ໂຄວິດ-19 ເລີ່ມກັບມາລະບາດແບບເລັ່ງຢູ່ເຢຍລະມັນ
ສູນຄວບຄຸມ ແລະ ປ້ອງກັນໂຣກຂອງເຢຍລະມັນ ວິເຄາະວ່າ: ການແຜ່ລະບາດຂອງໂຄວິດ-19 ໃນປະເທດ ກຳລັງກັບມາຢູ່ໃນອັດຕາເລັ່ງອີກ.
ສຳນັກຂ່າວຕ່າງປະເທດລາຍງານວ່າ: ສະຖາບັນໂຣເບີດ ຄ໊ອກ ເຊິ່ງເປັນສູນຄວບຄຸມ ແລະ ປ້ອງກັນໂຣກຂອງເຢຍລະມັນ ເຜີຍແຜ່ລາຍງານໃນວັນທີ 10 ພຶດສະພາ ກ່ຽວກັບສະຖານະການໂຄວິດ-19 ໃນປະເທດວ່າ: ອັດຕາສະເລ່ຍການແຜ່ເຊື້ອໄວຣັສໂຄໂຣນາສາຍພັນໃໝ່ຢູ່ເຢຍລະມັນເພີ່ມຈາກ 0,65 ໃນວັນທີ 6 ພຶດສະພາ ຂຶ້ນມາເປັນ 1,1. ໝາຍຄວາມວ່າ: ຜູ້ມີເຊື້ອຢູ່ໃນຮ່າງກາຍ 10 ຄົນ ສາມາດແຜ່ເຊື້ອໃຫ້ບຸກຄົນອ້ອມຂ້າງອີກ 11 ຄົນ ຫລື ເກືອບຈະ 1 ຕໍ່ 1.
ທັງນີ້ ການຄວບຄຸມໂຄວິດ-19 ໄດ້ຢ່າງມີປະສິດທິພາບຕາມມາດຕະຖານສາກົນນັ້ນ ຄ່າລະດັບການຕິດເຊື້ອພື້ນຖານຕ້ອງຕໍ່າກວ່າ 1 “ເປັນໄລຍະເວລາພໍສົມຄວນ”. ເຖິງຢ່າງໃດກໍຕາມ, ໃນທ້າຍອາທິດຜ່ານມາ ເຈົ້າໜ້າທີ່ສາທາລະນະສຸກຂອງເຢຍລະມັນກວດພົບການແຜ່ລະບາດເປັນກຸ່ມກ້ອນຄັ້ງໃໝ່ ຢູ່ໂຮງຂ້າສັດຫລາຍແຫ່ງເຊັ່ນ: ຢູ່ລັດນອດໄຣ-ເວສຟາເລນ ເຊິ່ງມີປະຊາກອນຫລາຍທີ່ສຸດໃນປະເທດ ໂດຍຢູ່ໂຮງງານແຫ່ງນີ້ມີຜູ້ຕິດເຊື້ອແລ້ວ 200 ຄົນ ຈາກຈຳນວນພະນັກງານທັງໝົດ 1.200 ຄົນ ແລະ ຍັງພົບການຕິດໂຣກແບບກຸ່ມຕາມສູນເບິ່ງແຍງຜູ້ອາຍຸສູງອີກຫລາຍແຫ່ງນຳອີກ.
ເຖິງວ່າຍັງໄວເກີນໄປທີ່ຈະສະຫລຸບວ່າ: ສະຖານະການໂຄວິດ-19 ຢູ່ເຢຍລະມັນຈະກັບມາ “ວິກິດ” ອີກ ຫລື ບໍ່, ແຕ່ລາຍງານຂອງສະຖາບັນໂຣເບີດ ຄ໊ອກ ລະບຸວ່າ: ຕ້ອງຕິດຕາມທ່າອ່ຽງການພົບຜູ້ຕິດເຊື້ອໃໝ່ໃນປະເທດຢ່າງໃກ້ຊິດໃນໄລຍະນີ້.
ການເຜີຍແຜ່ລາຍງານຂອງໂຣເບີດ ຄ໊ອກ ເກີດຂຶ້ນພຽງບໍ່ເທົ່າໃດວັນ ຫລັງນາຍົກລັດຖະມົນຕີ ອັງເກລາ ແມເຄິລ ກ່າວວ່າ: ເຢຍລະມັນຜ່ານພົ້ນການແຜ່ລະບາດ “ໄລຍະທຳອິດ” ຂອງໂຄວິດ-19, ລັດຖະບານທ້ອງຖິ່ນຫລາຍລັດຈຶ່ງເລີ່ມຫລຸດຜ່ອນມາດຕະການລັອກດາວ.
ທັງນີ້ ລັດຖະບານທ້ອງຖິ່ນຂອງ 16 ລັດໃນເຢຍລະມັນເຫັນພ້ອມກັບທ່ານ ນາງ ແມເຄິລ ວ່າຈະກັບມາໃຊ້ມາດຕະການລັອກດາວທີ່ເຂັ້ມງວດອີກ ຖ້າອັດຕາການແຜ່ລະບາດໃນເມືອງໃດກໍຕາມເພີ່ມເປັນ 50 ຄົນຕໍ່ປະຊາກອນ 100.000 ຄົນພາຍໃນ 1 ອາທິດ ເຊິ່ງລາຍງານຂອງໂຣເບີດ ຄ໊ອກ ລະບຸວ່າ: ເກີດຂຶ້ນແລ້ວ “ຢ່າງໜ້ອຍໃນ 3 ເມືອງ”.
