ກະຊວງຄົມະນາຄົມຫວຽດນາມນຳສະເໜີຮ່າງກົດໝາຍວ່າດ້ວຍ: ເປີດໄຟຕາລົດຍາມກາງເວັນ

ໂດຍ: ລູກເມືອງພວນ

ກະຊວງຄົມະນາຄົມ ແລະ ການຂົນສົ່ງຂອງຫວຽດນາມໄດ້ຮ່າງກົດໝາຍວ່າດ້ວຍ: ຄົມະນາຄົມທາງບົກ ສະບັບປັບປຸງ, ຊຶ່ງຈະມີການເພີ່ມເຕີມຫຼາຍບັນຫາໃໝ່, ພິເສດໃນນັ້ນ ແມ່ນການເປີດໄຟຕາລົດຍາມກາງເວັນ ເມື່ອມີການສັນຈອນ.
ວັກ 3 ໃນມາດຕາ 27 ຂອງຮ່າງກົດໝາຍກຳນົດວ່າ: ລົດໃຫ່ຍ, ລົດຈັກ, ລົດຖີບໄຟຟ້າ, ລົດຈັກໄຟຟ້າ ເມື່ອສັນຈອນຕາມທ້ອງຖະໜົນຕ້ອງເປີດໄຟຕາລົດຢ່າງໜ້ອຍໜຶ່ງດອກທາງໜ້າ ແລະ ໄຟທ້າຍຕາມການອອກແບບຂອງຜູ້ຜະລິດ.

ຜູ້ຕາງໜ້າກະຊວງຄົມະນາຄົມໃຫ້ຮູ້ວ່າ: ການອອກຂໍ້ກຳນົດດັ່ງກ່າວ ແມ່ນອີງໃສ່ສົນທິສັນຍາສາກົນກ່ຽວກັບເຄື່ອງໝາຍຈະລາຈອນທາງບົກປີ 1968. ໃນນັ້ນກຳນົດໃຫ້ເປີດໄຟຕາລົດ ໃນເວລາສັນຈອນຕາມທ້ອງຖະໜົນ, ທັງນີ້ເພື່ອໃຫ້ຜູ້ຂັບຂີ່ສາມາດຮັບຮູ້ສັນຍານເຕືອນ ແລະ ຂັບຂີ່ງ່າຍຂຶ້ນ. ໂດຍສະເພາະແມ່ນລົດບັນທຸກມັກຈະມີຈຸດມືດທີ່ຜູ້ຂັບຂີ່ບໍ່ສາມາດຈະມອງເຫັນໄດ້, ອັນເປັນສາເຫດພາໃຫ້ເກີດອຸບັດເຫດໃນທ້ອງຖະໜົນ.