ຫ້ອງການ ສາທາລະນະສຸກເມືອງໄຊບູລີ ແຂວງສະຫວັນນະເຂດລົງເຄື່ອນໄຫວສັກຢາ ກັນພະຍາດໃຫ້ ນັກຮຽນ

ເນື່ອງໃນໂອກາດວັນສັກຢາແຫ່ງຊາດ ວັນທີ 20 ພຶດສະພາ 2020 ນີ້, ຢູ່ທີ່ ໂຮງຮຽນມັດທະຍົມສົມບູນ ສາລະພູມ ບ້ານນາແດງ  ເມືອງໄຊບູລີ ແຂວງສະຫວັນເຂດ. ຫ້ອງການສາທາລະນະສຸກເມືອງ ໄດ້ລົງເຄື່ອນໄຫວສັກຢາ ວັກຊິນກັນພະຍາດ ມະເຮັງປາກມົດລູກໃຫ້ກຸ່ມເປົ້າໝາຍເດັກຍິງ ໃນເກນອາຍຸ 10 ຫາ 15 ປີ.

ໂດຍການໃຫ້ກຽດເຂົ້າຮ່ວມເປັນປະທານ ຂອງ ທ່ານ ດຣ ສຸລິວົງ ສີວໍລະວົງ ຄະນະປະຈໍາພັກເມືອງ ຮອງເຈົ້າເມືອງໄຊບູລີ , ທ່ານ ດຣ ພະຈະເລີນ ວົງພະຈັນ ຫົວໜ້າຫ້ອງການສາທາລະນະສຸກເມືອງ, ມີບັນດາຫົວໜ້າ, ຄະນະຫ້ອງການ, ແພດໝໍ, ອໍານາດການປົກຄອງບ້ານ  ຜູ້ອໍານວຍການ – ຄູອາຈານໂຮງຮຽນ, ຄະນະກໍາມະການພັດທະນາການສຶກສາຂັ້ນບ້ານ ພ້ອມ ນ້ອງນັກຮຽນ ທີ່ຢູ່ໃນກຸ່ມເປົ້າໝາຍເຂົ້າຮ່ວມຈໍານວນ 43 ຄົນ.

ໃນພິທີ ທ່ານ ດຣ ສຸລິວົງ ສີວໍລະວົງ ຮອງເຈົ້າເມືອງໄຊບູລີ ໄດ້ໃຫ້ຮູ້ ກ່ຽວກັບຜົນຮ້າຍຂອງພະຍາດມະເຮັງປາກມົດລູດວ່າ ມັນຮ້າຍແຮງສໍ່າໃດ? ແລະ ສາມາດປ້ອງກັນພະຍາດນີ້ໄດ້ດ້ວຍວິທີໃດ? ເປັນຫຍັງເດັກຍິງໃນເກນອາຍຸ10-15 ຈຶ່ງຕ້ອງໄດ້ຮັບການສັກຢາວັກຊິນກັນພະຍາດນີ້?  ຮູ້ໃຫ້ກ່ຽວກັບການສັກວັກຊີນ HPV ແລະ ອະທິບາຍໃຫ້ຄວາມກະຈ່າງແຈ້ງຕໍ່ຂໍ້ສົງໃສຕ່າງໆຕໍ່ຜູປົກຄອງ ເພື່ອນໍາພາລູກຫຼານຂອງທ່ານມາສັກຢາປ້ອງກັນພະຍາດມະເຮັງປາກມົດລູກ ແລະ ທີ່ສໍາຄັນແມ່ນຈະຕ້ອງໄດ້ສັກຢາໃຫ້ຄົບກໍານົດ ຄືເດັກຍິງໃນເກນອາຍຸນີ້ຈະຕ້ອງສັກຢາວັກຊີນກັນພະຍາດປາກມົດລູກ ປີ ລະ1ເຂັມ ໃຫ້ຄົບ 2 ປີ, ທັງນີ້ທາງແພດໝໍ ກໍ່ຄືໜ່ວຍງານສົ່ງເສີມສຸຂະພາບຈະເລີນພັນ ຈະ ສືບຕໍ່ຈັດຕັ້ງປະຕິບັດວຽກງານຢ່າງເຕັມທີ່, ເພື່ອໃຫ້ເດັກໃນເກນອາຍຸ 10-15 ປີທຸກຄົນໄດ້ຮັບການສັກຢາວັກຊີນກັນພະຍາດດັ່ງກ່າວໄດ້ 100%, ປະຕິບັດຕາມອົງການອານາໂລກອະນຸມັດ ແລະ ຕິດພັນກັບການແກ້ໄຂ ການແຜ່ລະບາດຂອງພະຍາດ ທີ່ເກີດຂື້ນໃນໂລກປັດຈຸບັນ ເປັນຕົ້ນ ແມ່ນ  ໄຂຍຸງລາຍ ແລະ ການແຜ່ລະບາດຂອງພະຍາດອັກເສບປອດ ຍ້ອນເຊື້ອຈຸລະໂລກສາຍພັນໃໝ່ COVID -19 ທີ່ກໍາລັງແຜ່ລະບາດໃນປັດຈຸບັນ