“ສັງຄົມໃສ່ຜ້າອັດປາກ” ເອື້ອປະໂຫຍດອາດຊະຍາກຳ ?
“ວິຖີປົກກະຕິໃໝ່” ຫລື “ນິວ ນໍມໍ” (New Normal) ທີ່ກຳລັງເປັນຮູບແບບການປະຕິບັດຂອງຄົນທົ່ວໂລກທີ່ຜະເຊີນສະພາບວິກິດສາທາລະນະສຸກຄັ້ງໃຫຍ່ສຸດ ໂດຍສະເພາະການໃສ່ຜ້າອັດປາກ-ດັງເມື່ອຢູ່ບ່ອນສາທາລະນະ ເຖິງວ່າເປັນເລື່ອງດີທີ່ຄວນເຮັດ ເພື່ອສຸຂະອະນາໄມ, ແຕ່ອາດໄປເຂົ້າທາງບັນດາອາດຊະຍາກອນ.
ບັນດາຜູ້ຊ່ຽວຊານເຕືອນວ່າ: ການໃສ່ຜ້າອັດປາກປິດບັງໃບໜ້າເປີດຊ່ອງທາງໃຫ້ຜູ້ບໍ່ຫວັງດີ ຫລື ກໍ່ການຮ້າຍ-ກໍ່ເຫດຮ້າຍໄດ້ສະດວກຂຶ້ນ, ເຖິງວ່າໄລຍະນີ້ປະຕິບັດການກໍ່ວິນາດສະກຳ ຫລື ກໍ່ເຫດຮ້າຍແຮງຮູບແບບຕ່າງໆທົ່ວໂລກຈະຫ່າງຫາຍໄປຈາກສື່ກໍຕາມ.
ປັດຈຸບັນ ປະເທດຕາເວັນຕົກເລີ່ມຫລຸດຜ່ອນມາດຕະການລັອກດາວແບບຄ່ອຍເປັນຄ່ອຍໄປເຊັ່ນ: ກໍລະນີຂອງລັດວິກຕໍເຣຍ ປະເທດອົດສະຕຣາລີ ທີ່ທ່ານ ແດນຽວ ແອນດຣູ ເຈົ້າຄອງລັດວິກຕໍເຣຍ ລະບຸວ່າ: ລັດວິກຕໍເຣຍຈະຫລຸດຜ່ອນຂໍ້ຈຳກັດໃນການຄວບຄຸມການແຜ່ລະບາດຂອງໂຄວິດ-19 ໂດຍຈະອະນຸຍາດໃຫ້ແຕ່ລະເຮືອນຕ້ອນຮັບແຂກໄດ້ສູງສຸດ 5 ຄົນ ແລະ ລວມຕົວກັນນອກເຮືອນໄດ້ບໍ່ເກີນ 10 ຄົນ ມີຜົນແຕ່ວັນທີ 12 ພຶດສະພາເປັນຕົ້ນໄປ.
ນອກຈາກນີ້, ລັດວິກຕໍເຣຍຍັງອະນຸຍາດໃຫ້ຈັດງານແຕ່ງດອງທີ່ມີແຂກເຂົ້າຮ່ວມ 10 ຄົນ ແລະ ອະນຸຍາດໃຫ້ຈັດງານສົບທີ່ມີແຂກເຂົ້າຮ່ວມໄດ້ສູງສຸດ 20 ຄົນໃນກໍລະນີທີ່ຈັດງານພາຍໃນອາຄານ ແລະ ບໍ່ເກີນ 30 ຄົນ ຖ້າຈັດງານພາຍນອກອາຄານ ເຊິ່ງການເຄື່ອນໄຫວຂອງລັດວິກຕໍເຣຍ ເຊິ່ງເປັນລັດທີ່ມີປະຊາກອນຫລາຍທີ່ສຸດເປັນອັນດັບສອງຂອງອົດສະຕຣາລີ ມີຂຶ້ນຫລັງຈາກທ່ານ ສະກອດ ມໍຣິສັນ ນາຍົກລັດຖະມົນຕີອົດສະຕຣາລີ ປະກາດແຜນກັບມາເປີດເສດຖະກິດຂອງປະເທດພາຍໃນເດືອນກໍລະກົດນີ້ ໂດຍຈະແບ່ງອອກເປັນ 3 ໄລຍະ.
ສ່ວນລັດຖະບານຍີ່ປຸ່ນ ກຳລັງພິຈາລະນາຈະຍົກເລີກການປະກາດສະຖານະການສຸກເສີນຢູ່ແຂວງສ່ວນຫລາຍຂອງປະເທດໃນເດືອນພຶດສະພານີ້, ແຕ່ຈະຍັງມີການເຝົ້າລະວັງຢູ່ໂຕກຽວ ແລະ ພື້ນທີ່ອື່ນໆ ຫລັງມີປະກາດໃຊ້ສະຖານະການສຸກເສີນເພື່ອຄວບຄຸມການແຜ່ລະບາດຂອງໂຄວິດ-19.
ທ່ານ ຢາຊູໂຕຊິ ນິຊິມູຣະ ລັດຖະມົນຕີກະຊວງເສດຖະກິດຂອງຍີ່ປຸ່ນ ກ່າວວ່າ: “ພວກເຮົາກຳລັງພິຈາລະນາຈະຍົກເລີກການປະກາດສະຖານະການສຸກເສີນໃນ 34 ແຂວງ ຈາກທັງໝົດ 47 ແຂວງຂອງປະເທດ ພາຍໃນວັນທີ 14 ພຶດສະພານີ້ ຖ້າສາມາດປະຕິບັດຕາມເງື່ອນໄຂບາງປະການເຊັ່ນ: ມີຜູ້ຕິດເຊື້ອໜ້ອຍລົງໃນທຸກອາທິດ”.
ຂະນະທີ່ອີກ 13 ແຂວງທີ່ລັດຖະບານຍັງຕ້ອງການໃຫ້ເປັນເຂດເຝົ້າລະວັງພິເສດ ເນື່ອງຈາກຍັງມີຜູ້ຕິດເຊື້ອໃໝ່ຈຳນວນຫລາຍ ໄດ້ແກ່ ໂຕກຽວ, ຄານາງາວະ, ໄຊຕາມະ, ຊິບະ, ໂອຊາກາ, ຮຽວໂກະ, ຟຸກຸໂອກະ, ຮອກໄກໂດ, ອິບາຣາກິ, ອິຊິດາວະ, ກິຟຸ, ໄອຈິ ແລະ ກຽວໂຕ.
ໃນເດືອນເມສາຜ່ານມາ, ທ່ານ ຊິໂຊ ອາເບະ ນາຍົກລັດຖະມົນຕີຍີ່ປຸ່ນ ປະກາດສະຖານະການສຸກເສີນທົ່ວປະເທດ ໂດຍກຳນົດໃຫ້ລັດຖະບານທ້ອງຖິ່ນຮ້ອງຂໍໃຫ້ປະຊາຊົນຫລີກລ່ຽງການອອກນອກເຮືອນໂດຍບໍ່ຈຳເປັນ ລວມທັງຢຸດເຮັດທຸລະກິດບາງຢ່າງຊົ່ວຄາວ ຫລື ຖ້າຕ້ອງອອກຈາກເຮືອນຄວນໃສ່ຜ້າອັດປາກ-ດັງ ເພື່ອປ້ອງກັນການແຜ່ລະບາດຂອງໂຄວິດ-19.
ສ່ວນຢູ່ອາເມລິກາ ຄະນະບໍລິຫານຂອງປະທານາທິບໍດີ ໂດນັລ ທຣຳ ໄດ້ອອກຄຳແນະນຳຕໍ່ຊາວອາເມລິກາ ໃຫ້ໃສ່ຜ້າອັດປາກ-ດັງທຸກຄັ້ງທີ່ອອກຈາກເຮືອນ ເພື່ອປ້ອງກັນການແຜ່ກະຈາຍຂອງໂຄວິດ-19 ເຊິ່ງເປັນໄປຕາມຄຳແນະນຳຂອງສູນຄວບຄຸມໂຣກອາເມລິກາ (CDC) ທີ່ແນະນຳວ່າ: ການໃສ່ຜ້າອັດປາກ-ດັງໃນເວລາອອກນອກເຄຫາສະຖານເປັນປັດໄຈສຳຄັນທີ່ຊ່ວຍຄວບຄຸມບໍ່ໃຫ້ເຊື້ອແຜ່ກະຈາຍໄປສູ່ຜູ້ອື່ນ.
ມາດຕະການນີ້ຢູ່ອາເມລິກາບໍ່ໄດ້ເປັນຂໍ້ບັງຄັບ, ແຕ່ເປັນຄຳແນະນຳຕໍ່ຊາວອາເມລິກາ ເຊິ່ງທ່ານ ທຣຳ ແນະນຳວ່າ: ຄວນໃຊ້ຜ້າອັດປາກ-ດັງ ຫລາຍກວ່າຜ້າອັດປາກທາງການແພດ ເນື່ອງຈາກຄວນສະຫງວນເປັນຊັບພະຍາກອນສຳລັບບຸກຄະລາກອນທາງການແພດ ແລະ ຜູ້ຕິດເຊື້ອເທົ່ານັ້ນ.
ເຖິງຢ່າງໃດກໍຕາມ, ການດຳເນີນຊີວິດຕາມວິຖີປົກກະຕິໃໝ່ທີ່ຕ້ອງປົກປິດໃບໜ້າເປັນການເພີ່ມໂອກາດໃຫ້ອາດຊະຍາກຳ, ຜູ້ບໍ່ຫວັງດີ ຫລື ສະມາຊິກກໍ່ການຮ້າຍ ສາມາດກໍ່ເຫດຮຸນແຮງໄດ້ໂດຍບໍ່ມີໃຜສົງໄສ.
