ທ່ານ ສີຈິ້ນຜິງ ໃຫ້ຄຳໝັ້ນຈະປ່ອຍ ວັກແຊງໃຫ້ເຂົ້າເຖິງທົ່ວໂລກ
ຜູ້ນຳຈີນໃຊ້ໂອກາດຊີ້ແຈງຕໍ່ຊາວໂລກໃນກອງປະຊຸມອອນລາຍຄັ້ງທຳອິດຂອງອົງການອະນາໄມໂລກ ຫລັງຈາກເກີດຄວາມເຂົ້າໃຈຜິດກ່ຽວກັບຈີນຫລາຍຢ່າງ.
ປະທານປະເທດ ສີຈິ້ນຜິງ ຂອງຈີນ ກ່າວລະຫວ່າງກອງປະຊຸມອອນລາຍຄັ້ງທຳອິດຂອງອົງການອະນາໄມໂລກວ່າ: ຈະເປີດໂອກາດໃຫ້ປະເທດອື່ນໆ ເຂົ້າເຖິງວັກແຊງຢ່າງແນ່ນອນ ຖ້າຈີນພັດທະນາໄດ້ສຳເລັດ.
“ການພັດທະນາ ແລະ ການໃຊ້ວັກແຊງຂອງ Covid-19 ເມື່ອກາຍເປັນຄວາມຈິງແລ້ວ ໃນປະເທດຈີນຈະເປັນສິນຄ້າທີ່ເຂົ້າເຖິງໄດ້ທົ່ວໂລກ ເຊິ່ງຈະເປັນການສະໜັບສະໜູນຂອງຈີນໃນການຮັບຮອງການເຂົ້າເຖິງວັກແຊງ ແລະ ຄວາມສາມາດໃນການເຂົ້າເຖິງ (ວັກແຊງ) ຂອງປະເທດກຳລັງພັດທະນາ” ທ່ານ ສີຈິ້ນຜິງ ກ່າວໃນກອງປະຊຸມສະມັດຊາອະນາໄມໂລກ (World Health Assembly).
ທ່ານ ສີຈິ້ນຜິງ ຍັງກ່າວສະໜັບສະໜູນການສືບສວນແຫລ່ງທີ່ມາຂອງໄວຣັສຂອງປະຊາຄົມໂລກ ໂດຍກ່າວວ່າ: ຈີນສະໜັບສະໜູນການປະເມີນຜົນການລະບາດທີ່ຄວບຄຸມ ຫລັງຈາກສິ້ນສຸດການລະບາດແລ້ວ ແລະ ຢືນຢັນວ່າ: ຈີນມີທັດສະນະທີ່ເປີດເຜີຍ, ໂປ່ງໃສ ແລະ ຮັບຜິດຊອບ ແລະ ແບ່ງປັນຂໍ້ມູນກ່ຽວກັບໄວຣັສໃນເວລາທີ່ເໝາະສົມແລ້ວ.
ນອກຈາກນີ້ ທ່ານຍັງໃຫ້ຄຳໝັ້ນວ່າ: ຈີນຈະມອບເງິນ 2.000 ລ້ານໂດລາສະຫະລັດ ໃນໄລຍະເວລາສອງປີ ເພື່ອຕໍ່ສູ້ກັບໄວຣັສ ລວມທັງສະໜັບສະໜູນການພັດທະນາເສດຖະກິດ ແລະ ສັງຄົມໃນປະເທດທີ່ໄດ້ຮັບຜົນກະທົບ ໂດຍສະເພາະປະເທດກຳລັງພັດທະນາ.
