ຫວຽດນາມຈະຊື້ໄຟຟ້າພະລັງງານລົມຈາກລາວ

ໂດຍ: ລູກເມືອງພວນ

ນາຍົກລັດຖະມົນຕີ ຫວຽດນາມ ເຫັນດີຊື້ໄຟຟ້າພະລັງງານລົມຈາກລາວໃນລາຄາເພດານ 6,95 USCent/kWh, ໃນຂະນະດຽວກັນ ລາຄາຢູ່ຫວຽດນາມ ແມ່ນ 8,5-9,8 USCent/kWh.

ຫວ່າງບໍ່ດົນນີ້, ນາຍົກລັດຖະມົນຕີ ຫວຽດນາມ ໄດ້ເຫັນດີ ໂດຍຫຼັກການ ດ້ານລາຄາເພດານ ນຳເຂົ້າໄຟຟ້າພະລັງງານລົມຈາກລາວ, ຕາມການສະເໜີຂອງກະຊວງອຸດສາຫະກຳ-ການຄ້າ. ໃນລາຄາສູງສຸດບໍ່ເກີນ 6,95 USCent/kWh.

ລາຄາເພດານນຳເຂົ້າໄຟຟ້າພະລັງງານລົມຈາກລາວ ຈະຖືກນຳໃຊ້ເຂົ້າໃນໂຮງງານໄຟຟ້າແຫ່ງຕ່າງໆທີ່ຈະເດີນເຄື່ອງໃນວັນທີ 31 ທັນວາ 2025 ແລະ ຈະຖືກນຳໃຊ້ຕະຫຼອດ 25 ປີ ຕາມອາຍຸການຂອງໂຄງການ. ຫຼັງປີ 2025, ກະຊວງອຸດສາຫະກຳ ແລະ ການຄ້າ ຈະກວດກາຄືນເພື່ອລາຍງານຕໍ່ທ່ານນາຍົກລັດຖະມົນຕີ ໃນການນຳໃຊ້ລະດັບລາຄາເພດານດັ່ງກ່າວຕໍ່ໄປ.

ລາຄາໄຟຟ້າຈະຖືກກຳນົດຢູ່ທີ່ເສັ້ນຊາຍແດນປະເທດຂອງຫວຽດນາມ, ແຕ່ລະຝ່າຍຈະມີໜ້າທີ່ຮັບຜິດຊອບລົງທຶນກໍ່ສ້າງ ແລະ ດຶງສາຍໄຟມາຫາຊາຍແດນຂອງສອງປະເທດ.

ກ່ອນໜ້ານີ້ ໃນທ້າຍເດືອນມັງກອນຜ່ານມາ, ກະຊວງອຸດສາຫະກຳ ແລະ ການຄ້າ ໄດ້ມີບົດລາຍງານຕໍ່ນາຍົກລັດຖະມົນຕີກ່ຽວກັບທິດທາງນຳເຂົ້າໄຟຟ້າ ແລະ ການເຊື່ອມຕໍ່ກັບສະຖານີໄຟຟ້າ Monsoon ຂອງລາວ ຊຶ່ງມີພະລັງງານ 600 MW. ຜູ້ລົງທຶນແມ່ນກຸ່ມບໍລິສັດ Impact Energy Asia Development ທີ່ໄດ້ເຮັດສັນຍາກັບກຸ່ມບໍລິສັດໄຟຟ້າຂອງຫວຽດນາມ(EVN) ສຳລັບລາຄາຂາຍກະແສໄຟຟ້າຂອງໂຄງການ ບໍ່ໃຫ້ສູງກວ່າກອບລາຄາໄຟຟ້າພະລັງນໍ້າ.

ລາຄາ 6,95 UScent/kWhເຫັນວ່າຈະຖືກກວ່າລາຄາຊື້ຈາກພາຍໃນປະເທດຄື 8,5 UScent/kWh.

ລາຄາໄຟຟ້າພະລັງລົມພາຍໃນປະເທດສູງ ແລະ ປະສິດທິຜົນຕໍ່າກວ່າຊື້ຈາກລາວ. ມາຮອດເດືອນມີນາ ຜ່ານມາ ຫວຽດນາມມີ 78 ໂຄງການໄຟຟ້າ ມີພະລັງງານລວມ 4.800 MW, ໃນນັ້ນມີພຽງ 11 ໂຄງການທີ່ສາມາດຜະລິດໄດ້ 377 MW, ມີ 31 ໂຄງການລວມພະລັງງານ 1.62 MW ຊຶ່ງໄດ້ສັນຍາຊື້ຂາຍໃນໄລຍະປີ 2020-2021.