“ທະວິດເຕີ” ປະກາດສັ່ງໃຫ້ພະນັກງານ Work from Home ໄດ້ຕະຫລອດຊີວິດ
“ທະວິດເຕີ” ປະກາດສັ່ງໃຫ້ພະນັກງານເຮັດວຽກຢູ່ເຮືອນ(Work from Home) ໄດ້ຕະຫລອດຊີວິດ.
ເປັນປະເດັນທີ່ຖືກເວົ້າຢ່າງຫລາຍ ແລະ ເປັນໜຶ່ງໃນວິຖີຊີວິດທີ່ໂລກເຮົາກຳລັງຮູ້ກັນຫລາຍຂຶ້ນວ່າ New Normal ໜຶ່ງໃນນັ້ນຄືຮູບແບບ “ການເຮັດວຽກຢູ່ເຮືອນ” ຫລື Work from Home (WFH) ທີ່ເພີ່ມຫລາຍຂຶ້ນນັ້ນເພາະສ່ວນໜຶ່ງຄືມາດຕະການດຽວທີ່ໂລກເຫັນນຳກັນວ່າ: ການເວັ້ນໄລຍະຫ່າງລະຫວ່າງກັນເປັນເລື່ອງສຳຄັນໃນການປ້ອງກັນໂຕເອງຈາກໄວຣັສໂຄວິດ-19.
ທະວິດເຕີ (Twitter) ແພລໂຊຊຽມມີເດຍ ທີ່ມີຄົນໃຊ້ຫລາຍໃນທົ່ວໂລກ, ຜ່ານສໍານັກງານຄວບຄຸມລະບົບໃຫຍ່ທີ່ສະຫະລັດອາເມລິກາ ແລະ ໄດ້ ພັກດັນໃຫ້ພະນັກງານຂອງພວກເຂົາເຮັດວຽກຢູ່ເຮືອນຂອງຕົນໃຫ້ຫລາຍຂຶ້ນພາຍຫລັງ ການແຜ່ລະບາດຂອງພະຍາດໂຄວິດ-19 , ແຕ່ມາຮອດປັດຈຸບັນທະວິດເຕີ ໄດ້ປະກາດນະໂຍບາຍໃໝ່ໃຫ້ກັບຄົນໃນອົງກອນ ໂດຍໃຈຄວາມຄື “ຫາກພະນັກງານຂອງທະວິດເຕີຄົນໃດ ຕ້ອງການ Work from Home ໄປຕະຫລອດຊີວິດ ກໍສາມາດເຮັດໄດ້ ”
ແຈ໊ກ ຄໍຊີ ຄົນກໍ່ຕັ້ງ ໃນຖານະ ຊີອີໂອ ຂອງທະວິດເຕີ ເວົ້າກັບພະນັກງານຂອງເຂົາໃນວັນທີ 12 ພຶດສະພານີ້ ວ່າ: ຫາກສະຖານນະການໂຄວິດ-19 ສິ້ນສຸດໄປແລ້ວ ໃຜທີ່ຢາກຈະເຮັດວຽກຢູ່ເຮືອນ (WFH) ຕໍ່ໄປກໍບໍ່ເປັນບັນຫາຂອງອົງກອນທະວິດເຕີ ພ້ອມອຳນວຍຄວາມສະດວກໃຫ້ເຕັມທີ່, ເຫດຜົນກໍເພື່ອການກະຈາຍອໍານາດ, ບໍ່ໃຫ້ພະນັກງານຂອງຕົນຍຶດຕິດຢູ່ກັບສູນກາງ ໄປຕະຫລອດພ້ອມສະໜັບສະໜູນໃຫ້ຄົນເຮັດວຽກຢູ່ໃສກໍໄດ້.
“2-3 ເດືອນຜ່ານມາທີ່ທະວິດເຕີ ໄດ້ປິດສໍານັກງານໄປ ແລະ ກໍເຫັນວ່າການເຮັດວຽກຢູ່ເຮືອນນັ້ນແມ່ນສາມາດເຮັດໄດ້ແທ້ ແຕ່ຂະນະດຽວກັນຖ້າໃຜບໍ່ສະດວກກໍສາມາດເຂົ້າມາເຮັດວຽກຢູ່ຫ້ອງການໄດ້ທຸກເວລາ ເຖິງວ່າຈະຕ້ອງມີມາດຕະການການທີ່ເຂັ້ມງວດແບບເກົ່າກໍຕາມ” .
ສຳລັບຖານະຂອງສໍານັກງານໃຫຍ່ຫ້ອງການ ທະວິດເຕີ ຂະນະນີ້ຍັງຄົງປິດການເຂົ້າມາເຮັດວຽກຂອງພະນັກງານ, ແຕ່ຄາດວ່າຈະເປີດໃນເດືອນກັນຍານີ້ຫລັງມີການປະເມີນວ່າສະຖານະການໄວຣັສໂຄວິດ-19 ຈະດີຂຶ້ນໃນສະຫະລັດ ແຕ່ໃນສ່ວນກິດຈະກຳອື່ນໆ ໃນທະວິດເຕີໂດຍສະເພາະການປະຊຸມຍັງຄົງບໍ່ອະນຸຍາດໃຫ້ນັ່ງຮ່ວມໂຕະປະຊຸມນຳກັນ ໂດຍໃຫ້ເປັນການປະຊຸມຜ່ານລະບົບອອນລາຍໄປຈົນຮອດປີໜ້າ.
