ຕໍາຫລວດນະຄອນຫລວງຈັບແກ້ງປຸ້ນຊັບອັນຕະລາຍມາດຳເນີນຄະດີ

ຫົວໜ້າຫ້ອງຕໍາຫຼວດ ປກສ ນະຄອນຫຼວງວຽງຈັນ ໃຫ້ຮູ້ວ່າ: ໃນຕອນທ່ຽງວັນທີ 8 ພຶດສະພາຜ່ານມານີ້, ເຈົ້າໜ້າທີ່ ປກສ ເມືອງຫາດຊາຍຟອງ ໄດ້ຮັບແຈ້ງຄວາມຈາກຜູ້ຖືກເສຍຫາຍ, ຢູ່ບ້ານໜອງແຫ້ວ ເມືອງຫາດຊາຍຟອງ ວ່າ: ມີຄົນຮ້າຍ 3 ຄົນ ບຸກເຂົ້າມາໃນເຮືອນແລ້ວໃຊ້ປືນສັ້ນຈີ້ ແລະ ມັດມື, ມັດທັງຜົວເມຍແລ້ວເອົາໄປຂັງໃນຫ້ອງນອນ. ຈາກນັ້ນ, ພວກເຂົາໄດ້ຄົ້ນເອົາຊັບສິນມີຄ່າຕ່າງໆເຊັ່ນ: ແຫວນຄໍາ 2 ວົງ, ສາຍຄໍຄໍາຂາວ ໜັກ 1 ບາດ, ໂມງ 1 ໜ່ວຍ, ໂທລະສັບໄອໂຟນ 2 ໜ່ວຍ, ບັດ ATM, ບັດພະນັກງານບໍານານ, ໃບຂັບຂີ່, ເງິນສົດຈໍານວນ 3,4 ລ້ານກີບ ແລະ ລົດເກັງໂຕໂຍຕ້າແຄມເມີລີ ເພື່ອເອົາຕົວຫຼົບໜີ; ເມື່ອຮູ້ແນວນັ້ນ ເຈົ້າໜ້າທີ່ ປກສ ເມືອງຫາດຊາຍຟອງ ກໍ່ໄດ້ແຕ່ງຕັ້ງເຈົ້າຫນ້າທີ່ວິຊາສະເພາະຂອງຕົນ ລົງກວດກາເກັບກໍາຂໍ້ມູນໃນສະຖານທີ່ເກີດເຫດ; ພ້ອມທັງສົມທົບກັບຕໍາຫຼວດນະຄອນຫລວງ, ກອງພັນປ້ອງກັນເຄື່ອນທີ່ ແລະ ບັນດາສະຖານີ 1191 ປກສ ເມືອງສີສັດຕະນາກ ຕິດຕາມເປົ້າໝາຍ, ຈົນຮອດເວລາ 19:00 ໂມງ ຂອງວັນດຽວກັນ ເຈົ້າໜ້າທີ່ຈິ່ງສາມາດຈັບຕົວຜູ້ຖືກຫາໄດ້ 2 ຄົນ ຄື: ທ້າວ ອານຸສັກ ( ກິໂນ່ ) ອາຍຸ 45 ປີ, ອາຊີບ ກໍາມະກອນ ບ້ານສະພານທອງເໜືອ ແລະ ທ້າວ ອານັນຕະໄຊ ( ໂຈອີ້ ) ອາຍຸ 21 ປີ, ອາຊີບ ນັກສຶກສາ ບ້ານໂພນສະຫວັນເໜືອ, ທັງສອງຢູ່ເມືອງສີສັດຕະນາກ ເພື່ອມາດໍາເນີນຄະດີ. ຜ່ານການສອບສວນພວກກ່ຽວ ໄດ້ຮັບສາລະພາບຕໍ່ເຈົ້າໜ້າທີ່ວ່າ: ພວກເຂົາໄດ້ລົງມືປຸ້ນເອົາຊັບດັ່ງກ່າວແທ້ ແລະ ໄດ້ເອົາຊັບສິນທີ່ປຸ້ນມາແບ່ງກັນ ແລ້ວກໍ່ເອົາຕົວຫຼົບໜີ. ປັດຈຸບັນ, ເຈົ້າໜ້າທີ່ ພວມກໍາລັງເລັ່ງລວບລວມຂໍ້ມູນ ແລະ ຕິດຕາມຜູ້ຮ່ວມຂະບວນການອີກ 1 ຄົນ ມາລົງໂທດຕາມກົດໝາຍ.