ບານເຕະພຣີເມຍລີກອັງກິດຈະຫວນກັບຄືນມາເເຂ່ງອີກໃນເດືອນມິຖຸນານີ້

          ຕາມການລາຍງານຂອງສຳນັກຂ່າວຕ່າງປະເທດ ກໍຄື ສະກາຍສະປອດ ສື່ດັງຂອງປະເທດອັງກິດ ໄດ້ລາຍງານໃຫ້ຮູ້ວ່າ: ການແຂ່ງຂັນບານເຕະພຣີເມຍລີກ ອັງກິດ ຈະຫວນກັບມາແຂ່ງຂັນໃຫ້ໄວທີ່ສຸດໃນວັນທີ 1 ມິຖຸນານີ້, ຫຼັງຈາກຖືກຜົນກະທົບຈາກເຊື້ອໄວຣັສໂຄວິດ-19 ​ເຊິ່ງຕ້ອງຢຸດການແຂ່ງຂັນຊົ່ວຄາວ.

          ຕາມແຜນການໃນເບື້ອງຕົ້ນທີ່ໄດ້ຮັບອະນຸຍາດຈາກທ່ານ ບໍຣິສ ຈອນສັນ ນາຍົກລັດຖະມົນຕີອັງກິດ ໄດ້ກ່າວເພີ່ມຕື່ມວ່າ: ການກັບມາແຂ່ງຂັນໃນຄັ້ງນີ້ຕ້ອງໄດ້ແຂ່ງຂັນແບບປິດ (ຫ້າມແຟນບານເຂົ້າສະໜາມ) ແຕ່ຍັງມີການຖ່າຍທອດສົດທາງໂທລະພາບໃຫ້ໄດ້ຮັບຊົມປົກກະຕິ. ພ້ອມດຽວກັນນີ້ ປະເທດອັງກິດໄດ້ວາງແຜນຫລຸດຜ່ອນມາດຕະການລັອກດາວໄລຍະ 2 ໃນບາງທຸລະກິດໃຫ້ກັບມາດຳເນີນງານໄດ້ເຊັ່ນດຽວກັນ, ແຕ່ຕ້ອງໄດ້ປະຕິບັດຕາມຄໍາຊີ້ນຳຂອງກະຊວງສາທາລະນະສຸກຢ່າງເຂັ້ມງວດ.