ທ່ານ ທຣຳ ຂູ່ຕັດເງິນອຸດໜູນ WHO ຢ່າງຖາວອນ ໃນ 30 ວັນ
“ທ່ານ ໂດນັລ ທຣຳ” ຂູ່ຕັດເງິນອຸດໜູນອົງການອະນາໄມໂລກ (WHO) ຢ່າງຖາວອນພາຍໃນ 30 ວັນ ແລະ ອາດຖອນຕົວຈາກການເປັນສະມາຊິກ WHO ນຳອີກ ໃນຂະນະທີ່ທົ່ວໂລກກຳລັງຕໍ່ສູ້ກັບໂຄວິດ-19.
ປະທານາທິບໍດີ ໂດນັລ ທຣຳ ຂອງອາເມລິກາ ສົ່ງຈົດໝາຍເຖິງທ່ານ ດຣ. ທີໂດສ ອັດຮານອມ ກີບຣີເຢຊຸສ ຜູ້ອຳນວຍການໃຫຍ່ຂອງອົງການອະນາໄມໂລກ (WHO) ໃນວັນທີ 18 ພຶດສະພາວ່າ: ອາເມລິກາ ຈະຕັດເງິນອຸດໜູນໃຫ້ WHO “ຢ່າງຖາວອນ” ເພາະ WHO ຍັງບໍ່ແກ້ໄຂຂໍ້ບົກຜ່ອງຂອງອົງກອນທີ່ແກ້ໄຂສະຖານະການໂຄວິດ-19 ລະບາດຜິດພາດຢ່າງຮ້າຍແຮງ ແລະ ປົກປິດການແຜ່ລະບາດຂອງພະຍາດນີ້.
ໃນຈົດໝາຍດັ່ງກ່າວ, ປະທານາທິບໍດີອາເມລິກາ ລະບຸວ່າ: ຈາກການທົບທວນຂອງລັດຖະບານອາເມລິກາກ່ຽວກັບການກວດສອບຂອງ WHO ໃນສະຖານະການໂຄວິດ-19 ເນັ້ນເຖິງຄວາມກັງວົນຮ້າຍແຮງຫລາຍຢ່າງທີ່ທ່ານເຄີຍຍົກຂຶ້ນເປັນເຫດຜົນໃນການໂຈະຈ່າຍເງິນອຸດໜູນ WHO ໃນກາງເດືອນເມສາ.
ທັງນີ້ ຜູ້ນຳອາເມລິກາລະບຸໃນຈົດໝາຍອີກວ່າ: ຖ້າ WHO ຍັງບໍ່ແກ້ໄຂຂໍ້ກັງວົນເຫລົ່ານີ້ພາຍໃນ 30 ວັນ, ອາເມລິກາຈະຕັດເງິນອຸດໜູນຖາວອນ ແລະ ຈະທົບທວນການເປັນປະເທດສະມາຊິກ WHO ນຳອີກ.
