ຕາມຫາລູກຊາຍທີ່ຫາຍສາບສູນໄປ 32 ປີຈົນພົບພໍ້
ໂດຍ: ລູກເມືອງພວນ
ລິ (Li) ແມ່ຍິງຈີນຄົນໜຶ່ງ ຕາມຫາລູກຊາຍຕະຫຼອດ 32 ປີ, ດ້ວຍການຕິດໃບປະກາດຕາມຫາລູກຊາຍ 100.000 ອັນ ໃນ 20 ແຂວງທົ່ວປະເທດ ແລະ ຍັງໄດ້ຄົ້ນຫາເດັກເຖິງ 300 ຄົນ ຫວັງຈະໄດ້ພົບກັບລູກຊາຍຂອງຕົນ. ໃນທີ່ສຸດຄວາມສຸກຂອງເຂົາກໍມາເຖິງໃນ “ວັນແມ່” ປີນີ້ເອງ.
ຕອນແລງວັນທີ 17 ຕຸລາ ປີ 1988, ເດັກຊາຍ Mao Yin ໄວ 8 ປີ, 2 ເດືອນ ກຳລັງຫຼີ້ນກັບພໍ່ຊື່ Mao Zhenjing ຢູ່ທີ່ລະບຽງໂຮງແຮມແຫ່ງໜຶ່ງ ໃນ ຊີອານ ແຂວງ ຊານສີ. ບັງເອີນເດັກ Mao Yin ຢາກກິນນໍ້າ, ພໍ່ຂອງເຂົາປະລູກຊາຍໄວ້ທີ່ລະບຽງ, ແລ້ວແລ່ນເຂົ້າໄປໃນ ຄໍເຕີ ໂຮງແຮມ ເພື່ອຂໍນໍ້າມາໃຫ້ລູກກິນ, ພຽງ 2-3 ນາທີເທົ່ານັ້ນ, ເມື່ອກັບຄືນອອກມາ ກໍບໍ່ເຫັນລູກແລ້ວ.
ເມຍຂອງເຂົາຊື່ Li Jingzhi ກຳລັງໄປພາລະກິດຢູ່ຕ່າງປະເທດ, ເມື່ອໄດ້ຮັບສາຍວ່າ: “ກັບບ້ານດ່ວນ” ຈາກຜູ້ເປັນຜົວ. ເຂົາກໍຟ້າວກັບບ້ານທັນທີ, ເມື່ອກັບມາເຖິງບ້ານຮູ້ຂ່າວວ່າລູກຊາຍຖືກຫາຍສາບສູນ, ເຂົາກໍເປັນລົມລົງກັບທີ່. ພາຍຫຼັງລູກຫາຍສາບສູນແລ້ວ, ຊີວິດຂອງຜູ້ເປັນແມ່ຈົມຢູ່ດ້ວຍຄວາມໂສກເສົ້າ ແລະ ນໍ້າຕາ.
ຜູ້ເປັນແມ່ເລີ່ມຂະບວນການຊອກຫາລູກ. ມີວັນໜຶ່ງ, ໄດ້ຍິນຂ່າວວ່າມີເດັກຄົນໜຶ່ງຄ້າຍຄືກັນກັບລູກຊາຍຂອງຕົນ ຢູ່ທີ່ແຂວງ ຊານສີ, ເຂົາກໍຟ້າວຕິດຕາມໄປເບິ່ງເດັກຄົນນັ້ນ ຢູ່ທີ່ແຂວງ ຊານສີ, ເມື່ອໄປເຖິງ ຊານສີ ມີຄົນບອກວ່າ ເດັກຖືກນຳໄປ ຊີອານ ແລ້ວ. ເຂົາກໍຕາມໄປທີ່ ຊີອານ ອີກ, ເມື່ອເຖິງ ຊີອານ ເດັກພັດຖືກເອົາໄປ ອັນດັງ (An Khang), ເຂົາກໍຕິດຕາມໄປອີກຈົນເຖິງ ມົນທົນເສສວນ ໃນທີ່ສຸດກໍພົບກັບເດັກຄົນນັ້ນ ແຕ່ບໍ່ແມ່ນລູກຂອງຕົນເອງ.
Li Jingzhi ມັກຈະຖືກຫຼອກຫຼອນ ດ້ວຍສຽງເວົ້າຂອງລູກຢູ່ຕະຫຼອດເວລາ. ບາງຄືນເຂົາຜູດລຸກອອກຈາກບ່ອນນອນໄປເອີ້ນຫາລູກ, ຜູ້ເປັນແມ່ນຂອງ ລີ ມາກອດລູກ ແລ້ວໃຫ້ກຳລັງໃຈວ່າ: “ລູກເອີຍ ລູກບໍ່ຕ້ອງລົ້ມປ່ວຍ, ລູກຂອງເຈົ້າຍັງຖ້າເຈົ້າຢູ່”.
ຫຼາຍຄົນເຕືອນເຂົາວ່າ ຄວນເອົາລູກຄົນໃໝ່ສາ! ຊອກຫາລູກທີ່ຫາຍສາບສູນ ມັນບໍ່ຕ່າງຫຍັງກັບງົມຫາເຂັມຢູ່ພື້ນທະເລ. ແຕ່ Li Jingzhi ເວົ້າວ່າ: “ຖ້າຂ້ອຍຫາກຢຸດເຊົາຕາມຫາລູກ, ຂ້ອຍຈະບໍ່ມີກຳລັງແຮງ ແລະ ບໍ່ມີຊີວິດຢູ່ໄດ້”.
ພ້ອມກັບການຕາມຫາລູກຂອງຜູ້ເປັນແມ່, ເຈົ້າໜ້າທີ່ຕຳຫຼວດຈີນກໍໄດ້ດຳເນີນການກວດກາຊອກຫາ Mao Yinເຊັ່ນດຽວກັນ, ອັນໄດ້ເຮັດໃຫ້ເຫດການຄັ້ງນີ້ກາຍເປັນເຫດການໂດ່ງດັງໄປທົ່ວປະເທດຈີນ.
ໃນເດືອນເມສາປີນີ້, ເຈົ້າໜ້າທີ່ ເມືອງ ຊີອານ ໄດ້ມີຂໍ້ມູນວ່າ: ມີຜົວເມຍຄູ່ໜຶ່ງບໍ່ມີລູກ ຢູ່ທີ່ມົນທົນ ເສສວນ ແລະ ໄດ້ຈ່າຍເງິນ 6.000 ຢວນ, ເພື່ອໄດ້ມາເດັກຄົນໜຶ່ງ ໃນຫຼາຍປີກ່ອນໜ້ານີ້ ຊື່ Gu Mouning ຊຶ່ງມີໜ້າຕາຄ້າຍຄືກັບ Mao Yin ທີ່ສຸດ. ຜົນການກວດສອບຈາກ DNA ສາມາດຢືນຢັນໄດ້ວ່າ Gu Mouning ແມ່ນກະໂຕ Mao Yin, ຊຶ່ງເປັນເດັກທີ່ຖືກລັກພາຕົວກ່ອນໜ້ານີ້ 32 ປີ ນັ້ນເອງ.
ວັນທີ 10 ພຶດສະພານີ້, ເຈົ້າໜ້າທີ່ຕຳຫຼວດ ໄດ້ແຈ້ງໃຫ້ Li Jingzhi ຮູ້ວ່າ ໄດ້ພົບເຫັນລູກຊາຍຂອງເຂົາແລ້ວ. “ນີ້ຄືຂອງຂວັນຊິ້ນໃຫ່ຍທີ່ບໍ່ສາມາດປະເມີນລາຄາໄດ້”, ປີນີ້ Li ມີອາຍຸ 60 ປີແລ້ວ.
ວັນທີ 18 ພຶດສະພານີ້, ແມ່-ລູກຄອບຄົວຂອງ Mao ໄດ້ພົບໜ້າພໍ້ຕາກັນດ້ວຍຄວາມສຸກທີ່ຫາຫຍັງປຽບບໍ່ໄດ້, ເຈົ້າໜ້າທີ່ຕຳຫຼວດໄດ້ຈັດໃຫ້ອອກລາຍການໃນໂທລະພາບຊ່ອງ CCTV. ນະໂອກາດ ທີ່ເຕົ້າຮວມກັນໃນຄອບຄົວນັ້ນ Li ເຕັມໄປດ້ວຍນໍ້າຕາ ແລະ ເວົ້າວ່າ: “ແມ່ຈະບໍ່ປະໃຫ້ລູກໄກແມ່ອີກ”. ປັດຈຸບັນ Mao Yin ໄດ້ກາຍເປັນເຈົ້າຂອງບໍລິສັດ ປະດັບປະດາ ຕົກແຕ່ງເຮືອນ ໃຫ້ຮູ້ວ່າ: ກຳລັງກະກຽມຈະຍ້າຍມາຢູ່ໃກ້ກັບພໍ່ແມ່.
ເຈົ້າໜ້າທີ່ຍັງສືບຕໍ່ຄົ້ນຫາເສັ້ນທາງຄ້າຂາຍ Mao Yin ຢູ່, ເພື່ອລົງໂທດຕໍ່ຜູ້ເຮັດໃຫ້ຄອບຄົວຂອງ Li ຖືກແຍກກັນ.
