ປະເທດ ຊີເລ ຂຸດຂຸມໄວ້ຖ້າຝັງຄົນຕາຍຈາກໂຄວິດ-19

ໂດຍ: ລູກເມືອງພວນ

ປະເທດ ຊີເລ ໄດ້ຂຸດຂຸມໄວ້ຖ້າຝັງຄົນຕາຍຈາກພະຍາດໂຄວິດ-19 ຕັ້ງຫຼາຍພັນຂຸມໃນປ່າຊ້າໃນນະຄອນຫຼວງ Santiago ເພື່ອໄວ້ຖ້າຄົນຕິດເຊື້ອໂຄວິດ ທີ່ເພີ່ມຂຶ້ນຢ່າງຕໍ່ເນື່ອງ.

Rashid Saud ຫົວໜ້າປ່າຊ້າ ໃຫ່ຍທີ່ສຸດໃນນະຄອນຫຼວງ Santiago ຂອງ ຊີເລ ກ່າວ ເມື່ອວັນທີ 14 ພຶດສະພານີ້ວ່າ: “ພວກເຮົາຄິດວ່າ, ຊ່ວງນີ້ ເປັນຊ່ວງເວລາແຫ່ງປະຫວັດສາດ ຊຶ່ງມີຄວາມຕ້ອງການຫຼຸມຝັງສົບຫຼາຍທີ່ສຸດ, ພາຍຫຼັງທີ່ພວກເຮົາໄດ້ພິສູດກັບຕາສິ່ງທີ່ເກີດຂຶ້ນກັບປະເທດນີ້”.

ພະນັກງານໃນປ່າຊ້າແຫ່ງນີ້ ໄດ້ຂຸດຂຸມສົບໄວ້ຫຼາຍກວ່າ 2.000 ຂຸມເພື່ອຮັບມືກັບ ໂຄວິດ-19. ຊຶ່ງພະຍາດດັ່ງກ່າວໄດ້ຂ້າຊິວິດຄົນໃນປະເທດນີ້ໄປແລ້ວ 360 ຄົນ ເລີ່ມແຕ່ວັນທີ 3 ມີນາເປັນຕົ້ນມາ. ໃນຂະນະນີ້ ຊີເລ ມີຜູ້ຕິດເຊື້ອທັງໝົດຫຼາຍກວ່າ  37.000 ກໍລະນີ.

Saud ກ່າວວ່າ: “ພວກເຮົາຖອດບົດຮຽນຈາກປະເທດອື່ນໆ ຈົນເຖິງຂັ້ນວ່າໄດ້ຝັງລວມໝູ່ ຫຼື ມີບາງປະເທດຕາຍກອງກັນຕາມຖະໜົນຫົນທາງ. ສິ່ງເຫຼົ່ານັ້ນແມ່ນພວກເຮົາຈະຫຼີກເວັ້ນທີ່ສຸດ ແລະ ມີຄວາມຫວັງວ່າຈະບໍ່ໄດ້ນຳໃຊ້ທັງໝົດ”.