ສະພາບປ້ອງກັນພະຍາດໂຄວິດ-19 ຂອງສັງຄົມພາຍຫຼັງມີການຜ່ອນຜັນບາງມາດຕະການຂອງລັດຖະບານ ໄລຍະທີ່ I
ໂດຍ: ລູກເມືອງພວນ
ພາຍຫຼັງມີການປະກາດຜ່ອນຜັນບາງມາດຕະການຂອງລັດຖະບານ ໃນການປ້ອງກັນ, ຕ້ານ ແລະ ສະກັດກັ້ນ ເຊື້ອໄວຣັສໂຄວິດ-19 ໄລຍະ I, ແຕ່ວັນທີ 4 ພຶດສະພາຫາວັນທີ 17 ພຶດສະພາ. ສັງເກດເຫັນວ່າ ມາດຕະການພື້ນຖານທີ່ທາງລັດຖະບານ ກໍຄືຄະນະສະເພາະກິດແນະນຳໃຫ້ຈັດຕັ້ງປະຕິບັດເປັນປົກກະຕິຄື: ອອກນອກບ້ານຕ້ອງໃສ່ຜ້າອັດປາກ-ດັງ, ຢູ່ຕາມສະຖານທີ່ບໍລິການຕ່າງໆ ຕ້ອງມີເຄື່ອງວັດແທກອຸນຫະພູມ, ມີເຈວ, ມີນໍ້າເຫຼົ້າ 90, ມີສະບູລ້າງມື, ໃສ່ຜ້າອັດປາກ-ດັງ ແລະ ປະຕິບັດໄລຍະຫ່າງທາງສັງຄົມ…ແຕ່ປາກົດວ່າ ປະຕິບັດໄດ້ໜ້ອຍທີ່ສຸດ, ແຕ່ກໍບໍ່ປະຕິເສດມີບາງຫ້າງຮ້ານບໍລິການຈຳນວນໜຶ່ງກໍປະຕິບັດໄດ້ດີ, ແຕ່ຈຳນວນຫຼາຍແມ່ນບໍ່ສາມາດປະຕິບັດໄດ້ເລີຍ, ເປັນຕົ້ນແມ່ນຢູ່ຕາມຕະຫຼາດ, ຫ້າງຊັບພະສິນຄ້າ, ໃນລົດໂດຍສານ, ຮ້ານອາຫານ…
ພຽງແຕ່ໄລຍະ I ຊຶ່ງບໍ່ທັນປົດລ໊ອກທັງໝົດ ແຕ່ສັງເກດເຫັນວ່າ ປະຊາຊົນ, ສັງຄົມທົ່ວໄປມີການເຄື່ອນໄຫວດຳລົງຊີວິດເປັນປົກະຕິແລ້ວ ຊຶ່ງບໍ່ຕ່າງຫຍັງກັບ ກ່ອນເມື່ອບໍ່ທັນມີການປະກາດມາດຕະການເຂັ້ມງວດຂອງລັດຖະບານ.
ສິ່ງທີ່ສັງຄົມຍາກທີ່ຈະປະຕິບັດໄດ້ນັ້ນກໍຄື: ການປະຕິບັດໄລຍະຫ່າງທາງສັງຄົມ, ມີເຄື່ອງວັດແທກອຸນຫະພູມ, ຕ້ອງມີເຈວ, ນໍ້າເຫຼົ້າ 90, ສະບູລ້າງມື. ເພາະສິ່ງເຫຼົ່ານີ້ ມັນຮຽກຮ້ອງຕ້ອງໄດ້ລົງທຶນຈຳນວນໜຶ່ງ ຈຶ່ງເປັນບັນຫາຍາກສຳລັບປະຊາຊົນ.
ເຖິງຢ່າງໃດກໍຕາມ, ໂດຍພາບລວມແລ້ວ, ທຸກຄົນຍັງມີສະຕິປ້ອງກັນດ້ວຍຕົນເອງໄດ້ດີ, ມີຄວາມລະມັດລະວັງໃນການໃກ້ສິດສຳຜັດກັບສັງຄົມ, ອຳນາດການປົກຄອງຍັງລະດົມໃຫ້ປະຊາຊົນຈັດຕັ້ງປະຕິບັດມາດຕະການຂອງລັດຖະບານທີ່ຍັງບໍ່ທັນໄດ້ຜ່ອນຜັນໃຫ້ເຂັ້ມງວດ, ການຕັ້ງດ່ານກວດກາລະຫວ່າງແຂວງຕໍ່ແຂວງຍັງດຳເນີນປົກະຕິ ແລະ ອັນທີ່ສຳຄັນປະຊາຊົນຍັງຕິດຕາມຂ່າວຄາວ ຂໍ້ມູນຂ່າວສານຈາກສື່ຕ່າງໆເປັນປະຈຳ ແລະ ທັນການ.
ໃກ້ຈະຮອດຝັ່ງແລ້ວ, ພວກເຮົາຈົ່ງພ້ອມກັນຈັດຕັ້ງປະຕິບັດຕາມການແນະນຳຂອງລັດຖະບານໃຫ້ເຄັ່ງຄັດ, ພວກເຮົາຈະໄດ້ຮັບໄຊຊະນະຢ່າງແນ່ນອນ. ຂໍຢ່າໃຫ້ເຮືອຫຼົ້ມບາດຈອດພີ່ນ້ອງເອີຍ.
