ອາເມລິກາເລັ່ງເພີ່ມງົບຊ່ວຍເຫລືອ ຜູ້ໄດ້ຮັບຜົນກະທົບໂຄວິດ-19
ອາເມລິກາເລັ່ງເພີ່ມງົບຊ່ວຍເຫລືອຜູ້ໄດ້ຮັບຜົນກະທົບຈາກໂຄວິດ-19 ເຫດປະຊາຊົນຫວ່າງວຽກເປັນວົງກວ້າງ.
ສຳນັກຂ່າວຕ່າງປະເທດລາຍງານວ່າ: ເຈົ້າໜ້າທີ່ປະຈຳທຳນຽບຂາວຂອງອາເມລິກາ ເຊິ່ງລວມທັງທ່ານ ສະຕີເວນ ມານູຊິນ ລັດຖະມົນຕີການເງິນ ແລະ ທ່ານ ແລຣີ ຄຸດໂລ ຫົວໜ້າທີ່ປຶກສາຝ່າຍເສດຖະກິດ ໄດ້ເລີ່ມຫາລືກັບສະມາຊິກສະພານິຕິບັນຍັດ ທັງຈາກພັກລີພັບບີກັນ ແລະ ເດໂມແຄຣດ ເພື່ອເຈລະຈາເລື່ອງນະໂຍບາຍຕ່າງໆ ທີ່ຈະລວມຢູ່ໃນກົດໝາຍໃຫ້ງົບປະມານຊ່ວຍເຫລືອຜູ້ໄດ້ຮັບຜົນກະທົບຈາກການແຜ່ລະບາດຂອງໂຄວິດ-19 ສະບັບໃໝ່.
ບັນຫາທີ່ເວົ້າເຖິງມີທັງເລື່ອງງົບປະມານຊ່ວຍເຫລືອລັດທີ່ໄດ້ຮັບຜົນກະທົບທາງການເງິນຢ່າງຮຸນແຮງຈາກການແຜ່ລະບາດຄັ້ງນີ້ ໄປຈົນເຖິງການມອບອາຫານຊ່ວຍເຫລືອ ແລະ ການໃຫ້ອິນເຕີເນັດໃຊ້ ໂດຍການຫາລືດັ່ງກ່າວມີຂຶ້ນຫລັງເກີດການຄາດຄະເນວ່າ: ປະຊາຊົນອາເມລິກາຈະຫວ່າງວຽກຫລາຍຂຶ້ນໃນໄລຍະບໍ່ເທົ່າໃດເດືອນຕໍ່ໜ້າ.
ກົດໝາຍໃໝ່ນີ້ຍັງບໍ່ມີຂອບເວລາແນ່ນອນ ໂດຍພັກເດໂມແຄຣດຕ້ອງການປະກາດກົດໝາຍໃໝ່ດັ່ງກ່າວຢ່າງໄວທີ່ສຸດໃນອາທິດນີ້, ແຕ່ທຳນຽບຂາວຂໍເວລາຫາລືອີກ 2-3 ອາທິດ ເນື່ອງຈາກຕ້ອງມີການພິຈາລະນານະໂຍບາຍຕ່າງໆຢ່າງຮອບຄອບກ່ອນ.
ທັງນີ້ ສະພາຄອງເກຣດອາເມລິກາໄດ້ອະນຸມັດງົບປະມານ 3 ຕື້ໂດລາແລ້ວ ເພື່ອໃຊ້ຈ່າຍໃນດ້ານສາທາລະນະສຸກ, ຊ່ວຍເຫລືອທຸລະກິດຂະໜາດນ້ອຍ ລວມທັງມາດຕະການອື່ນໆ ເພື່ອຮັບມືການແຜ່ລະບາດຂອງໄວຣັສໂຄວິດ ແລະ ຜົນກະທົບທາງເສດຖະກິດທີ່ເກີດຂຶ້ນ.
