ຕໍ່ໄປບໍ່ຟຣີແລ້ວ ! ມາເລເຊຍ ກຽມເກັບ ຄ່າໃຊ້ຈ່າຍກັກຕົວເຝົ້າລະວັງໂຄວິດ
ນັບແຕ່ເດືອນມິຖຸນາເປັນຕົ້ນໄປ ພົນລະເມືອງຕ່າງປະເທດທີ່ຈະເດີນທາງເຂົ້າມາເລເຊຍຕ້ອງຈ່າຍຄ່າກັກຕົວເຝົ້າລະວັງໂຄວິດ-19 ຕະຫລອດ 2 ອາທິດ, ສ່ວນຄົນມາເລເຊຍທີ່ເດີນທາງກັບເຂົ້າມາ ລັດຖະບານຈະເບິ່ງແຍງຄ່າໃຊ້ຈ່າຍໃຫ້ເຄິ່ງໜຶ່ງ.
ສຳນັກຂ່າວຕ່າງປະເທດລາຍງານວ່າ: ທ່ານ ອິສມາອິລ ຢາຄ໊ອບ ລັດຖະມົນຕີກະຊວງປ້ອງກັນຄວາມສະຫງົບຂອງມາເລເຊຍ ກ່າວວ່າ: ມາດຕະການກັກຕົວຢູ່ສະຖານທີ່ທີ່ລັດຖະບານຈັດໄວ້ເປັນສູນຄວບຄຸມພະຍາດສຳລັບຜູ້ທີ່ເດີນທາງມາຈາກຕ່າງປະເທດ ຍັງມີຜົນບັງຄັບໃຊ້ແບບບໍ່ມີກຳນົດ ເພື່ອປ້ອງກັນການແຜ່ລະບາດຂອງໂຄວິດ-19.
ເຖິງຢ່າງໃດກໍຕາມ, ນັບແຕ່ວັນທີ 1 ມິຖຸນາເປັນຕົ້ນໄປ ຄົນຕ່າງປະເທດຕ້ອງຮັບຜິດຊອບຄ່າໃຊ້ຈ່າຍເອງທັງໝົດ. ຂະນະທີ່ພົນລະເມືອງມາເລເຊຍເອງນັ້ນ ລັດຖະບານຈະຮັບຜິດຊອບຄ່າໃຊ້ຈ່າຍໃຫ້ເຄິ່ງໜຶ່ງ ຈາກປັດຈຸບັນວັນລະ 150 ຣິງກິດ.
ທັງນີ້ ຜູ້ທີ່ເດີນທາງເຂົ້າມາເລເຊຍຈາກທຸກຊ່ອງທາງຕ້ອງລົງນາມໃນເອກະສານຍອມຮັບເງື່ອນໄຂດັ່ງກ່າວກ່ອນເດີນທາງ ໂດຍຕ້ອງດຳເນີນການຢູ່ສະຖານເອກອັກຄະລັດຖະທູດ ຫລື ສະຖານກົງສຸນຂອງມາເລເຊຍໃນປະເທດຕົ້ນທາງ ຫລັງຈາກນັ້ນຈະໄດ້ຮັບເອກະສານສະບັບໜຶ່ງ ຕ້ອງໃຊ້ສະແດງເປັນຫລັກຖານຕໍ່ເຈົ້າໜ້າທີ່ກວດຄົນເຂົ້າເມືອງ ແລະ ພະນັກງານຄວບຄຸມໂຣກຢູ່ຈຸດຜ່ານແດນຂອງມາເລເຊຍ.
