ເມືອງທ່າແຕງ ທຳລາຍສິນຄ້າໝົດອາຍຸຫລາຍລາຍການ

ວັນທີ 12 ພຶດສະພານີ້, ຫ້ອງການອຸດສາຫະກໍາ ແລະ ການຄ້າເມືອງ ທ່າແຕງ ແຂວງ ເຊກອງ ໄດ້ຈັດພິທີທຳລາຍສິນຄ້າໝົດອາຍຸ, ສິນຄ້າເຊື່ອມຄຸນ, ສິນຄ້າປອມແປງລອກຮຽນແບບ ແລະ ສິນຄ້າທີ່ນຳເຂົ້າບໍ່ຖືກຕ້ອງຈຳນວນຫລາຍລາຍການເຊັ່ນ: ແປັບຊີ, ເຂົ້າໜົມ, ນົມຜົງ, ນົມປ່ອງ, ນົມສົ້ມ, ເຄື່ອງສໍາອາງ, ນົມແລັກຕາຊອຍ-ນົມໄວຕາມິວ, ໝີສໍາເລັດຮູບ ແລະ ຖ່ານໄຟສາຍ, ເພື່ອແນໃສ່ ປົກປ້ອງຜູ້ຊົມໃຊ້ ແລະ ສະກັດກັ້ນ ບັນດາຫົວໜ່ວຍທຸລະກິດທີ່ເຄື່ອນໄຫວບໍ່ຖືກຕ້ອງຕາມລະບຽບກົດໝາຍ ເພື່ອເຮັດໃຫ້ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ, ໂດຍສະເພາະໃນຊ່ວງໄລຍະທີ່ທົ່ວສັງຄົມພວມສຸມໃສ່ສະກັດກັ້ນ ແລະ ຕ້ານການລະບາດຂອງພະຍາດໂຄວິດ-19ນີ້.

ນັບແຕ່ປີ 2018 ເປັນຕົ້ນມາ ຫ້ອງການອຸດສາຫະກໍາ ແລະ ການຄ້າເມືອງ ທ່າແຕງ ໄດ້ເປັນເຈົ້າການ ສະກັດກັ້ນສິນຄ້າທີ່ບໍ່ຖືກຕ້ອງ, ສິນຄ້າໝົດອາຍຸການນຳໃຊ້ເຂົ້າມາຈຳໜາຍພາຍໃນເມືອງຂອງຕົນ ເພື່ອແນໃສ່ປົກປ້ອງຜູ້ດຳເນີນທຸລະກິດທີ່ຖືກຕ້ອງຕາມລະບຽບກົດຫມາຍ ແລະ ຜູ້ບໍລິໂພກໄດ້ຊົມໃຊ້ສິນຄ້າທີ່ມີຄຸນນະພາບ ແລະ ໄດ້ມາດຕະຖານ.