New Normal ຄືຫຍັງ ? ສຳຄັນຊໍ່າໃດ ? ແລະ ສົ່ງຜົນຫຍັງຕໍ່ຊີວິດຄົນເຮົາ ?
ໄລຍະນີ້ຫລາຍຄົນອາດໄດ້ຍິນຄຳວ່າ: New Normal ຢູ່ໃນຂ່າວຫລາຍຂຶ້ນ ອາດຈະສົງໄສວ່າ: ເປັນຫຍັງ ດຽວນີ້ຄົນຈຶ່ງເວົ້າເຖິງຄຳນີ້ກັນຫລາຍ, ມັນຄືຫຍັງ, ກ່ຽວຂ້ອງຫຍັງກັບຊີວິດຂ້ອຍ, ຂ້ອຍຕ້ອງຮູ້ຈັກມັນ ຫລື ບໍ່.
New Normal ຖ້າແປແບບກົງໆກໍຄື New ແປວ່າໃໝ່ Normal ແປວ່າປົກກະຕິ ລວມກັນແລ້ວແປໄດ້ຄວາມໝາຍວ່າ: ຄວາມປົກກະຕິແບບໃໝ່ ຫລື ສະພາບປົກກະຕິແບບໃໝ່.
ລອງຄິດງ່າຍໆວ່າ: ອີ່ຫຍັງທີ່ເຮົາເຮັດໃນຊີວິດປະຈຳວັນເປັນປົກກະຕິແດ່ ເຊັ່ນ: ກິນເຂົ້າ 3 ຄາບ, ອາບນ້ຳ 2 ຄັ້ງ, ໃນຊຸດສີດຳໄປງານສົບ ທັງໝົດນີ້ຄືເລື່ອງ “ປົກກະຕິ” ທີ່ເຮົາຄຸ້ນເຄີຍ, ແຕ່ສະພາບປົກກະຕິແບບໃໝ່ນີ້ ມັນຄືສິ່ງທີ່ເຮົາເບິ່ງວ່າ: ເມື່ອກ່ອນບໍ່ແມ່ນເລື່ອງປົກກະຕິທີ່ເຮົາເຮັດກັນ, ແຕ່ເມື່ອເກີດເຫດການ ຫລື ປາກົດການຫຍັງບາງຢ່າງຂຶ້ນ ສິ່ງເຫລົ່ານັ້ນກໍກາຍເປັນເລື່ອງປົກກະຕິໄປໂດຍປະລິຍາຍ. ຖ້າຍົກຕົວຢ່າງທີ່ເຫັນໄດ້ໃນຍຸກ Covid-19 ຄືການໃສ່ຜ້າອັດປາກ-ອັດດັງອອກຈາກເຮືອນ, ເມື່ອກ່ອນເຮົາຈະໃສ່ຜ້າອັດປາກ-ອັດດັງເມື່ອເຮົາບໍ່ສະບາຍເທົ່ານັ້ນ, ແຕ່ດຽວນີ້ ມັນຄືເລື່ອງປົກກະຕິໄປແລ້ວທີ່ຕ້ອງໃສ່ຜ້າອັດປາກອອກຈາກເຮືອນ ຫລື ການເອົາເຈລແອນກໍຮໍໄວ້ລ້າງມືຕິດຕົວຕະຫລອດເວລາ.
ຄຳວ່າ New Normal ມາຈາກໃສ ?
ຄວາມຈິງແລ້ວ ຄຳວ່າ: New Normal ເປັນຄຳສັບທາງທຸລະກິດ ແລະ ເສດຖະສາດ ທີ່ຖືກນຳມາໃຊ້ຄັ້ງທຳອິດໃນປີ 2009 ໃນໄລຍະວິກິດການທາງການເງິນຂອງອາເມລິກາ ທີ່ຮູ້ຈັກໃນຊື່ ວິກິດແຮມເບີເກີ ເຊິ່ງເຮັດໃຫ້ເກີດ ສະພາບເສດຖະກິດຫລຸດຖອຍທົ່ວໂລກໃນປີ 2009-2013.
ໂດຍປົກກະຕິແລ້ວ ວິກິດເສດຖະກິດຈະມີຮູບແບບຂ້ອນຂ້າງຈະແຈ້ງຄື: ເມື່ອເຕີບໃຫຍ່ໄດ້ໄລຍະໜຶ່ງຈະມີປັດໄຈເຮັດໃຫ້ເກີດຟອງສະບູ ເມື່ອວິກິດຜ່ານພົ້ນໄປ ເສດຖະກິດເລີ່ມຟື້ນຕົວ ແລະ ກັບມາເຕີບໃຫຍ່ໄດ້ອີກໃນເວລາບໍ່ດົນ, ແຕ່ສິ່ງທີ່ເກີດຂຶ້ນຫລັງຈາກວິກິດແຮມເບີເກີ ຄືເສດຖະກິດໂລກບໍ່ສາມາດກັບໄປເຕີບໃຫຍ່ໄດ້ດີແບບເກົ່າອີກ ເນື່ອງຈາກປັດໄຈຕ່າງໆເຊັ່ນ: ການພະຍາຍາມກະຕຸ້ນເສດຖະກິດຫລາຍເກີນໄປ ທັງທີ່ບາງປະເທດມີໜີ້ສາທາລະນະສູງ.
ເຊິ່ງຕົວຢ່າງ New Normal ເຫັນໄດ້ຈະແຈ້ງທີ່ສຸດຄື ເສດຖະກິດຂອງຈີນຂະຫຍາຍຕົວຫລາຍກວ່າ 10% ມາໂດຍຕະຫລອດ, ແຕ່ຫລັງຈາກມີວິກິດແຮມເບີເກີ ການເຕີບໃຫຍ່ກໍຫລຸດລົງຕໍ່ເນື່ອງຈົນເຖິງຮອດປີ 2015 ແລະ ເສດຖະກິດຈີນກໍບໍ່ເຄີຍເຕີບໃຫຍ່ເກີນ 7% ອີກ. ປະທານາທິບໍດີ ສີຈິ້ນຜິງ ໄດ້ອອກມາຊີ້ແຈງຕໍ່ຄົນຈີນວ່າ: ເສດຖະກິດຈີນເຕີບໃຫຍ່ເຫລືອພຽງ 7% ບໍ່ໄດ້ເປັນຍ້ອນສະພາບເສດຖະກິດຫລຸດຖອຍ, ແຕ່ເປັນ New Normal ທາງເສດຖະກິດຂອງຈີນໃນອະນາຄົດ. ຫລັງຈາກນັ້ນ ຄຳນີ້ກໍຖືກນຳມາໃຊ້ເປັນວົງກວ້າງ ທັງໃນແງ່ຂອງວັດທະນະທຳ, ວິຖີຊີວິດ ແລະ ພຶດຕິກຳຂອງຄົນໃນສັງຄົມ.
New Normal ທີ່ຈະເກີດຂຶ້ນຕໍ່ຈາກນີ້ຈະສົ່ງຜົນຫຍັງແດ່ ?
ເນື່ອງຈາກວ່າມັນເປັນສິ່ງໃໝ່ ເລີຍບໍ່ມີຫຍັງຈະຊີ້ວັດໄດ້ເຈາະຈົງແນ່ນອນວ່າຈະມີຫຍັງເກີດຂຶ້ນແດ່, ແຕ່ຂໍແບ່ງອອກເປັນ 3 ຫົວຂໍ້ຕົ້ນຕໍ ທີ່ຜູ້ຊ່ຽວຊານຫລາຍພາກສ່ວນຄາດຄະເນເບື້ອງຕົ້ນວ່າຈະເກີດຂຶ້ນ
- ພຶດຕິກຳ
- ຄົນຈະຍັງມີ social distancing ກັນຕໍ່ໄປ ທັງໃນແງ່ຂອງຮ່າງກາຍ ແລະ ຈິດໃຈ, ຄວາມເຊື່ອໃຈກັນທີ່ເຄີຍສະແດງອອກຜ່ານ Human Touch ຈະໜ້ອຍລົງ.
- ຄົນຈະບໍ່ສຳຜັດກັນໂດຍບໍ່ຈຳເປັນ.
- ວັດທະນະທຳໃນການທັກທາຍຂອງຜູ້ຄົນ ໂດຍສະເພາະຫລາຍໆປະເທດໃນຕາເວັນຕົກທີ່ເຄີຍຈັບມື, ສຳຜັດຕົວກັນ ຈະປ່ຽນແປງໄປ.
- ທຸລະກິດ ແລະ ການຕະຫລາດ
- ການຕະຫລາດແບບ experiential marketing ຫລື ການຕະຫລາດທີ່ເນັ້ນເລື່ອງພາບພົດ ອາດໄດ້ຮັບຄວາມນິຍົມໜ້ອຍລົງ ເນື່ອງຈາກຄົນພະຍາຍາມຫລີກລ່ຽງຈະລວມກຸ່ມກັນ ຫລື ຢູ່ບ່ອນຄົນຫລາຍໆ ພໍຄົນບໍ່ຄ່ອຍອອກສັງຄົມຫລາຍຄືເມື່ອກ່ອນ ອາດເຮັດໃຫ້ມີຄວາມສົນໃຈເລື່ອງພາບພົດຫລຸດລົງໄປນຳ.
- ຄົນຈະຫັນມາໃຫ້ຄວາມສຳຄັນໃນຄວາມໝັ້ນຄົງ ທັງທາງສຸຂະພາບ ແລະ ການເງິນຫລາຍຂຶ້ນ. ການຂາຍສິນຄ້າ ຫລື ບໍລິການຕ່າງໆແບບໄລຍະຍາວຈະໄດ້ຮັບຄວາມນິຍົມຫລາຍຂຶ້ນ.
- ທຸລະກິດຈະຂັບເຄື່ອນເຂົ້າສູ່ Digital Transformation ທີ່ຈັບບາຍໄດ້ຢ່າງເປັນຮູບປະທຳ ແລະ ວ່ອງໄວຂຶ້ນ.
- ການສົ່ງສິນຄ້າຈະເຮັດໄດ້ຍາກຂຶ້ນ, ການຮັກສາຄວາມປອດໄພໃນການເດີນທາງ, ການຂ້າມເຂດແດນຈະເຂັ້ມງວດຂຶ້ນ, ມີການປະຕິເສດບໍ່ຮັບສິນຄ້າຈາກບາງປະເທດໂດຍບໍ່ຖືກເບິ່ງວ່າເປັນການກີດກັນທາງການຄ້າ, ແຕ່ເບິ່ງວ່າເປັນຄວາມປອດໄພໃນສິນຄ້າ.
- ການບໍລິໂພກພາຍໃນປະເທດ ຫລື Domestic Consumption ຈະເພີ່ມຂຶ້ນ ຄົນຈະຫັນມາສະໜັບສະໜູນ product ໃນປະເທດຫລາຍຂຶ້ນ.
- ການໃຊ້ຊີວິດ
- ດິຈິຕອນຈະກາຍເປັນຄວາມສຳຄັນຫລັກໃນການດຳລົງຊີວິດ ບໍ່ແມ່ນພຽງຄົນ Gen C ແຕ່ຄືຄົນທຸກລຸ້ນ, ທຸກໄວ ຈະສາມາດໃຊ້ງານດິຈີຕອນໄດ້ຢ່າງລຶ້ງເຄີຍ.
- ເຕັກໂນໂລຊີຈະກາຍເປັນເລື່ອງປົກກະຕິໃນຊີວິດປະຈຳວັນ ທັງການ work from home ການສັ່ງມາດໃຊ້ງານດິຈີຕອນໄດ້ຢ່າງລຶ້ງເອາຫານເດລິເວີຣີ ຫລື ການຮຽນອອນລາຍ.
- ຄົນມີການແບ່ງພັກແບ່ງພວກ, ມີການເລືອກປະຕິບັດຫລາຍຂຶ້ນ ດ້ວຍເຫດຜົນທາງດ້ານຄວາມປອດໄພ ຫລື ການຄຳນຶງເຖິງສຸຂະອະນາໄມ.
- Mindset ບາງຢ່າງອາດປ່ຽນໄປ ຄົນບໍ່ກ້າເດີນທາງອອກນອກປະເທດ ບໍ່ກ້າສົ່ງລູກໄປຮຽນຕ່າງປະເທດຄືເມື່ອກ່ອນ.
ຫລາຍຄົນປຽບທຽບສະຖານະການຕອນນີ້ວ່າເປັນຄືສົງຄາມໂລກຄັ້ງທີ 3 ພຽງມະນຸດເຮົາບໍ່ໄດ້ຕໍ່ສູ້ກັນເອງ, ແຕ່ເຮົາຕໍ່ສູ້ກັບເຊື້ອໄວຣັສ ເຊິ່ງສະພາບຫລັງສົງຄາມມັນເປັນອີ່ຫຍັງທີ່ເຈັບປວດ ແລະ ສາຫັດສະເໝີ, ແຕ່ຖ້າເຮົາຕັ້ງສະຕິ, ໄຫວຕົວໃຫ້ທັນ ແລະ ກຽມຮັບມືກັບສິ່ງທີ່ຈະເກີດຂຶ້ນຕໍ່ໄປໄດ້ ເຮົາກໍຈະຜ່ານມັນໄປໄດ້.
