9 ວິທີ ຮັກແນວໃດບໍ່ໃຫ້ເປັນທຸກ.
May 18, 2020 - 2:59 PM
- ຄວນມີຄວາມສຸກໄດ້ດ້ວຍຕົນເອງ ຄົນອື່ນເປັນພຽງໂບນັດທີ່ເພີ່ມເຂົ້າມາ.
- ຄວນປາຖະໜາດີໃຫ້ຄົນອື່ນເກີດຄວາມສຸກນຳ ບໍ່ແມ່ນຄິດເຖິງແຕ່ຄວາມສຸກຂອງໂຕເຮົາເອງ ເຊັ່ນ : ເມື່ອຄົນທີ່ເຮົາຮັກບໍ່ຮັກເຮົາ ແຕ່ເຂົາມີຄວາມສຸກຂອງເຂົາ ເຖິງເຮົາຈະໂສກເສົ້າກໍຍັງຄິດໄດ້ວ່າ ຢ່າງໜ້ອຍກໍໄດ້ເຫັນຄົນທີ່ເຮົາຮັກມີຄວາມສຸກ.
- ຫລຸດຄວາມຄາດຫວັງ ເຖິງວ່າເຮົາຈະເປັນຄົນທຳມະດາ ເຊິ່ງຄົງຕັດຄວາມຄາດຫວັງບໍ່ໄດ້, ແຕ່ຖ້າເຮົາຍິ່ງຄາດຫວັງຈາກອີກຝ່າຍໜຶ່ງໜ້ອຍ ໂອກາດທີ່ເຮົາຈະສົມຫວັງກໍຍິ່ງມີຫລາຍຂຶ້ນ.
- ຍອມຮັບຄວາມແຕກຕ່າງ ທັງທາງດ້ານຮ່າງກາຍ ແລະ ຄວາມຄິດຂອງຜູ້ອື່ນ, ຄວາມຄິດບໍ່ກົງກັນນັ້ນຖືເປັນເລື່ອງທຳມະຊາດ ຫາກຝ່າຍໜຶ່ງບໍ່ພະຍາຍາມເຮັດໃຫ້ອີກຝ່າຍໜຶ່ງຄິດຄືກັນ ແລະ ພະຍາຍາມເຂົ້າໃຈວ່າຍ້ອນສາເຫດໃດຈຶ່ງເຫັນຕ່າງກັນ ບັນຫາກໍຈະບໍ່ເກີດ ຫາກເຂົ້າໃຈ ແລະ ຍອມຮັບໄດ້ແລ້ວ ເມື່ອເຫັນເຂົາເຮັດໂຕບໍ່ຖືກໃຈ, ບໍ່ໜ້າຮັກ, ມັກຈົ່ມ, ໃຈຮ້ອນ ເຮົາກໍຈະປັບໂຕໃຫ້ເຂົ້າກັບເຂົາ ແລະ ມອບຄວາມຮັກໃຫ້ໄດ້ງ່າຍຂຶ້ນ.
- ຮູ້ຈັກຍອມຮັບຄວາມປ່ຽນແປງຕ່າງໆ ຄວາມຮັກຈຶ່ງຈະຍືນຍາວ ເພາະຄວາມປ່ຽນແປງເປັນທຳມະດາຂອງໂລກ. ເພງທີ່ມັກ ຟັງຕະຫລອດ, ອາຫານຈານປະຈຳ ກິນຫລາຍກໍເບື່ອ, ຄວາມຮັກທີ່ເຄີຍຫວານຊຶ້ງອາດຈືດຈາງລົງ, ແຕ່ຍັງຄົງຄວາມຜູກພັນ ແລະ ສຳພັນອັນດີ ຫລືແມ່ນແຕ່ຈະເລີກລາຢ່າຮ້າງ ບາງຄູ່ກໍຍັງເປັນໝູ່ຮູ້ໃຈຕໍ່ກັນໄດ້.
- ບໍ່ຄວນເຮັດແຕ່ສິ່ງທີ່ຕົນເອງມັກ ຫລື ສິ່ງທີ່ຕົນຄິດວ່າດີໃຫ້ຄົນອື່ນພຽງຢ່າງດຽວ ຈະຕ້ອງເບິ່ງເຖິງຄວາມຕ້ອງການຂອງເຂົານຳ ຈະໄດ້ບໍ່ຕ້ອງມານ້ອຍໃຈວ່າເຮົາອົດສາຫວັງດີ ຍອມອິດເມື່ອຍເຮັດເພື່ອເຂົາ ແຕ່ເຂົາຊຳ້ພັດບໍ່ເຫັນຄຸນຄ່າ.
- ຄວາມເກງໃຈເປັນອົງປະກອບສຳຄັນ ຄວນເອົາໃຈເຂົາມາໃສ່ໃຈເຮົາ ເພາະຄົນໃກ້ຊິດສະໜິດກັນ ມັກຄິດວ່າຈະສາມາດເຮັດຫຍັງຕາມໃຈຕົນເອງໄດ້ເກືອບທຸກເລື່ອງ ຈົນລືມນຶກເຖິງຄວາມຮູ້ສຶກຂອງອີກຄົນໄປ.
- ເວົ້າຈາຍ້ອງຍໍຊື່ນຊົມໃນສິ່ງດີຂອງກັນ ແລະ ກັນ ເປັນອີກໜຶ່ງວິທີມອບຄວາມຮັກທີ່ຄວນເຮັດ ບາງຄົນຖືເບົາວ່າຢູ່ນຳກັນມາດົນ ເລື່ອງດີເຂົາຄົງຮູ້ຢູ່ແລ້ວ ບໍ່ຕ້ອງຍ້ອງຍໍຊົມເຊີຍ ຈຶ່ງເມົາແຕ່ເວົ້າເຖິງສິ່ງທີ່ບໍ່ດີ ຫລື ຢາກໃຫ້ອີກຝ່າຍປ່ຽນແປງ, ເມົາແຕ່ຈົ່ມ ແລະ ຕຳໜິ ໂດຍບໍ່ເຄີຍຍ້ອງຍໍຊົມເຊີຍ ຄົນຟັງກໍທໍ້ໃຈໄດ້ຄືກັນ.
- ການສະແດງອອກຂອງຄວາມຮັກ ຖ້າຮັກແລ້ວບໍ່ສະແດງອອກເລີຍ ອີກຝ່າຍຄົງບໍ່ຮູ້ ເພາະເຂົາບໍ່ມີຕາທິບ, ແຕ່ການສະແດງຄວາມຮູ້ສຶກແບບໃດ, ເທົ່າໃດ ຄົງຕ້ອງເບິ່ງວ່າເປັນສິ່ງທີ່ອີກຝ່າຍຕ້ອງການນຳ ສ່ວນຄວາມຕ້ອງການຂອງເຮົາກໍຄວນບອກໄປໂດຍກົງ ບໍ່ແມ່ນຄາດຫວັງໃຫ້ຄູ່ຂອງເຮົາເປັນໝໍດູໝໍມໍຈອບເດົາໃຈ ແລະ ຖ້າຈະຮັກໃຫ້ດີຕໍ່ສຸຂະພາບຈິດທຸກທ່ານຄວນຄິດໃຫ້ຄວາມຮັກເປັນດອກໄມ້ງົດງາມ, ເປັນຂອງຫວານສຳລັບຊີວິດ ຢ່າຍຶດຕິດວ່າເປັນທຸກສິ່ງທຸກຢ່າງ, ຢ່າຄິດວ່າຮັກເປັນເຂົ້າປາອາຫານ ຫລື ອາກາດທີ່ຂາດບໍ່ໄດ້.
ຢາກໃຫ້ຄົນທີ່ມີຄວາມທຸກຍ້ອນຄວາມຮັກຄິດນຳວ່າ ກ່ອນທີ່ຈະມາພົບພໍ້ຄົນຮັກຍັງມີພໍ່ແມ່ພີ່ນ້ອງເພື່ອນພ້ອງ ແລະ ຄົນອື່ນອີກຫລວງຫລາຍທີ່ເຮົາຮັກ ແລະ ຮັກເຮົາ, ຢ່າໃຫ້ຄົນພຽງຄົນດຽວເປັນທຸກສິ່ງທຸກຢ່າງ ແລ້ວປ່ອຍໃຫ້ເກີດເຫດການທີ່ບໍ່ດີຂຶ້ນ.
