສຳລັບຄະດີດັ່ງກ່າວເປັນຄະດີທີ່ຕຳຫລວດເຂົ້າຈັບກຸ່ມດຳເນີນຄະດີ ເສ່ຍໂປ້ ກັບພັກພວມລວມ 6 ຄົນ ໃນຂໍ້ຫາຈັດການຫລິ້ນພະນັນອອນລາຍ ຫລັງສືບສວນພົບວ່າ ເສ່ຍໂປ້ ໄດ້ໂພສເຟສບຸກແຊຣລິງຫລິ້ນການພະນັນຜ່ານໄລ ແລະ ເປີດຮັບສະມາຊິກເຂົ້າມາຫລິ້ນພະນັນຜ່ານແອບພິເຄຊັນ STAR VEQAS ໃນປີ 2018 ກ່ອນສົ່ງພະນັກງານສອບສວນບາງເຂດດຳເນີນຄະດີຕໍ່ ເສ່ຍໂປ້ ກັບພັກພວກຖານຮ່ວມກັນຟອກເງິນ.
