“ກຳປູເຈຍ” ຢືນຢັນ “ຜູ້ຕິດເຊື້ອທຸກຄົນຫາຍດີ – ບໍ່ມີຜູ້ຕິດເຊື້ອເພີ່ມ”
ກຳປູເຈຍ ເຜີຍ ຜູ້ຕິດເຊື້ອໂຄວິດ-19 ໃນປະເທດ ທຸກຄົນຫາຍດີແລ້ວ ໂດຍບໍ່ມີຜູ້ຕິດເຊື້ອເພີ່ມ.
ກະຊວງສາທາລະນະສຸກກຳປູເຈຍ ເປີດເຜີຍໃນວັນທີ 16 ພຶດສະພາວ່າ: ຜູ້ຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ຄົນສຸດທ້າຍຂອງກຳປູເຈຍຫາຍດີ ແລະ ອອກຈາກໂຮງໝໍແລ້ວ ເຊິ່ງເຮັດໃຫ້ກຳປູເຈຍເປັນປະເທດໃນພາກພື້ນອາຊີຕາເວັນອອກສຽງໃຕ້ທີ່ມີຜູ້ຕິດເຊື້ອໂຄວິດ-19 ເປັນສູນ.
ຜູ້ຕິດເຊື້ອຄົນດັ່ງກ່າວ ເປັນຍິງສາວ ອາຍຸ 36 ປີ ເປັນຄົນແຂວງບັນເຕຍມຽນເຈຍ ເຊິ່ງແພດໄດ້ອະນຸຍາດໃຫ້ອອກຈາກໂຮງໝໍກັບໄປໃຊ້ຊີວິດເປັນປົກກະຕິ ຫລັງຈາກເຂົ້າຮັບການປິ່ນປົວຢູ່ໂຮງໝໍໃນນະຄອນຫລວງພະນົມເປັນ.
ໂດຍໃນຖະແຫລງການຂອງສາທາລະນະສຸກກຳປູເຈຍ ລະບຸວ່າ: ປັດຈຸບັນຍັງບໍ່ມີການຫລຸດຜ່ອນມາດຕະການສະກັດກັ້ນການແຜ່ລະບາດໄວຣັສໂຄໂຣນາສາຍພັນໃໝ່ ລວມທັງຍັງປິດໂຮງຮຽນ ແລະ ຈຸດກວດບໍລິເວນຊາຍແດນລະຫວ່າງປະເທດ.
ຜ່ານມາ ກຳປູເຈຍ ພົບຜູ້ຕິດເຊື້ອໂຄວິດ-19 ທັງໝົດ 122 ຄົນ ໂດຍບໍ່ມີຜູ້ເສຍຊີວິດ ນັບແຕ່ໄວຣັສດັ່ງກ່າວໄດ້ແຜ່ລະບາດຈາກເມືອງອູ່ຮັ່ນ ປະເທດຈີນ ເຮັດໃຫ້ມີຜູ້ຕິດເຊື້ອທົ່ວໂລກ 4,6 ລ້ານກວ່າຄົນ ແລະ ຂ້າຊີວິດໄປຫລາຍກວ່າ 300.000 ຄົນ.
ກ່ອນໜ້ານີ້ ໄດ້ມີການທົດສອບເພື່ອກວດຫາຜູ້ຕິດເຊື້ອໂຄວິດ-19 ຈຳນວນ 14.684 ຄົນ ນັບແຕ່ເດືອນມັງກອນຜ່ານມາ ໂດຍພົບຜູ້ຕິດເຊື້ອຄົນຫລ້າສຸດໃນວັນທີ 12 ເມສາຜ່ານມາ.
