ທ່ານ ທຣຳ ບອກ ອາເມລິກາພົບຜູ້ຕິດໂຄວິດ ຫລາຍທີ່ສຸດໃນໂລກ “ເປັນເລື່ອງດີ”
ປະທານາທິບໍດີ ທຣຳ ກ່າວ ຕົວເລກຄົນອາເມລິກາຕິດໂຄວິດຫລາຍກວ່າ 1,5 ລ້ານຄົນ ເປັນ “ເຄື່ອງໝາຍອັນຊົງກຽດ” ທີ່ອາເມລິກາກວດເຊື້ອໄດ້ຫລາຍ.
ປະທານາທິບໍດີ ໂດນັລ ທຣຳ ກ່າວລະຫວ່າງການຖະແຫລງຢູ່ທຳນຽບຂາວ ໂດຍລະບຸວ່າ: ຕົວເລກຜູ້ຕິດເຊື້ອໄວຣັສໂຄວິດ-19 ຢູ່ອາເມລິກາ ເພີ່ມຂຶ້ນຫລາຍກວ່າ 1,56 ລ້ານຄົນນັ້ນ ຖືເປັນເຄື່ອງໝາຍອັນຊົງກຽດ (badge of honor) ຈາກການທີ່ອາເມລິກາກວດຄັດກອງເຊື້ອທາງບຸກເປັນຈຳນວນຫລາຍ.
ຜູ້ນຳອາເມລິກາ ກ່າວວ່າ: ອາເມລິກາມີຜູ້ຕິດເຊື້ອສູງສູດໃນໂລກນັ້ນຖືເປັນເລື່ອງດີ ເພາະສະທ້ອນໃຫ້ເຫັນວ່າ: ລັດຖະບານມີການກວດຄົ້ນຫາຜູ້ຕິດເຊື້ອເປັນຈຳນວນຫລາຍ “ເມື່ອເຮົາມີຜູ້ຕິດເຊື້ອຈຳນວນຫລາຍ ຂ້ອຍບໍ່ໄດ້ເບິ່ງວ່າມັນຄືສິ່ງບໍ່ດີ, ແຕ່ຂ້ອຍເບິ່ງວ່ານັ້ນເປັນເລື່ອງດີ ເພາະໝາຍເຖິງປະເທດເຮົາກວດຫາຜູ້ຕິດເຊື້ອໄດ້ເປັນຈຳນວນຫລາຍ.. ຂ້ອຍເບິ່ງວ່າມັນຄືກາອັນຊົງກຽດ ທີ່ພິສູດຜົນງານ ແລະ ການເປັນມືອາຊີບທີ່ເຮົາເຮັດ”.
ທັງນີ້ ສຳລັບອາເມລິກາມີຜູ້ເສຍຊີວິດຈາກໄວຣັສໂຄວິດບໍ່ໜ້ອຍກວ່າ 91.000 ຄົນແລ້ວ ນັບແຕ່ອາເມລິກາພົບການຕິດເຊື້ອຄັ້ງທຳອິດໃນເດືອນກຸມພາຜ່ານມາ. ຂະນະທີ່ຮອດຕອນນີ້ ອາເມລິກາໄດ້ດຳເນີນການກວດຄັດກອງເຊື້ອໃນພົນລະເມືອງແລ້ວຫລາຍກວ່າ 11,5 ລ້ານຄົນ, ສ່ວນຈຳນວນຜູ້ປິ່ນປົວຫາຍດີມີຢ່າງໜ້ອຍ 297.000 ຄົນ, ເສຍຊີວິດ 92.258 ຄົນ.
