ເສດຖະກິດລາວ ຖືກຜົນກະທົບໜັກຈາກ ໂຄວິດ-19
ໂດຍ: ລູກເມືອງພວນ
ໂດຍອີງຕາມການລາຍງານສະຖານະການແຜ່ລະບາດຂອງເຊື້ອໄວຣັສໂຄວິດ-19 ແລະ ຜົນກະທົບຕໍ່ດ້ານເສດຖະກິດ ໃນໄລຍະສັ້ນ, ກາງ ແລະ ຍາວໃນເດືອນ ເມສາ ຜ່ານມາ, ສະຖາບັນຄົ້ນຄວ້າເສດຖະກິດຂອງລາວໄດ້ຊີ້ແນະເຖິງພາກສ່ວນເສດຖະກິດພາຍໃນປະເທດທີ່ຈະໄດ້ຮັບຜົນກະທົບຈາກໂຄວິດ-19 ຊຶ່ງລວມມີຫຼາຍພາກສ່ວນ, ໃນນັ້ນ ພາກສ່ວນທີ່ໄດ້ຮັບຜົນກະທົບໂດຍກົງກໍຄື ຂະແໜງການທ່ອງທ່ຽວ, ການຄ້າ ແລະ ການລົງທຶນ.
ຂະແໜງເສດຖະກິດທີ່ໄດ້ຮັບຜົນກະທົບຢ່າງໜັກໜ່ວງທີ່ສຸດກໍຄື ບໍລິສັດຫານບິນລາວ, ທ່ອງທ່ຽວ, ການສຶກສາ, ໂຮງງານອຸດສາຫະກຳການຜະລິດຂະໜາດນ້ອຍ, ຂະໜາກກາງ, ການຄ້າ ແລະ ການສົ່ງອອກ. ລາຍຮັບຫລຸດລົງຢ່າງໜັກ ອັນເຮັດໃຫ້ຫຼາຍຫົວໜ່ວຍພາກທຸລະກິດ ບໍ່ສາມາດມີເງິນບໍລິຫານໄດ້ ເປັນຕົ້ນແມ່ນການໃຊ້ຈ່າຍເຂົ້າໃນການບໍລິຫານ, ຈ່າຍເງິນເດືອນ, ສຳລະໜີ້ໃຫ້ທະນາຄານ, ການເຊົ່າ, ການຊື້, ການຈ້າງ…ແຕ່ກໍບໍ່ໜັກໜ່ວງເທົ່າກັບປະເທດອື່ນໆ ເພາະເປັນຖານເສດຖະກິດຂະໜາດນ້ອຍ. ໂດຍໄດ້ຮັບຜົນກະທົບຈາກສອງເຫດການໃຫ່ຍ, ນອກຈາກໂຄວິດ-19 ແລ້ວ, ຂໍ້ຂັດແຍ່ງລະຫວ່າງຈີນ -ສະຫະລັດອາເມລິກາ-ອີຣານ ກໍເປັນອີກເຫດການໜຶ່ງທີ່ກະທົບໃສ່ເສດຖະກິດຂອງລາວ ເປັນຕົ້ນແມ່ນຂະແໜງ ຕັດຫຍິບ, ກາເຟ, ເຄື່ອງໄຟຟ້າຂອງລາວ.
ຫວ່າງມໍ່ໆມານີ້, ທະນາຄານພັດທະນາອາຊີ (ADB) ຄາດຄະເນການເຕີບໂຕທາງເສດຖະກິດຂອງລາວຢູ່ທີ່ 3.5% ໃນປີ 2020. ທະນາຄານໂລກກໍຄາດຄະເນວ່າເສດຖະກິດຂອງລາວຈະເຕີບໂຕຢູ່ທີ່ 3.6% (ຊໍ້າບໍ່ພໍຍັງຈະຫລຸດລົງ -2,2% – ໂດຍອີງຕາມການຕີລາຄາຂອງຜູ້ຊ່ຽວຊານ ທະນາຄານໂລກ). ໃນຂະນະດຽວ ກອງທຶນສາກົນ ຫຼື IMF ຍັງຕີລາຄາວ່າ ເສດຖະກິດຂອງລາວຈະເຕີບໂຕພຽງ 0,7% ເທົ່ານັ້ນ ໃນປີນີ້.
ຖ້າສະຖານະການໂຄວິດ-19 ຫາກແກ່ຍາວ ຈະສົ່ງຜົນກະທົບຢ່າງຮ້າຍແຮງຕໍ່ເສດຖະກິດຂອງລາວ, ພິເສດແມ່ນ ຈະດຶງມູນຄ່າການສົ່ງອອກຫລຸດລົງ ຈາກການຄາດຄະເນໄວ້ກ່ອນໜ້ານີ້. ໃນ 3 ເດືອນຕົ້ນປີນີ້ ມູນຄ່າການສົ່ງອອກຂອງລາວຫລຸດລົງ 410 ລ້ານໂດລາສະຫະລັດໃນເດືອນມັງກອນ, ຍັງເຫຼືອພຽງ 391 ລ້ານໂດລາໃນເດືອນກຸມພາ, 343 ລ້ານໂດລາ ໃນເດືອນມີນາ. ການສົ່ງອອກຕົ້ນຕໍມີ 2 ຕະຫຼາດໃຫ່ຍຄື ໄທ ແລະ ຫວຽດນາມເທົ່ານັ້ນ ແລະ ມີການຫລຸດລົງຢ່າງໜັກໜ່ວງ.
