ກອງປະຊຸມປຶກສາຫາລືທາງໄກ ອາຊຽນ-ອົດສະຕຣາລີ ຄັ້ງທີ 32 (32nd ASEAN-Australia Forum via Video-Conference)

ໃນວັນທີ 18 ພຶດສະພາ 2020, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້ນຳຄະນະ ເຂົ້າຮ່ວມກອງປະຊຸມປຶກສາຫາລື ອາຊຽນ-ອົດສະຕຣາລີ ຄັ້ງທີ 32 ແບບທາງໄກ, ຢູ່ທີ່ ກະຊວງການຕ່າງປະເທດ ພາຍໃຕ້ການເປັນປະທານຮ່ວມ ຂອງ ມາເລເຊຍ ແລະ ອົດສະຕຣາລີ. ເພື່ອຕີລາຄາຜົນການຈັດຕັ້ງປະຕິບັດແຜນການຮ່ວມມື ອາຊຽນ-ອົດສະຕຣາລີ ໃນໄລຍະຜ່ານມາ, ໂດຍສະເພາະການຈັດຕັ້ງປະຕິບັດ ແຜນປະຕິບັດງານຮ່ວມມື ອາຊຽນ-ອົດສະຕຣາລີ ໄລຍະ 2020-2024 ໂດຍກວມລວມເອົາທັງສາມເສົາຄ້ໍາແຫ່ງການສ້າງປະຊາຄົມອາຊຽນຄື: ດ້ານການເມືອງ-ຄວາມໝັ້ນຄົງ, ດ້ານເສດຖະກິດ ແລະ ດ້ານວັດທະນະທຳ-ສັງຄົມ. ພ້ອມນີ້, ກອງປະຊຸມໄດ້ ເປັນເອກະພາບກັນ ຕໍ່ທິດທາງແຜນການຮ່ວມມື ອາຊຽນ-ອົດສະຕຣາລີ ໃນຕໍ່ໜ້າ, ຊຶ່ງ ຈະພ້ອມກັນສືບຕໍ່ຈັດຕັ້ງປະຕິບັດ ແຜນປະຕິບັດງານອາຊຽນ-ອົດສະຕຣາລີ ໄລຍະ 2020-2024 ແລະ ບາງຂົງເຂດບູລິມະສິດ, ເປັນຕົ້ນ: ການຕ້ານການກໍ່ການຮ້າຍ ແລະ ອາຊະຍາກຳຂ້າມຊາດ, ຄວາມໝັ້ນຄົງທາງຄອມພິວເຕີ, ການເຊື່ອມຈອດອາຊຽນ, ສັນຍາການຮ່ວມມືເສດຖະກິດຮອບດ້ານລະດັບພາກພື້ນ ຫຼື RCEP, ອຸດສາຫະກຳ 4.0, ການຮັດແຄບຄວາມແຕກໂຕນດ້ານການພັດທະນາ, ການສຶກສາ, ສາທາລະນາສຸກ, ການໄປມາຫາສູ່ລະຫວ່າງປະຊາຊົນດ້ວຍກັນ, ບັນຫາການປ່ຽນແປງຂອງດິນຟ້າອາກາດ, ການຮ່ວມມືໃນຂອບແມ່ນ້ຳຂອງ ແລະ ອື່ນໆ.

ພ້ອມນີ້ກອງປະຊຸມຍັງ ໄດ້ປຶກສາຫາລື ແລະ ແຈ້ງໃຫ້ກັນຊາບ ກ່ຽວກັບສະພາບການ ກໍ່ຄືມາດຕະການ ແລະ ບົດຮຽນທີ່ດີຂອງແຕ່ລະປະເທດສະມາຊິກອາຊຽນ ແລະ ອົດສະຕຣາລີ ໃນການສະກັດກັ້ນ, ເຝົ້າລະວັງ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19. ກອງປະຊຸມໄດ້ແລກປ່ຽນຄວາມຄິດເຫັນ ຕໍ່ບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ ເພື່ອປະກອບສ່ວນເຂົ້າໃນການຮັກສາສັນຕິພາບ ແລະ ຄວາມໝັ້ນຄົງຂອງພາກພື້ນ ກໍ່ຄືໃນໂລກ ເປັນຕົ້ນແມ່ນ ການສືບຕໍ່ສົ່ງເສີມລະບົບການຄ້າຫຼາຍຝ່າຍ, ໂຄງສ້າງພາກພື້ນ ທີ່ອາຊຽນເປັນຜູ້ນຳພາ, ເອກະສານແນວຄວາມຄິດ ອາຊຽນ ວ່າດ້ວຍ ອິນໂດ-ປາຊີຟິກ ແລະ ບັນຫາອື່ນໆ.

ກອງປະຊຸມໄດ້ເຫັນດີ ຈັດກອງປະຊຸມທາງໄກ ໃນລະດັບລັດຖະມົນຕີຕ່າງປະເທດ ອາຊຽນ-ອົດສະຕາລີ ວ່າດ້ວຍການຕ້ານການແຜ່ລະບາດຂອງພະຍາດ ໂຄວິດ-19 ຂຶ້ນໃນວັນທີ 4 ມິຖຸນາທີ່ຈະມາເຖິງນີ້ ແລະ ຍັງໄດ້ກະກຽມໃຫ້ແກ່ ກອງປະຊຸມລັດຖະມົນຕີຕ່າງປະເທດ ອາຊຽນ – ອົດສະຕຣາລີ ທີ່ຈະມີຂຶ້ນ ໃນເດືອນສິງຫາ 2020 ນີ້ ທີ່ ສ.ສ. ຫວຽດນາມອີກດ້ວຍ.