ຕໍາຫລວດອັກຄີໄພເຕືອນສະພາບອາກາດຮ້ອນໃຫ້ມີສະຕິໃນການຊົມໃຊ້ຟືນໄຟ

   ຫົວໜ້າພະແນກຕໍາຫລວດສະກັດກັ້ນ ແລະ ຕ້ານອັກຄີໄພ ນະຄອນຫລວງວຽງຈັນ ພັນໂທ ຈັນທະບູນ ມະນີວົງ, ໄດ້ອອກມາເຕືອນສັງຄົມໃຫ້ມີສະຕິຫລາຍຂຶ້ນໃນການຊົມໃຊ້ໄຟຟ້າ, ພາຍຫລັງເຫັນວ່າໄລຍະນີ້ສະພາບອາກາດຮ້ອນອົບເອົ້າອາດເຮັດໃຫ້ເກີດອັກຄີໄພໄດ້ງ່າຍ. ຂະນະທີ່ 3 ເດືອນຕົ້ນປີນີ້ທົ່ວປະເທດມີອັກຄີໄພເກີດຫລາຍກວ່າ40ຄັ້ງ,ອັນໄດ້ສົ່ງຜົນເສຍຫາຍຕໍ່ວັດຖຸຊັບສີນຂອງບຸກຄົນ ແລະ ລວມໝູ່ເປັນຈໍານວນຫລວງຫລາຍ.ຫົວໜ້າຕໍາຫລວດມອດໄຟນະຄອນຫລວງ ກ່າວວ່າ: ອັກຄີໄພແມ່ນຫາຍຍະນະທີ່ສ້າງຄວາມເສຍຫາຍໃຫ້ແກ່ຊີວິດ ແລະ ຊັບສີນ, ທັງເປັນປະກົດການຫຍໍ້ທໍ້ໜຶ່ງໃນສັງຄົມ,ເຊິ່ງມັນອາດເກີດຂຶ້ນໄດ້ທຸກເວລາເມື່ອຄົນເຮົາມີຄວາມປະໝາດໃນການຊົມໃຊ້ຟືນໄຟຈາກການເຮັດກິດຈະກໍາຕ່າງໆ ເຊັ່ນ: ໃຕ້ທູບທຽນບູຊາ, ແຕ່ງຢູ່ຄົວກິນ, ຈູດຂີ້ເຫຍື້ອ, ເຄື່ອງໃຊ້ໄຟຟ້າບໍ່ຮັບປະກັນ, ສາຍໄຟເກົ່າແກ່ແລະອື່ນໆແລະໃນຊ່ວງໄລຍະສະພາບອາກາດຮ້ອນອົບເອົ້ານີ້ຍິ່ງຈະເຮັດໃຫ້ເກີດອັກຄີໄພໄດ້ງ່າຍ. ໃນປີ 2016 ຜ່ານມາ, ສະເພາະຢູ່ນະຄອນຫລວງວຽງຈັນມີອັກຄີໄພເກີດຂຶ້ນຫລາຍກວ່າ 70 ຄັ້ງ ແລະ ໃນໄລຍະ 3 ເດືອນຕົ້ນປີ 2017 ນີ້, ທົ່ວປະເທດມີອັກຄີໄພເກີດຂຶ້ນຫລາຍກວ່າ 40 ຄັ້ງ, ມີເຮືອນເສຍຫາຍ 60 ຫລັງ, ມີຜູ້ເສຍຊີວິດ 4 ຄົນ. ໃນນີ້ຢູ່ນະຄອນຫລວງວຽງຈັນເກີດຂຶ້ນຫລາຍກວ່າ 20 ຄັ້ງ ແລະ ອັກຄີໄພທີ່ເກີດຂຶ້ນຮຸນແຮງແມ່ນກໍລະນີໄຟໃໝ້ບ້ານດອນຄຳເມືອງຮຸນແຂວງອຸດົມໄຊເມື່ອວັນທີ 11 ກຸມພາຜ່ານມາ, ຊຶ່ງມີເຮືອນປະຊາຊົນຖືກໄຟໄໝ້ເສຍຫາຍທັງໝົດ 26 ຫລັງ, ເຫດການໄຟໄໝ້ຕະຫລາດລືໄຊເມືອງໄຊແຂວງອຸດົມໄຊ, ເມື່ອວັນທີ 25 ກຸມພາຜ່ານມາ, ສ້າງຜົນເສຍຫາຍຫລາຍກວ່າ10ຕື້ກີບ,ເຫດການໄຟໄໝ້ຕະຫລາດປິ້ງໄກ່ເຊໂນເມືອງອຸທຸມພອນແຂວງສະຫວັນນະເຂດເມື່ອວັນທີ 19 ກຸມພາຜ່ານມາ, ມີຜົນເສຍຫາຍຫລາຍກວ່າ 500 ລ້ານກີບ, ເຫດການໄຟໃໝ້ເຮືອນປະຊາຊົນ 6 ຫລັງຢູ່ບ້ານຍາພະເມືອງສີໂຄດຕະບອງ, ນະຄອນຫລວງວຽງຈັນເມື່ອວັນທີ11ມີນາຜ່ານມານີ້,ອັນໄດ້ສ້າງຜົນເສຍຫາຍຕໍ່ຊັບສີນຂອງປະຊາຊົນເປັນຈໍານວນຫລາຍ.

ແນວໃດກໍຕາມ,ອັກຄີໄພເກີດຂຶ້ນແຕ່ລະຄັ້ງເຖິງວ່າໄດ້ຮັບການຊ່ວຍເຫລືອຈາກເຈົ້າໜ້າທີ່ໃນການຄວບຄຸມບໍ່ໃຫ້ແຜ່ລາມໄປເປັນບໍລິເວນກວ້າງກໍຕາມ,ແຕ່ບາງຄັ້ງການເຂົ້າໄປຊ່ວຍເຫລືອດັບມອດໄຟຂອງເຈົ້າໜ້າທີ່ຍັງພົບບັນຫາຫຍຸ້ງຍາກເຊັ່ນພາກສ່ວນໄຟຟ້າມາຕັດໄຟຊ້າ,ເສັ້ນທາງເຂົ້າໄປຫາຈຸດເກີດເຫດຄັບແຄບ, ບາງບ່ອນລົດມອດໄຟບໍ່ສາມາດເຂົ້າເຖິງໄດ້ ແລະ ອື່ນໆ. ຈຶ່ງເຮັດໃຫ້ບາງກໍລະນີໄດ້ສ້າງຄວາມເສຍຫາຍເປັນບໍລິເວນກວ້າງ. ແນວໃດກໍຕາມ, ເບື້ອງເຈົ້າໜ້າທີ່ມອດໄຟກໍໄດ້ສືບຕໍ່ປະຈຳການຕະຫລອດ 24 ຊົ່ວໂມງ, ພ້ອມທັງກະກຽມລົດ, ກຽມນ້ຳ ແລະ ອຸປະກອນມອດໄຟໃຫ້ເປັນລະບົບຄົບຊຸດເພື່ອກຽມຄວາມພ້ອມຊ່ວຍເຫລືອໄດ້ຢ່າງທັນການ ແລະ ຮຽກຮ້ອງເຖິງພະນັກງານ-ລັດຖະກອນ, ທະຫານ, ຕຳຫລວດ, ຕະຫລອດ ຮອດປະຊາຊົນບັນດາເຜົ່າຈົ່ງມີສະຕິຕໍ່ວຽກງານປ້ອງກັນ ແລະ ສະກັດກັ້ນອັກຄີໄພ, ຖືເອົາວຽກງານນີ້ເປັນບັນຫາສຳຄັນ, ບໍ່ຈູດຂີ້ເຫຍື້ອ, ຈູດປ່າຊະຊາຍ, ເອົາໃຈໃສ່ກວດກາ, ປ່ຽນຖ່າຍອຸປະກອນໄຟຟ້າທີ່ເກົ່າແກ່ທີ່ອາດມີຄວາມສ່ຽງພາໃຫ້ເກີດໄຟຟ້າລັດວົງຈອນ, ລະວັງ ໃນການໃຕ້ທູບ-ທຽນບູຊາ ພາຍຫລັງສໍາເລັດກໍດັບມອດທັນທີ, ຖ້າປະຕິບັດໄດ້ດັ່ງນີ້ເຊື່ອວ່າບັນຫາອັກຄີໄພຈະຫລຸດໜ້ອຍຖອຍລົງຢ່າງແນ່ນອນ ແລະ ເມື່ອເກີດອັກຄີໄພໃຫ້ແຈ້ງເບີ 1190 ແລະ 021 212707 ຊຶ່ງມີເຈົ້າໜ້າທີ່ປະຈໍາການຕະຫລອດ 24 ຊົ່ວ​ໂມງ.