ສິງກະໂປພາດ ສົ່ງຜົນກວດໂຄວິດ 357 ຄົນໄຂ້ຜິດ
ລະບົບໄອທີເປັນເຫດ ເຮັດໃຫ້ສິງກະໂປສົ່ງຜົນກວດໂຄວິດ 357 ຄົນຜິດພາດ.
ໃນວັນທີ 18 ພຶດສະພາ, ກະຊວງສາທາລະນະສຸກສິງກະໂປອອກຖະແຫລງການຍອມຮັບຄວາມຜິດພາດ ຈາກກໍລະນີໃນວັນທີ 16 ພຶດສະພາຜ່ານມາ ລະບົບໄອທີໄດ້ສົ່ງຂໍ້ຄວາມແຈ້ງຜົນການກວດເຊື້ອໄວຣັສໂຄວິດ-19 ໄປຫາຜູ້ທີ່ເຂົ້າຮັບການຄັດກອງເຊື້ອຈຳນວນ 357 ຄົນ ຜິດພາດ.
ໂດຍຂໍ້ຄວາມທີ່ສົ່ງໄປລະບຸວ່າ: ທັງ 357 ຄົນນັ້ນມີຜົນທົດສອບເປັນບວກ ຫລື ຕິດເຊື້ອ. ເຖິງຢ່າງໃດກໍດີ, ທາງການສິງກະໂປໄດ້ຖະແຫລງຍອມຮັບຄວາມຜິດພາດ ແລະ ຂໍໂທດຕໍ່ຄວາມບົກຜ່ອງດັ່ງກ່າວທີ່ເກີດຂຶ້ນ ໂດຍໄດ້ສົ່ງຂໍ້ມູນຢືນຢັນຜົນການກວດທີ່ຖືກຕ້ອງກັບໄປໃຫ້ຜູ້ເຂົ້າຮັບການກວດອີກເທື່ອໜຶ່ງ ໂດຍແຊລແນລນິວອາຊີ ລະບຸວ່າ: ມີແຫລ່ງຂ່າວໃກ້ຊິດສອງຄົນ ເຊິ່ງກ່ອນໜ້ານີ້ໄດ້ຮັບແຈ້ງຜົນກວດຕິດເຊື້ອເປັນບວກ ແຕ່ພາຍຫລັງຜົນແຈ້ງຢືນຢັນວ່າເປັນລົບ ຫລື ບໍ່ພົບການຕິດເຊື້ອ.
ທັງນີ້ ສຳລັບສິງກະໂປມີລາຍງານຜູ້ຕິດເຊື້ອຫລາຍກວ່າ 28.000 ຄົນ, ປິ່ນປົວຫາຍດີແລ້ວເປັນສ່ວນໃຫຍ່. ຂະນະທີ່ຈຳນວນຜູ້ເສຍຊີວິດມີພຽງ 22 ຄົນ.
